Kukwe ja tötikara 2

Ngöbö ye ja ketamuko bäri kwin raba nemen nikwe

Ja mäkädre Ngöböbe ye bäri kwin raba nemen bare nikrä. Ngöbö käkwe drieidi mäi ño kä juto ye raba kwen mäi bätä nüne jäme; mä dimikai kwe kukwe ngwarbe mikata täte bätä kukwe käme nuainta ye tuenmetre. Mäkwe oradi ie aune mä kukwe nuai kwe. Mä töi mikadi nüne jäme kwe bätä tö ngwen niarai (Salmo 71:5; 73:28). Kukwe tare rakaikä mäbätä angwane Ngöbö käkwe mä dimikai (Salmo 18:18). Ne madakäre, jondron kwin bianta ye erere Ngöböta ja nire käre ye driere nie (Romanos 6:​23).

Nita krötö Ngöbö ken ye aune, krötata ni ja ketamuko Ngöbökwe yebe arato. Nitre tä ja mäke Ngöböbe ye rabai ja mäke mäbe arato. Erametre, mä eteba aune mä ngwai ye kwrere rabai mäkrä. Kä rabai jutobätä Ngöbö kukwei driere mäi aune mä di mikai kwetre.

Ni ñaka ja erebe Ngöböbe. Ni törbadre ja mäkäi Ngöböbe, aune kukwe ütiäte rükadre gare nie: ja mäkädre Ngöböbe ye ñan ja ketata ni ja erebe ben ye erere. Niarakwe nünanbarera bäri krubäte nikrä arato bäri töbätä bätä dite krubäte. Niara ye aibe itibe tä ni Gobranka. Ye medenbätä, ni törba ja mäkäi ben aune, nita niara kukwei nuaka bätä tä dre kärere nie ye erere nikwe nuaindre. Ngöbö mikadre täte ye käre täi kwinkäre nikrä (Isaías 48:18).