Kukwe ja tötikara 8

Nitre ja mräkäre nünanka jabe kätä kä mike juto Ngöböbätä

¿Ni brare ye tä ükaninte ño mräkätre kwe nünanka ben yekrä? (1)

¿Ni brare rabadre merire kwe ye ngübare ño? (2)

¿Sribi meden tä ükaninte ni rüne ye kisete? (3)

¿Dreta nuaindre ni merire yei mräkätre kwe yekrä? (4)

¿Ngöböta dre nuainmana ni rüne bätä monsotre yei? (5)

¿Biblia kätä dre niere ja dianka mento bätä ja tuanmetre yebätä? (6, 7)

1. Biblia kätä niere ni brare ye tä ji dukwä ngwanka mräkätre ye käne. (1 Corintios 11:3.) Ni brare käkwe ja mikadre gure meri itibe ben, bätä ja mika gure ye ükadrete metre kwe. (1 Timoteo 3:2; Tito 3:1.)

2. Ni brare rabadre merire kwe ye tarere ja kwata tare kwe ye erere. Rabadre ngübare Jesuta nitre nänkä ben ngübare ye erere. (Efesios 5:​25, 28, 29.) Ñaka rabadre merire mete jire chi bätä ñäke tare ie. Aune, mikadre ütiäte kwe jai bätä taredre kwe. (Colosenses 3:19; 1 Pedro 3:7.)

3. Ni rüne kätä sribikä jadibiti mräkätre kwe ye ngübakäre. Rabadre mrö, dängutu bätä ju nünankäre ye känene merirei bätä monsotre kwe yekrä. Arato rabadre kukwe ja üairekrä ye bien mräkätre kwe yei. (1 Timoteo 5:8.) Tä ji ngwanka käne mräkätre ye dimikakäre ja kite Ngöbö kukwei yebätä bätä Niara tö dre dre nuain yebätä. (Deuteronomio 6:​4-9; Efesios 6:4.)

4. Ni merire rabadre brare kwe dimike sribibätä. (Génesis 2:18.) Rabadre brarei kwe dimike monsotre tötikabätä. (Proverbios 1:8.) Ni merire ye käkwe mräkätre kwe ye taredre bätä ngübadre kwin kwe, ie Jehová tö. (Proverbios 31:​10, 15, 26, 27; Tito 2:​4, 5.) Ni merire käkwe brare kwe ye mikadre ütiäte krubäte jai. (Efesios 5:​22, 23, 33, Kukwe Kuin Ngöbökwe.)

5. Monsotre ye käkwe rün kwe ye mikadre täte jai, ie Ngöbö tö. (Efesios 6:​1-3.) Niarata ribere ni rüne bätä ni meyere käkwe monsotre ye tötikadre bätä mäträdre bätä kwe. Ni rüne bätä ni meyere rabadre kä denkä jai jadakakäre monsoibe bätä ja tötikakäre Biblia yebätä bentre. Ni rüne kätä ye nuaine angwane tätre kukwe ja üairekrä ye bien ietre bätä tare kwetre ye tätre bämike. (Deuteronomio 11:​18, 19; Proverbios 22:​6, 15.) Ñakare rabadre monsotre kwatamete jume dikaro. (Colosenses 3:21.)

6. Nitre gure metre nünanka jabe yebätä kukweta nakainkä ye angwane, ütiäte krubäte tärä Ngöbökweta dre niere ye nuaindre kwetre. Biblia kätä niere nie nikwe ja taredre bätä ja mika ngite ye juandre ta jabiti. (Colosenses 3:​12-14.) Nitre ruäre tätre ja denka mento kukwe ñaka ütiäte ye ükatekrä akwa Ngöbö Kukwei ñaka tä ye nuainmana. Akwa ni merire raba ja denkä mento brare yebätä 1) ne ñaka törba mräkätre kwe ye ngübai, 2) brarei rubun krubäte bätä raba nuainne tare o 3) ja mikadre niara rüere kwe bätä ñaka rabadre tuenmetre Jehová mike täte. (1 Corintios 7:​12, 13.)

7. Nitre gure metre jabe ye ñaka raba ja mike gure ngwarbe ni madabe. Nitre tärä gure metre akwa nemen ni madabe ye abokän ja mikata ngite muko kwe yekrä bätä Ngöbökrä. (Hebreos 13:4, Kukwe Kuin Ngöbökwe.) Ni tärä gure metre akwa tä nemen ni madabe yebe köböire Biblia kätä niere, ni raba ja tuenmetre biti ja miketa gure metre ni madabe. (Mateo 19:​6-9; Romanos 7:​2, 3.) Nitre tärä gure metre akwa tä niken ja tuenmetre biti nemen gure ni madabe akwa ñaka Jehová kukwei tä niere erere, ye abokän tuin käme ie. (Malaquías 2:​14-16.)

[Jondron üai bämikani página 17]

Ngöbö tä ribere ni rüne bätä ni meyere käkwe monsotre ye tötikadre bätä mäträdrebätä kwe

[Jondron üai bämikani página 17]

Ni rüne kwe mräkätre tare tä jondron ja nirekrä bätä ja üairekrä ye bien ietre