Kukwe ja tötikara 1

Ngöböta ni nübaire ja mäke ben

Nikwe ja mäkädre Ngöböbe ie niara tö. ¿Mä raba ja mäke Ni bäri ütiäte jondron jökräbiti yebe ye gare mäi? Ni kä Abrahán, käkwe nünanbare mekerabe, kädekani ja ketamuko Ngöbökwe (Santiago 2:​23). Nitre mada brare bätä merire käkwe ja mäkäbare Ngöböbe arato ye abokän jondron kwin krubäte namani kwetre Biblia kätä kädriere. Kä nengware, ni kwati kä jökräbiti tibien nibira ja mäke Ngöböbe. Mä raba ja mäke ben arato.

Ja mäkädre Ngöböbe ye bäri kwin ni ja erebe nibe yekrä. Nitre ja ketamuko Ngöbökwe ja mikaka täte metre ie ye niara ñaka tuenmetre kaibe (Salmo 18:25). Ja mäkädre Ngöböbe ye bäri kwin jondron ütiäte yebätä. Nitre jondron ütiäte bökäne krubäte ye tä krüte aune, ni mada tä ngwian kwe den jai. Aune nitre kätä ja mäke Ngöböbe ye jondron ütiäte tä kwetre ye abokän dianka ñaka raba kän (Mateo 6:​19).

Nitre ruäre ñaka törbai mä tuai ja tötike jankunu Ngöböta dre driere yebätä. Ruäre nitre ja ketamuko mäkwe bätä mä mräkätre raba nuainne mäbätä (Mateo 10:36, 37). Mä kötaidre o mä rüe rakadrekä, aune mä raba ngwentari jai: “¿Nire mika tö täte tikwe, Ngöbö o ni ja erebe tibe?”. Töbike kukwe nebätä: ñan mrö kweta niedre mäi, ¿mäkwe nuaindrea? Ni ñaka raba nuainne jire chi. Ni tädre nire gäre nikwe mrödre. Ye erere, Ngöbö raba mä mike nüne kärekäre. Ye medenbätä, mäkwe ja tötika jankunu ño mä raba ja mäke Ngöböbe bätä mäkwe ñaka ja tuametre di nekä ni madai (Juan 17:⁠3).