Kukwe ja tötikara 7
Kukwe nakaninkä kirabe yebiti ni mikata mokre
Jehovakwe ñaka ni käme ye tuainmetre Kä Bä nuäre ye juen ngwarbe. Nitre ja mäke Ngöböbe yebe käkwe nünandi Kä Bä nuäre yete. ¿Dre rabai bare nitre käme yebätä? Kukwe ne mikakäre gare jai, kukwe metre namani bare kirabe Noebätä ye ani mike ñärärä. Noé käkwe nünanbare kirabe. Niara ye töi nämene kwin ye medenbätä kärera niera tö nämene ja di tätebiti Jehová ye mikabätä täte. Akwa nitre mräkä nünanka Käbiti tibien ye abokän nämene ja sriberetre käme. Ye medenbätä, Jehová käkwe niebare Noé ie niara jatadi ñü kri ngwena nitre jökrä käme ye gatekäre. Arato arka sribedre Noekwe niebare kwe ie, ne kwe niara bätä mräkätre kwe ye ñaka gatadre Ñü Kri jatadre ye ngwane (Génesis 6 :9 -18).
Noé bätä mräkä kwe käkwe arka sribebare. Ñü Kri jatai Noé käkwe mikani gare nitre mräkä yei, akwa ñaka kukwe nuabare kwetre. Namanintre jankunu ja ngwen käme. Arka ye namani bare täte Noé ie aune, jondron jökrä nire kitani te kwe, biti mada niara bätä mräkätre kwe nikani gwä arato. Ye bitikäre, Jehová käkwe ñü kri mikani näkäin tibien murie ribi ben. Ñü räkänbare köbö gre ketebu dibire rare, aune Kä nikani jökrä ñöte (Génesis 7:7-12).
Nitre käme ye ganinte jökrä, akwa Noé bätä mräkä kwe aibe namaninte nire. Jehová käkwe kriemikani Ñü Kri ye näire, biti jänikani Kä kwin te kwe känti kukwe käme ñaka namanina (Génesis 7:22, 23). Biblia kätä niere bobukäreta kä rükaita näre angwane, nire ñaka kukwe erametre nuainne abokän Jehová käkwe gaite. Nitre töi kwin ye ñaka gaite. Nünain kärekäre kwetre Kä tibien kwitani Bä nuäre yete (2 Pedro 2:5, 6, 9).
Kä nengwane, ni kwati kätä kukwe käme nuainne. Kukwe tare nibi nakainkä krubäte kä nebätä. Jehová kätä Testiko kwe juen bati bobu dirire ni mada mikakäre mokre, akwa ni kwati ñaka tö Jehová ye kukwei nuabätä. Ñaka tönibi ja töi kwitai, dre kwin bätä dre käme Ngöböta niere ye ñaka tö kain ngäbiti. ¿Dre rabai bare nitre nebätä? ¿Ja töi kwitai kwetre? Nitre kwati käkwe ñaka ja töi kwitai jire chi. Köbö nibira ja ken näire ni käme ye gaite kärekäre (Salmo 92:7).
Kä tibien ye ñaka juain ngwarbe; sribei bä nuäre. Nitre käkwe ja ketai Ngöböbe yebe käkwe nünandi kärekäre Kä Bä nuäre yete Kä tibienbätä (Salmo 37:29).