Kukwe ja tötikara 11
Kukwe ngwarbe drieta Ngöböbätä ye nikwe ñaka kadre ngäbiti
Satana bätä chokalitre ye ñaka tö ni tuai Ngöbö mike täte. Tötre ni jökrä diainkä mento Ngöböbätä. ¿Tä nuainne ño? Kukwe keteiti biti tä nuainne ye abokän kukwe ngwarbe drieta Ngöböbätä yebiti tätre nuainne (2 Corintios 11:13-15). Kukwe metre Bibliabätä erere drie ñakare ye aune kukwe ye ngwarbe. Kukwe ngwarbe drieta Ngöböbätä ye abokän ngwian ngwarbe ye kwrere: raba tuin erametre akwa ñakare ütiäte. Ne mada, raba kite kukwe tare kri krubäte ngwena nikrä.
Kukwe ngwarbe drieta ye ñaka nemen debe jire chi Jehovakrä, niara ye Ngöbö kukwe metre niekä. Jesús nämene Kä tibien nebätä ye ngwane, nitre kukwe driekä Ngöböbätä niara näire ye tö namani niara kämikai. Nitre ne abokän nämenentre nütüre Ngöbö mika nämene metre täte kwetre. Nämenentre niere: “Nun rün abko itibe abko Ngöbö”. Akwa, ¿ye namani debe Jesukrä? Ñakare. Niara käkwe niebare ietre: “Mun rün era metre munkwe abko diablu amne niara tä mun bkäne” (Juan 8:41, 44, Kukwe Kuin Ngöbökwe). Kä ne näire, nitre kwati tätre nütüre Ngöbö mikata täte kwetre, akwa metrere tätre Satana bätä chokalitre ye mike täte (1 Corintios 10:20).
Kri käme ngwä nemenkä käme ye kwrere, nitre kukwe ngwarbe driekä Ngöböbätä ye kätä nitre töimike kukwe käme nuainne. Kä jökräbiti tibien kukwe krubäte nemen bare jondron käme nuainta nitrekwe yebätä. Ja mikata gure ngwarbe, ja metata, gota, kukwe tare nuainta ni madabätä, ni kämikata bätä küdreta nibätä. Nitre kwati jondron käme ne nuainkä abokän tärä kukwebätä, akwa kukwe kwetre ye ñaka töimike jondron kwin ye nuainne. Ñaka jondron käme ye tuenmetre ye angwane ñaka raba ja mäketre Ngöböbe (Mateo 7:17, 18).
Nitre kukwe ngwarbe driekä Ngöböbätä ye kätä driere nikwe oradre jondron üai mikani ngöböre yei. Ngöbö kätä niere nie nikwe ñaka oradre jondron üai ngwarbe yei. Kukwe ne abokän metre kore. ¿Ni mada ye ñaka blite nibe akwa tädre blite ni üai yebe ye raba nemen debe nikrä? ¿Ni ye raba nemen ja ketamuko nikwe? Ñakare, ñaka raba. Jehová tö ni tuai blite jabe, ñan jondron ngwarbe üai sribebare abokän ñaka nire yei (Éxodo 20:4, 5).
Rü ye näire ni raba ni mada kämike drieta nitre kukwe ngwarbe driekä Ngöböbätä ye käkwe. Jesukwe niebare ni ja ketamuko Ngöbökwe ye käkwe ja taredi kwärikwäri. Nitre mada tare nikwe ye ni ñakare kämike (Juan 13:35). Nitre mada töi käme akwa ni ñaka raba kämike jire chi arato. Jesús rüetre janamene niara den ngite ye ngwane, niarakwe ñaka nitre ja tötikaka ben ye tuaninmetre ja di nuin bentre ja kriemikara (Mateo 26:51, 52).
Nitre käme ye käkwe ja tare nikai kä ñukwäre te drieta nitre kukwe ngwarbe driekä Ngöböbätä ye käkwe. Akwa, Biblia kätä driere ja mike ngite yeta niken ni ngwena gata kokwäre (Romanos 6:23). Jehová ye Ngöbö ni tarekä. ¿Ngöbö ni tarekä ye raba ni ngwen ja tarenike kärekäre? Ye erere ñaka raba nuainne. Kä Bä nuäre yete Ngöbö kukwei kwatibe rabai, ye abokän kukwe debe Jehovakrä (Revelación 15:4). Satana ye ni ngökö bätä kukwe jökrä mräkä kätä näin kukwe ngwarbe kwe ye jiebiti ye ñaka rabaira.