Kukwe kira 14

Tödeka Abrahankwe nuaninte

ABRAHÁN tä dre nuainne, ¿mä raba mike ñärärä? Cuchillo tä kisete, bike monsoi kämike. ¿Ñobätä? Ñokänti Abrahán bätä Sara monsoi namani ani mike gare käne jai.

Niaratre monsoi rabai niebare Ngöbökwe ie. Akwa Abrahán bätä Sara namanina umbre krubäte, yebätä ñan rabai bare namani ruin ietre. Akwa Ngöbö raba nuainne ye namani gare kwin Abrahán ie. Ye medenbätä, ¿dre namani bare?

Ngöbökwe kukwe niebare ye bitikäre, kä nikani kwati ta. Abrahán yebiti kä namani 100 aune Sara yebiti kä namani 90, angwane monsoi namani iti kädekani Isaac. ¡Ngöbökwe ja kukwei mikani nemen bare!

Akwa Isaac namanina kri ye ngwane, Jehovakwe tödeka Abrahankwe nuaninte. ‘¡Abrahán!’ niebare kwe, aune Abrahán niebare ie: ‘¡Tita nete!’ Angwane Ngöbökwe niebare ie: ‘Isaac mä monsoi itibe yebe nän ngutuä driedi tikwe mäi yekänti. Yete mäkwe mä monsoi ye kämika kukwadre ti mikakäre täte.’

¡Abrahán nämene monsoi tarere, yebätä kukwe niebare ie ye käkwe mikani ulire krubäte! Monsotre Abrahankwe ye käkwe nünandi kä Canaán känti, Ngöbökwe käbämikani ie. Akwa Isaac ye kämikadre angwane, ¿ñokänti kukwe ye rabadre bare? Kukwe ye ñaka nükani gare Abrahán ie, akwa Ngöbö mikani täte kwe.

Abrahán namani ngutuäbiti angwane, Isaac kise dikani kwe aune kä ükaninte kwe jondron kukwakrä yebiti mikani kwe. Biti cuchillo diani kwe monsoi ye kämikakrä. Akwa ye ngwane ángel Ngöbökwe käkwe niebare ie: ‘¡Abrahán, Abrahán!’ Aune Abrahán käkwe niebare: ‘¡Tita nete!’

Ngöbökwe niebare, ‘mäkwe ñaka monso nuain tare’. ‘Mä monsoi itibe mäkwe ja töi miri kämike tikrä, yebätä mätä tödeke tie nibi gare tie.’

¡Abrahán nämene tödeke krubäte Ngöböi! Jondron jökrä nuäre nuaindre Jehovakrä, aune Jehová raba Isaac miketa nire ie nämene tödeke arato. Akwa Ngöbö ñaka tö namani Abrahán tuai Isaac kämike; yebätä niara käkwe obeja mikani nemenkä kri küdete aune ye kämikadre Abrahankwe Isaac täte niebare kwe ie.

Génesis 21:1-7; 22:1-18.

Kukwe kira 15

Lot muko nikrabare ja jiebiti

LOT bätä mräkä nämene nüne keteitibe Abrahanbe kä Canaán känti. Abrahán niebare Lot ie: ‘Nete kä chi krubäte jondron nire nikwe ye jökrä kräke. Ani nüne jenena. Mä näin nekri angwane ti näin sekri.’

Lot kä ye mikani ñärärä. Juta yekänti ñö bätä mikä kwin nämene jondron nire kwe yekrä, yebätä kä namani tuin kwin ie. Kä ye abokän Jordán. Yebätä, Lot nikani mräkä kwe bätä jondron nire ye ngwena kä yekänti. Mrä mada ju sribebare kwe juta Sodoma känti.

Nitre Sodoma nämene ja ngwen käme krubäte. Lot töi kwin yebätä kukwe ye ñaka nämene tuin kwin ie. Ñaka namani kwin Ngöbökrä. Mrä mada, nitre Sodoma bätä juta Gomorra nämene ja ngwen käme ye gaite Ngöbökwe niebare kwe, yebätä ángel nibu juani kwe mike gare Lot ie.

Angeletre käkwe niebare Lot ie: ‘¡Jötrö ngwarbe! ¡Mä muko bätä monso nibu mäkwe yebe kä mikekä nete!’ Lot bätä mräkä kwe ye namani ngrötöte, yebätä angeletre käkwe kani kisebiti aune dianinkä kwe juta yekänti. Angwane ángel iti käkwe niebare: ‘¡Betekä ne kwe mun ñaka krütadre! Mun ñaka nikra ja jiebiti. Mun rika betekä ngutuäbätä ne kwe mun ñaka krütadre.’

Lot bätä ngängän ye ngitiani niebare ietre erere. Ñaka nünankabare jire kwetre bätä ñaka nikrabare ja jiebiti kwetre. Akwa Lot muko käkwe ñaka ye nuainbare. Nikani mento juta Sodoma yebätä ngwane, nikrabare ja jiebiti kwe. Ye ngwane Lot muko nikwitani mren jäire. ¿Bä mikani nete ye mä raba mike ñärärä?

Kukwe nebiti kukwe ütiäte ja tökrä drieta nie: nire tä Ngöbö mike täte ye mikata kwäre kwe, akwa nire ñaka niara mike täte ye abokän tä krüte.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.