Kukwe kira 8

Ni krikri nämene Kä tibienbätä

NI KRI krubäte dokwä mate ju dokwäte jatadre mä kokwäre aune, ¿drebätä mäkwe töbikadre? ¡Ni kri krubäte yebätä! Kirabe nitre ye erere nämene Kä tibienbätä. Biblia kätä mike gare nitre ye angeletre kä kwinbiti monsoi. Akwa, ¿ñokänti ye namani bare?

Ngwen törö jai, Satana ángel töi käme nämene kukwe käme mike nemen bare. Niara tö namani angeletre Ngöbökwe töimikai käme arato. Ye bitikäre angeletre ruäre käkwe Satana mikani täte. Ngöbökwe sribi biani ietre kä kwinbiti ye tuanimetre kwetre. Jatani Kä tibienbätä aune ja sribebare kwetre ni erere. ¿Ñobätä gare mäi?

Biblia kätä niere: meritre bä nuäre nämene Kä tibienbätä tuani kwetre aune tö namani nünain bentre. Ye medenbätä jatani Kä tibienbätä aune ja mikani gure kwetre meritre yebe. Niaratre käkwe kukwe käme nuainbare, ñan ñobätä aune Ngöbökwe angeletre ye sribebare nünankrä kä kwinbiti nieta Bibliakwe.

Angeletre muko ye monsoi namani angwane, ñaka namani monso kia kä nebätä ye erere. Kena ñaka namani tuin bä jene. Akwa biti niaratre jatani nirien aune namani bäri dite aune krikri krubäte.

Nitre krikri ye töi namani käme krubäte. Aune namani krikri bätä dite krubäte, yebätä namani kukwe tare nuainne ni madabätä. Aune niaratre tö namani ja dibiti nitre jökrä töimikai käme ja erere.

Enoc krütani akwa ni mada töi kwin nämene iti Kä tibienbätä. Ni ye kädeka nämene Noé. Ngöbö tö nämene dre nuainmana ie ye erere nämene nuainne käre.

Ngöbökwe nitre käme jökrä gaite ye käi nükanina niebare Kwe Noé ie. Akwa Ngöbökwe Noé, mräkä kwe bätä jondron nire kwati mikai kwäre niebare kwe ie. Nuainbare ño kwe ani mike gare jai.

Génesis 6:1-8; Judas 6.

Kukwe kira 9

Noé arka sribebare

NOÉ muko nämene iti bätä monsoi nimä. Monsoi kädeka nämene Sem, Cam bätä Jafet. Monsoi ye jökrä muko nämene iti. Noé mräkätre nämene ni kwä.

Ngöbökwe Noé mikani jondron ñan tuabare sribere. Arka kri sribedre kwe niebare ie Ngöbökwe. Arka abokän ru kri bätä kaja kri aune ga ye kwrere. ‘Mäkwe sribe ketamä jabiti’, aune ‘mäkwe ñäkäbiti’ niebare Ngöbökwe. Kwarto ye Noé, mräkätre kwe, aune jondron nire bätä jondron kwetadre ye jökrä kräke.

Noé arka sribedre aune ñö ñaka rikadre te niebare ie Ngöbökwe. Niebare kwe: ‘Tikwe ñü kri mikai näkäin tibien jondron jökrä gatekäre. Nire ñaka täi arka yete krütai.’

Noé aune monsotre kwe käkwe Ngöbö mikani täte aune namani arka sribire. Akwa nitre mada namani kötaire. Namanintre ja ngwen käme jankunu. Ngöbökwe dre nuaindi niebare Noekwe ye nitre käkwe ñaka mikani täte.

Arka kri krubäte, yebätä ñaka namani bare jötrö ngwarbe. Noekwe jondron nire juandre arkate, jondron nire jene jene juandre krobu krobu kwe, nidan aune möre, niebare ie Ngöbökwe. Akwa jondron nire mada abokän juandre kwe krä kükü niebare ie Ngöbökwe. Noé käkwe nukwä bätäkä ngwarbe juandre arato niebare kwe ie. Ngöbökwe kukwe niebare ye erere Noé käkwe nuainbare.

Biti, Noé bätä mräkätre nikani arkate arato. Ye ngwane Ngöbökwe jukwe dikani. Noé bätä mräkätre nämene käteri köbö ye ngübare. Ja töimike yete köbö ye ngübare. ¿Ñü kri räkäin tibien niebare Ngöbökwe ye erere rabai bare?

Génesis 6:9-22; 7:1-9.