Ja töi jeñebiti nikanintre sribire Micronesia

KATHERINE, käi Estados Unidos, käkwe ja ngökani ñöte kä nämene 16 niarabiti ye ngwane. Kukwe drie ye niara nämene mike tuin ütiäte jai; akwa nämene kukwe driere Gobran Ngöbökwe yebätä ye nitre ñaka tö nämene kain ngäbiti. Niara ie törö: “Nitre käkwe ribebare Ngöböi rabadre ni juen känti ne kwe rabadre dimike niara mike gare jai yebätä ti nämä ñäke. Nitre töi ye kwrere kwandre tie ie ti tö nämä, akwa ye erere ñaka rababa bare”.

Katherine kukwe driebare kä kwati krubäte te kä keteitibe känti, ye bitikäre niara rikadre nitre tö kukwe kwin kukwe nuai yekänti yebätä niara jatani töbike. Akwa, kukwe keteiti nämä niara töi nike. Bati niara nikani mento mräkätre kwe yebätä angwane ja namani ruin ulire ie köbö kwatire kwatire. ¡Bämän krobu aibe te niarakwe mräkätre tuanimetre akwa ja namani ruin kore ie! ¿Niara rikadre kä raire te ye ngwane kä ngwandre nüke kwe jai? Nitre tö Jehová mikai gare jai ye niarakwe dimikadre köböire kä rabadre jutobätä yei niara tö namani aune ye niara dimikani bäri. Kä medenkänti niara rabadre niken yebätä töbikataribare kwe, ye bitikäre kukwe tikani kwe sukursal Guam ie aune sukursal ye kukwe mikani gare ie. Sö julio kä 2007, kä nämene 26 niarabiti angwane nikani nüne kä Saipán yekänti. Ngutuä mrente ye nemenkä kä Pacífico yekri aune rabakäre kä yekänti nändre 10,000 kilómetro (6,000 milla) niara gwire yebätä mentokwäre. ¿Dre kwin namani barebätä?

NI NIBU ORABARE ABOKÄN NGÖBÖKWE KANI NGÄBITI

Katherine namani konkrekasion mrä yete ye bätäräbe meri kä 35 biti kädekata Doris namani gare ie. Meri ye ja tötika Bibliabätä kani ngäbiti. Kapitulo krämä tärä Dre drieta yebätä ja tötikabare kwetre angwane Katherine jatani ja töibikaire. Niara tä niere: “Doris nämä ja tötike kwin krubäte aisete ti köböite kukwe mada rabadre bare ye ti ñaka törbaba. Ni mada tötikata käre ye erere ti ñaka nuainbare, aisete eteba mada kä ja närebiti Doris yebe abokän ja tuanina kukwe keta kabre ben käkwe niara ye tötikadre ie ti törbaba”. Katherine orabare Jehovai ne kwe meri mada testiko ye Doris dimikadre ja tötika yebätä. Ye bitikäre, tö namani dre nuain ye ja töi mikani kwe niere Doris ie.

Katherine ie törö: “Ti jämi blite Doris ben ye känenkri, kukwe nämä kisete ye mikaba gare kwe tie. Tikwe kukwe nuaba kwin aune kukwe ye erere namani ti kisete ye ngwane Jehovakwe ti dimikani ño ye tikwe nieba ie”. Doris debe biani Katherine ie biti niebare kwe ie: “Jehová tä ti dimike mä köböire. Ti nämä ñäke Bibliabätä ora kabre te angwane mä rükaba ti känti. Ti nämä ja muaire aune Ngöbökwe ni juandre iti kukwe Bibliabätä mikakäre nüke gare tie ye ti nämä ribere ie. Ye bätäräbe mä rükaba jukwe mete tie. ¡Tikwe orabare Jehovai ye niarakwe ka ngäbitiba!”. Katherine tä kukwe ye ngwenta törö jai angwane okwä ñöita nemen nen ngwärebätä. Niara tä niere: “Doris kukwe nieba tie ye käkwe mikaba gare tie Ngöbökwe orasion tikwe ka ngäbitiba. Jehovakwe mikaba gare tie ti nämä juto Doris tötikakäre”.

Doris ja ngökani ñöte kä 2010 yete, aune kä nengwane tä nitre ruäre tötike Bibliabätä arato. Katherine tä niere: “¡Ti tö nämä kukwe tuai nemen bare jabätä kä kwati krubäte te ye erere rababa bare metre!”. Kä Kosrae ye ngutuä mada mrente kä Pacífico yekri, yete Katherine tä sribi prekursor especial nuainne kä nengwane.

KUKWE KETAMÄ ÑAKA NUÄRE AUNE JA TUADRE ÑO BEN

Ja ngwaitre aune etebantre 100 biti nikani nüne juta Micronesia yete nitre ribeta kukwe driekäre yekänti. Niaratre ruäre yebiti kä niena 19 o ruärebiti kä niena bäsi 79. Kä nämene 19 Erica yebiti angwane nükani juta Guam yekänti kä 2006 yete. Ja mräkätre tä sribire kä jutobiti yei ja ruin ño ye niara tä mike gare: “Nitre töta nemen krubäte kukwe metre mikai gare jai yekänti nita sribi prekursor nuainne ye ngwane jata nemen ruin kwin nie. Jehovata ti dimike sribi ye nuainne yebätä tita debe bien krubäte ie. ¡Nire tä ye nuainne ye tä nüne kä jutobiti!”. Kä nengwane niara tä sribi prekursor especial nuainne kä Ebeye (Islas Marshall) yekänti. Nire tä niken nüne juta madate ye tä ja tuin kukwe ruäre ben. Ja mräkätre nikani nüne juta Micronesia yete käkwe ja tuani kukwe ketamä ben aune dre nuainbare kwetre kä ngwankäre nüke jai ye ani mike gare jai.

Nünandre jondron braibebiti. Kä nämene 22 Simon yebiti angwane nükani kä Palaos yekänti kä 2007 yete. Drekebe nükani gare ie nämene ngwian ganainne Inglaterra ye erere ñaka ganaindi kwe kä yekänti. Niara tä mike gare: “Ti tö nämä dre kökai ja kräke ye ti ñaka rabadre kökö jökrä ye rababa gare tie. Tikwe dre kökai kwetadre jai yebätä tita töbike kwin käne nengwane, aune meden bäri brai ye tita känene kwin. Jondron tä niken ngwarbe tikän ye ngwane jondron ye ükatekäre tita jondron ñan mrä kökö aune tita ni mada känene ükatekäre jabe”. ¿Niarakwe ja töi mikani nüne jondron braibebiti ye käkwe dimikani ño? Simon tä niere: “Dre ribeta metrere jai nünankäre aune tikwe nünandre ño jondron braibebiti ye rababa gare tie. Jehová ti dimikanina kukwe keta kabre känti ye nüke gare tie. Kä kwä kükü tita kukwe driere nete aune ti ñaka mrö aune kä kübiakäre ye täi nike”. Erametre, nire tä nüne jondron braibebiti aune tä Gobran Jehovakwe mike käne ye niarata ngübarebiti (Mat. 6:32, 33).

Tä nemen ulire. Erica tä niere: “Tita käre ti mräkätre ben ye medenbätä ti rikai mentokwäre kukwe driekäre ye ngwane ti rabai niaratre uliere krubäte ye jürä rababa tibätä”. ¿Dre nuainbare kwe ja tuakäre kukwe yebe? Niara tä mike gare: “Täräkwata La Atalaya nämä blite nita nemen ulire yebätä ye ti ja töi mikaba ñäkebätä ti jämi niken ye känenkri. Meri iti käkwe niebare ngängän kwe ie: ‘Jehová raba mä ngübare bäri kwin ti ngwä’. Kukwe yebätä tikwe ñakäba angwane ye käkwe ti dimikaba krubäte”. Hannah aune muko kwe Patrick, tä sribi Ngöbökwe nuainne Majuro (Islas Marshall) yekänti. Niara tä nemen ulire ye ngwane tä ja töi mike ja ngwaitre aune etebantre konkrekasionte yebätä ye kätä niara dimike. Niara tä niere: “Ja mräkätre kä jökräbiti tibien yebätä tita debe bien Jehovai; niaratre ye ti mräkä arato. Niaratre ñaka ti dimikadre akräke ti ñaka raba sribire ni ribeta bäri kukwe driekäre yekänti”.

Ja ketadre nitre madabe. Simon tä mike gare: “Nita nüke juta madate ye ngwane jondron jökrä tä nemen tuin jene nie. Ruäre ngwane tita kukwe niere kötaidre akwa kukwe ye ñan tä nemen nüke gare nitre madai, yebätä jata nemen ruin ngwarbe tie”. Erica tä niere: “Nitre mada ñaka törbaba ja ketai tibe rababa ruin tie kenanbe, akwa ñokäre ti nikani nüne yete ye ti nämä ngwen törö jai. Ti ñan nämä yete ne kwe ni mada kukwe kwin nuaindre ti kräke, ñakare aune ti nämä yete sribikäre bäri Jehová kräke”. Niara tä mike gare arato: “Kä rikaba ta angwane ja ketamuko kwin kwanba tie aune ye ütiäte krubäte ti kräke”. Simon ja di ngwani blite kukwe palauano yebiti aune ye käkwe dimikani ‘ja brukwä mike kri’ ja mräkätre kä yekänti diankäre ja ketamukore arato (2 Cor. 6:13). Niara tö namani ja kitai ja mräkätre kukwei yebätä ye köböire niara namani tare kwetre. Ja mräkätre tä niken nüne juta madate tä sribire gwairebe ja mräkätre kä yekänti ben, ye ngwane kukwe kwin tä nemen niaratre jökrä kwe, ñobätä ñan aune konkrekasionte niaratre tä nemen ja kete kwin. Nitre ribeta kukwe driekäre yekänti nitre tä niken sribire, ¿yekwe kukwe meden kwin tä nemen arato?

KUKWE KWIN TÄ NEMEN KRUBÄTE NIKWE

Apóstol Pablo käkwe tikani: “Nire nire tä nura nökö kabre abko käta nura ngwä ötö kabre arato” (2 Cor. 9:6). Kukwe nieta ne erere tä nemen bare ja mräkätre tö kukwe driei bäri yebätä. ¿Ja ngwaitre aune ja etebantre nikani Micronesia yekwe dre kwin namanina?

Ja tötika Bibliabätä ye kömika raba nitre kwati ben juta Micronesia yekänti. Nitre yei kukwe metre tä nemen gare angwane tä kite nirien kukwe ja üairebiti aune ye ererebätä tätre nüne, nitre ye erere raba kwen nie kä yekänti. Arato, Patrick bätä Hannah kukwe driebare kä Angaur yekänti, nitre 320 tä nüne ngutuä chi mrente yekänti. Niaratre yebiti kä nikani sö krobu kukwe driebätä kä yekänti angwane meri iti abokän nämene monso kwe ngübare kaibe ye namani gare ietre, bengwairebe meri ye ja tötika Bibliabätä kani ngäbiti. Kukwe metre ye matani meri ye brukwäte aune ja töi kwitani kwe kukwe keta kabrebätä. Hannah tä niere niara bätä muko kwe nämene ja tötika ye mike krüte batire batire, ye bitikäre nämene nikenta ja gwirete bicicleta yebiti angwane nämene nikren jabätä kwärikwäri aune niaratre nämene niere: “¡Tä debe mäi Jehová!”. Niara tä mike gare arato: “Jehová törbadre akräke kukwe mada nuaindre kwe obeja ne ngwankäre ja kokwäre ye gare tie, akwa nun jatani sribire nitre ribeta bäri yekänti, ye köböire obeja ne kwanba nunye aune nunta dimike Jehová mike gare jai. ¡Ne abokän kukwe bäri kwin namani bare nunbätä!”. Erica tä niere erere, “ni mada dimikata Jehová mike gare jai ye tä kä mike juto krubäte nibätä ye niedre ño ja kukweire ñan tä nemen gare nie”.

¿MÄ RABA NUAINNE ARATO?

Juta keta kabre känti nitre ribeta krubäte Gobran Ngöbökwe kukwei driekäre. ¿Nitre tä ja ükete nänkäre kä madakänti kukwe driekäre yebe mä raba niken siba? Jehová mä töi mikadre kukwe driere bäri ye mäkwe ribe ie. Nitre umbre konkrekasionte, ni circuito tuabitikä o ja mräkätre ruäre nikani nitre ribeta kukwe driere yekänti yebe mäkwe blita. Mäkwe kukwe ükaite jai ye jatara nemen bare mäi angwane, juta medente mä tö näin kukwe driere ye mäkwe mika gare sukursal tä sribi Ngöbökwe ngübarebiti juta yete ie aune mäkwe kukwe ngwantari bäri ietre.a Ja mräkätre kwati krubäte bati, umbre, kaibe aune gure nikani ja töi jeñebiti juta madate ye ngätäite mä raba nemen siba aune kä raba nemen juto mäbätä niaratre ye erere arato.