Nitre tä kukwe ngwentari
¿Ñobätä nitre Jesús rüe ye nämene ja kise bätäte ye mike tuin ütiäte krubäte jai?
Kukwe keta kabrebätä nitre Jesús rüe nämene blite blo nitre ja tötikaka aune Jesús yebätä abokän ngätäite kukwe ye tä. Kukwe biani Ngöbökwe Moisés ie yebätä mika nämene gare kukwe ruärebätä ni iti kukwebätä ye rabadre nemen käme ngrabare. Kukwe ruäre ye abokän nitre tädre därie nimiente ngrabare, tädre bren lepra kisete o kisemikadre kwe ni nire o jondron nire ngwaka yebätä. ¿Ni iti ye rabadre dre nuainne ne kwe rabadreta nemen kwin ngrabare? Kukwe biani Ngöbökwe yebätä mika nämene gare ni ye rabadre jondron kukwe Ngöböi, ja kise bätete o ñö metekä ja ngrabare (Levítico, kapitulo 11 nemen 15; Números, kapitulo 19).
Kukwe keta kabre biani Ngöbökwe ye ngätäite nitre judío ji ngwanka kukwebätä yekwe kukwe jeñe kwetre ükaninte. Ni iti raba nementa ño käme ngrabare aune ño raba ni mada mike käme ngrabare arato yebätä niaratre kukwe keta kabre ükaninte jatäri ye tärä kwati tä mike gare. Arato jondron meden meden raba nemen käme aune meden abokän ñaka raba nemen käme ye ükaninte kwetre täräbätä jai. Ne madakäre, kukwe mada ngwarbe ükaninte kwetre nuaindre ne kwe nitre rabadre nuainne ja mikakäreta kwin ngrabare.
Nitre Jesús rüe yekwe ngwanintari Jesús ie: “Nun mräkä kirakira käkwe kukwe ükaninte nuendre, ¿se ñobtä abko nitre ja töitikaka mabe käta mike ñakare täte se? [...] nitre ja töitikaka mabe abko ñan tä köbötike jire chi mrökrä se” (Marcos 7:5). Ja kise bätädrete ne kwe nitre rabadre kwin ngrabare ye ñaka aibebätä nitre ji ngwanka kukwebätä kä ye näire nämene blite. Ñakare aune niaratre kukwe ngwarbe ükaninte nuaindre ye abokän nitre mrödre ye känenkri ñö kekadre kisebiti. Tärä kädrite párrafo käne yebätä ye tä mike gare drebiti nitre rabadre ñö keke ja kisebiti, ñö meden kwin, nirekwe kekadre ni mada kisebiti aune ñö kekadre nemen ja kise ngraba nuäi yebätä nitre ji ngwanka kukwebätä nämene ñäke jai arato.
¿Nitre kä tibienbätä kukwe keta kabre ngwarbe ükaninte yebätä Jesús nämene töbike ño? Nitre judío ji ngwanka kukwebätä yei niarakwe niebare: “Mun ngwarbe ja bä mike kuin. Mun ye mdenbtä Isaías käkwe Ngöbö Kukwei niebare metre munbtä abko tä tikani krörö: Juta ne käta ti mike ütiäte ja kada aibebti, aisete tä ti [Jehová] tarere ñakare era metre. Tätre ti käikitekä ngwarbe amne kukwe ükaninte au jakrä kwetre, aibe tätre dirire ti Kukwei täte, niebare Isaíakwe munbtä. Ye abko, kukwe biani Ngöbökwe nuendre nie abko munta kite jökrä temen, amne kukwe ükaninte ni kä nebtäkwe abko mikata bäri ütiäte jae munkwe” (Marcos 7:6-8).