Kukwe ja tötikara 4

Ñokänti Ngöbö raba nüke gare nie

Nikwe ñäkädre Biblia yebätä ye köböire Jehová raba nüke gare nie. Mekerabe, Ngöbö käkwe ni ruäre dianinkä niara töi ye tikadre kwetre gäre. Kukwe tikani ye ie Biblia nieta. Kä nengwane ñäkädre Biblia yebätä ye köböire Ngöbö raba nüke gare nie. Jehová kukwei tä tikanibätä, ye medenbätä kädekata Ngöbö Kukwei arato. Dre nieta Biblia yebätä ye nikwe mikadre era jai ñan ñobätä aune Jehová ñaka ni ngökö jire. “Ngöbö abko ñan raba ni ngökö jire chi”. (Hebreos 6:​18, Kukwe Kuin Ngöbökwe.) Ne erere, Kukwe Ngöbökwe yebätä kukwe erametre tä tikani (Juan 17:17).

Jondron bäri ütiäte Ngöbökwe biani nie ye ngätäite Biblia yeta. Monso tare rünkwe tä tärä tike ie ye kwrere. Ngöbökwe Kä ne kwitai kwin krubäte nünankäre ne gärätä kä bä nuäre. Ngöbökwe dre nuainbare mekerabe, bätä dre nuainta kä nengwane kwe bätä dre nuaindi kwe kä ja känenkäre yete nitre tä mike metre täte yekrä ye tä niere nie. Arato tä ni dimike kukwe nikwe ye ükatekäre jakrä ne kwe kä juto ye kwandre nie (2 Timoteo 3:​16, 17).

Nitre testiko Jehovakwe ye tä ja mäke Ngöböbe; mä dimikai kwetre ne kwe dre drieta Bibliakwe ye rükadre gare mäi. Mä törba ja tötikai Biblia yebätä aune mäkwe nie ietre. Ñaka ütiä käräi kwe driekäre mäi (Mateo 10:8). Ne mada, mä raba niken nitre nänkä Kristo jiebiti kätä gätäre yekänti. Kä Ngöbö mikakäre täte kädekata Ju ja Ükarakrö ye känti gätä ne sribeta. Mä ja ükaikrö gätä nekänti, aune kukwe gare Ngöbö yebätä mäi ye ririai bäri jötrö ngwarbe.

Jondron dätebare Ngöbökwe yebätä töbikadre aune niara raba nüke gare nie arato. Ani bämike. Biblia kätä niere: “Ngöbökwe kä kwinta bätä kä tibienta ye sribebare” (Génesis 1:​1). Jehová käkwe “ka kwinta” sribebare, ye angwane Ñänä sribebare kwe arato. Ne gänti, ¿neta dre driere Ngöbö yebätä nie? Tä mike gare Jehová ye die krubäte. Niara aibe käkwe jondron dite krubäte Ñänä kwrere sribebare. Tä mike gare arato Jehová ye töbätä, ne ñan ñobätä ni rabadre töbätä Ñänä sribekäre, kämikakäre ngire nibätä arato tä ñotrare nie, trä ñaka nötöte jire chi.

Jondron sribebare Jehovakwe yeta mike gare nie ni tare kwe. Töbike kri ngwäkä bätäkä tä Käbiti tibien yebätä. Jehová törbadre akrä kri ngwäkä keteitibe biandre kwe nie o ñaka biandre kwe nie. Akwa, kri ngwäkä bätäkä ngwarbe krikri, kiare bätä bänä jene jene ye jökrä biani kwe nie. Ne kätä bämike tuare nie ni tare Jehovakwe, arato niara ye mantiame bätä töi kwin nikrä (Salmo 104:24).