Kukwe ja tötikara 8

¿Nire nire tä Ngöbö rüere?

Ngöbö rüe bäri kri ye abokän Satana Diablu. Niara ye ni nire üaire abokän nikwitani Jehová rüere. Satana tä ja di ngwen jankunu Ngöbö rüere bätä nibi kukwe tare krubäte nuainne ni jökräbätä. Satana ye ni käme krubäte, ni ngökö bätä tö ni kämikabätä (Juan 8:​44).

Nitre mada üaire arato käkwe ja ketabare Satana yebe Ngöbö rüere. Biblia kätä kädeke chokalitre. Satana ye erere arato, chokalitre ye tä nitre kä nebätä ye rüere. Töta nemen kukwe tare nuain nitre yebätä (Mateo 9:​32, 33; 12:22). Jehová käkwe Satana bätä chokalitre ye gaite kärekäre. Kä nibira braibe krubäte käne kukwe tare nuainkäre nitre kä nebätä ie (Revelación 12:12).

Ni tö ja mäkäi Ngöböbe aune, Satana tö dre nuainmana nie ye nikwe ñaka nuaindre. Satana bätä chokalitre ye brukwä Jehová yekrä. Tätre ja rüere Ngöböbe ye erere arato nikwe nuaindre ie tö. Ye medenbätä, nikwe töbikadre nirebätä nikwe kä mikai juto: Satana o Jehová. Ni tö nünain kärekäre aune, nikwe ja töi mikadre Ngöbö kukwei erere nuainne. Satana yei ni ngöka gare kukwe keta kabrebiti bätä kö okwä käbrebiti tä nuainne. Ye köböire tä ni jökrä bäsi ngökö (Revelación 12:⁠9).

Kukwe ja tötikara 9

¿Nire nire tä ja mäke Ngöböbe?

Jesukristo ye Jehová Monsoi aune ja ketamuko bäri ja ken kwe bätä tare kwe. Jesús jämi nüke nüne Kä tibien nebätä ni ne erere, ye känenkri nünanbare kwe kä kwinbiti ni üaire dite krubäte ye erere (Juan 17:5). Biti jatani Kä tibien nebatä kukwe erametre Ngöböbätä ye driekäre ni jökrä ie (Juan 18:37). Ne mada, ja nire ye biani kwe ni ja mikaka täte ye diantarikäre ja mika ngite bätä gata ye kisete (Romanos 6:​23). Kä nengwane Jesús yeta Reire Gobran Ngöbökwe yete, gobran kä kwinbiti ye abokän käkwe Kä tibien ne sribei bä nuäre (Revelación 19:16).

Angeletre ye ja ketamuko Ngöbökwe arato. Kenanbe angeletre käkwe ñaka nünanbare ni ne erere Kä tibienbätä. Ngöbö jämi Kä tibien ne sribere, känenkri niaratre sribebare kä kwinbiti (Job 38:​4-7). Angeletre ye kwati krubäte (Daniel 7:​10). Nitre ja ketamuko Ngöbökwe kä kwinbiti ne tö ni jökrä tuai ja tötike kukwe erametre Jehovakwe yebätä (Revelación 14:​6, 7).

Ja ketamuko tärä Ngöbökwe Kä tibien nebätä arato; tä kädeke testiko kwe. Ni jäntä niken testikore nitre kukwe ükatekä ye ngwärekri angwane, kukwe ño aune dre dre gare ni yei ni madabätä o jondron ruärebätä ye erere nieta kwe. Nitre testiko Jehovakwe ye tätre blite Jehová yebätä bätä Niara tö dre nuain ye tätre niere ni madai (Isaías 43:10). Angeletre ye erere arato, nitre Testiko ye tö mä dimikai ja tötike kukwe erametre Jehovakwe yebätä. Niaratre tö mä tuai ja mäke Ngöböbe arato.

Kukwe ja tötikara 10

Ñokänti Ngöbö kukwei erametre ye raba kwen nie

Ni tö ja mäkäi Ngöböbe aune, kukwe erametre Ngöbökrä ye erere nikwe nuaindre. Jesukwe niebare “nitre Ngöbö mikaka metre täte” ye käkwe Ngöbö mikai täte kukwe “metre” ye ererebätä (Juan 4:​23, 24). Kukwe metre kwatibe aibebiti ni raba Ngöbö mike täte (Efesios 4:​4-6). Ngöbö kukwei metre yeta niken ni ngwena nünankäre kärekäre, aune kukwe ngwarbe drieta ye abokän kätä niken ni ngwena gata kokwäre (Mateo 7:​13, 14).

Nitre Ngöbö mikaka metre täte ye nikwe mikadretari ñärärä ye köböire Ngöbö kukwei meden erametre ye raba nüke gare nie. Jehová töi kwin, ye medenbätä nitre niara mikaka erametre täte, ye käkwe ja ngwandre kwin arato. Naran krie kwin aune ngwätä nemen kwin, ye erere Ngöbö kukwei erametre tä nitre töimike kwin arato (Mateo 7:​15-​20).

Nitre ja ketamuko Jehovakwe yekrä Biblia ye ütiäte krubäte. Biblia ye kite Ngöbökri ye gare ietre. Ye medenbätä, tätre ja jie ngwamana ie, arabebiti tätre kukwe ükatemana jakrä bätä tä dimike Ngöbö mike nüke gare bäri kwin jai (2 Timoteo 3:​16). Ne mada, kukwe drieta kwetre ye ererebätä tätre ja di ngwen nuainne arato.

Nitre ja ketamuko Jehovakwe yekwe ja tare kwärikwäri. Nitre mada ye nämene tare Jesukwe bämikani kwe kukwe driebare Ngöböbätä kwe ietre bätä nitre bren ye mikaninta kwin kwe. Nitre Ngöbö kukwei metre nuainkä ye kätä ni mada ye tarere arato. Jesús erere, nitre bobre aune nitre kwata bä jene o kukwe bä jene ye ñaka tuin ngwarbe ietre. Jesukwe niebare nire ja tötikaka ben ye rükai gare ni jökrä ie ja taredi kwetre kwärikwäri yebätä (Juan 13:35).

Nitre ja ketamuko Ngöbökwe yeta Niara kä ye mike ütiäte kri jai: Jehová. Ni ruäre ñaka törba ni kädekaite ni kä nikwe yebiti, ¿raba nemen ja ketamuko tare krubäte nikwe? Ñakare. Ja ketamuko tärä nikwe ye aune nita kädeke kä kwe yebiti bätä nita kädriere kwin ni madabe. Ye medenbätä, nire törba ja mäkäi Ngöböbe aune käkwe kä Kwe kädekadrete bätä kädriedre ni madabe. Jehová tö nuainmana ne erere nie (Mateo 6:9; Romanos 10:13, 14).

Jesús erere, nitre ja ketamuko Ngöbökwe ye kätä Gobran Ngöbökwe ye driere ni mada ie. Gobran Ngöbökwe ye abokän gobran kä kwinbiti meden käkwe Kä tibien ne ükaite bä nuäre. Kukwe kwin Gobran Ngöbökwe yebätä ye nitre ja ketamuko Ngöbökwe kätä mike gare ni madai (Mateo 24:14).

Nitre testiko Jehovakwe tätre ja di ngwen ja mäke Ngöböbe. Biblia ye tätre mike ütiäte jai bätä tätre ja tarere kwärikwäri. Arato tätre Ngöbö kädekete aune tätre niara ye kä mike ütiäte kri jai bätä tätre kukwe Gobran Ngöbökwe yebätä ye driere ni mada ie. Nitre testiko Jehovakwe tätre Ngöbö kukwei erametre ye nuainne kä nengwane Käbiti tibien.