Kukwe ja tötikara 6

¡Kä Bä nuäre ye nibira ja ken!

Jondron käme nibi nakainkä Käbiti tibien yeta bämike Kä Bä nuäre ye nibira ja ken. Kä Bä nuäre ye jatai nüke ja ken aune, ye känenkri nikwe nünandi kukwe tare krubäte te Biblia käkwe niebare. Kä nengware ni nibira nüne kä ye kwrere te. Jondron ruäre rabai bare Biblia käkwe niebare abokän kädekateta krörö:

Rü krikri. “Ñobta ñan angwane juta kwatirekwatire rabadi rüre jabe kwärikwäri amne nitre nünanka kä ketareketare te rabadi rüre jabe kwärikwäri.” (Mateo 24:​7, Kukwe Kuin Ngöbökwe.) Kukwe niebare ne abokän namanina bare. Kä 1914 ye angware rü krikri nakaninkä bobu kä jökräbiti bätä rü kia kabre nakaninkä jatäri. Ni kwati krubäte ngatanina rü yete.

Bren rakaikä käbiti tibien. “Bren nika rabadi krübäte kä ngrabare temen” (Lucas 21:​11, Kukwe Kuin Ngöbökwe). ¿Kukwe niebare ne namanina bare? Jän. Bren kädekata kanser, bren ni brukwäbätä, müra tare, malaria, sida bätä bren kabre ne käkwe ni kwati krubäte kämikanina.

Ni gota ñan rabai. Kä jökräbiti tibien ni ruäre gota nibi braibe kwetadre. Kä kwatire kwatire te ni kwati krubäte tä krüte mrö kisete. Kukwe mada ne kätä mike gare Kä Bä nuäre nibira ja ken. Biblia kätä niere: “Ni kwati rabadi mrö nike krübäte arato” (Marcos 13:​8, Kukwe Kuin Ngöbökwe).

Dobo kri. “Dobo rabadi nakaenkä kä ketareketare temen kwäräkwärä.” (Mateo 24:​7, Kukwe Kuin Ngöbökwe.) Ne arato namanina bare ni näire. Kä 1914 nükebe ni näire ni kwati krubäte krütanina dobo kri ye köböire.

Nitre käme. Nitre töi rabadi “ngwian tarere bäri” bätä “rabadi ja tarere kaibe au”. Nitre “tö rabadi kä ngwen nuäre jabtä, akwa Ngöbö taredi ñakare kwetre”. Monsotre käkwe “rün btä meye ñan kukwei mikadi täte kwetre” (2 Timoteo 3:​1-5, Kukwe Kuin Ngöbökwe). Kä nengware ni kwati nibira ja sribere ne erere, ¿ñan ererea? Ngöbö ñaka ütiäte kräketre bätä kukwe käme nuainne ni rüere ne kwe nire tö ja tötikai Ngöböbätä ñaka rabadre nuainne.

Kukwe blo. Arato “ni kwati rabadi kukwe nuene kämekäme krübäte” (Mateo 24:​12, Kukwe Kuin Ngöbökwe). Kukwe blo ye kite nirien bäri jankunu mentokwäre kä mrä nete raba tuin nie. Kä jökräbiti ni goi raba, ni ngöka raba o ni nuain raba tare.

Kukwe jökrä ne kätä bämike Gobran Ngöbökwe nibira ja ken. Biblia kätä niere: “Kukwe [. . .] ye jata nakenkä jökrä mun okwäbti angwane, Ngöbö kebera nüke gobrane ye rabara gare munye” (Lucas 21:​31, Kukwe Kuin Ngöbökwe). Akwa ¿dre abokän Gobran Ngöbökwe? Ye abokän gobran Ngöbökwe kä kwinbätä meden käkwe Kä tibien ne sribei bä nuäre. Gobrantre Kä tibienbätä ye jökrä täte gobrandi kwe (Daniel 2:​44).