Kukwe ja tötikara 13

Kukwe sukiare ye käme

Satana tö ni tuai kukwe sukiare ye nuainne. Nitre kwati tätre jondron nire kämike kukwadre mräkätre krütanina kirabe yekrä o nitre üaire yei ne kwe ñaka nuaindre tare kwetre medenkäre. Nitre üaire ye raba nuainne tare ye abokän jürätä nemen bätätre medenbätä tätre kukwe ye nuainne. Nitre ne tätre sortia bätä jondron kitara ja küdebatä ye ngwen jabätä ja kriemikara. Tätre “kräkä” ñain o tätre ja bäsököbiti ngrabare ne ñan ñobätä tätre nütüre yebiti tö dre dre ie ye rabai kwe. Nitre ruäre tätre jondron üke ja gwirete o tätre doboimete ne ñan ñobätä tätre nütüre jondron ye abokän die tärä ja kriemikara. Nitre mada abokän tätre “kräkä” den jai, ne ñan ñobätä tätre nütüre kräkä ye käkwe dimikai sribi ngwian ganainkrä yebätä, ja tötikakäre bäri kwin kwelate o ja muko känänkäre.

Ja mäkädre Jehovabe ye bäri kwin ja kriemikakäre Satana yebätä. Ngöbö Jehová bätä angeletre kwe ye bäri dite krubäte Satana bätä chokalitre yekrä (Santiago 2:​19; Revelación 12:9). Jehová tö ja die ye mikai tuadre nitre ja ketamuko kwe ye ütiäre, nitre kätä niara mike erametre täte yekrä (2 Crónicas 16:⁠9).

Kukwe Ngöbökwe kätä niere: “Kukwe sukiare ye munkwe ñaka nuaindre”. Kukwe sukiare ye Jehová kätä ñäkäire, ne ñan ñobätä angwane kukwe nuainta ne raba ni mike metre Satana Diablu ye kisete (Levítico 19:26).