Kukwe kira 16

Isaac muko kwin känänbare

¿MERI bämikani nete ne gare mäi? Kädekata Rebeca. Ni brare kokwäre niarata näin ye Isaac. Niara rabai Isaac muko. ¿Ne namani bare ño?

Abrahán tö namani muko kwin ie monsoi Isaac yekrä. Ñaka tö namani Isaac tuai ja mike gure meri kä Canaán känti ben, ñan ñobätä aune nitre ye nämene ngöbö ngwarbe mike täte. Yebätä Abrahankwe ni sribikä kräke käräbare aune niebare kwe ie: ‘Kä Harán känti ti mräkätre tä nüne yete mä rika Isaac monso tikwe muko känene.’

Jötrö ngwarbe ni sribikä Abrahán kräke käkwe camello diani krä jätä, biti nikani kä mente yekänti. Abrahán mräkätre nämene nüne ye ken namani angwane, namani nünaninkä ñö okwä ken. Kä namanina bäsi drüne angwane, meritre juta yekänti nikani ñö den ñö okwä yekänti. Yebätä ni sribikä Abrahán kräke käkwe niebare orasionte Jehová ie: ‘Meri käkwe ñö biain tie bätä camello ie ye mäkwe dianka Isaac mukore.’

Jötrö ngwarbe Rebeca nükani ñö den. Ni sribikä ye käkwe ñö käräbare ie ñadre angwane, niarakwe ñö biani ie. Biti ñö diani ere kwe camello jökrä kräke. Camello ñö ñain ere yebätä, niarakwe sribibare krubäte.

Rebeca ie sribi krütani angwane, ni sribikä Abrahán kräke käkwe rün kä ngwanintari ie. Arato niara raba ja düke niaratre gwirete ye abokän ngwanintari kwe ie. Niarakwe niebare: ‘Ti rün kä Betuel, aune kä tärä mäkrä ja dükara.’ Betuel ye Nacor monsoi aune Abrahán eteba, ye nämene gare ni sribikä Abrahán kräke ie. Yebätä namani ngüdokwäre aune debe biani kwe Jehová ie, namani Abrahán mräkä känti yebätä.

Ye näire deu ni sribikä Abrahán kräke käkwe niebare Betuel bätä Labán, Rebeca ngwai ie, ñobätä niara nikani känti. Nibu käkwe niebare, Rebeca raba niken niara ben aune ja mikadre gure kwe Isaac ben. Ngwanintari Rebeca ie ye ngwane, ¿dre niebare kwe? Jän niebare kwe, tö namani näin. Yebätä, jädrinaine nikanintre camello yebiti kä Canaán känti.

Kä namanina drüne angwane namaninta. Ni jutuabre iti näin jubäre Rebeca ie. Ye abokän Isaac. Rebeca jutuabare ie ye käi namani jutobätä. Sara niara meye krütani kä komärä, yebätä nämene ulire. Akwa Rebeca namani tare krubäte Isaac yekwe aune kä namaninta jutobätä.

Génesis 24:1-67.

Kukwe kira 17

Mukin töi ñaka ja erebe

MONSO nibu tuin mäi ye ñan ja erebe, ¿ñan ererea? ¿Kä ño gare mäi? Muntiaka ye Esaú, aune monso obeja ngübaka ye Jacob.

Isaac aune Rebeca monsoi Esaú bätä Jacob ye mukine. Esaú brai kri aune nämene kite jondron ngwena kwetadre mräkätre ie, yebätä Isaac nämene tarere. Akwa Rebeca nämene Jacob tarere bäri, töi jäme yebätä.

Ruai Abrahán ye nämene nire, aune nämene blite Jehovabätä ye käi nämene nemen juto Jacob yebätä. Kä namani 175 Abrahán yebiti angwane krütani, ye ngwane kä namanina 15 mukintre yebiti.

Kä namani 40 Esaú yebiti angwane, ja mikani gure kwe meri nibu kä Canaán känti ben. Ye käkwe Isaac bätä Rebeca mikani ulire krubäte, ñobätä ñan aune meritre ye ñaka nämene Jehová mike täte.

Yebiti kukwe namani bare abokän käkwe Esaú mikani rubun krubäte Jacob eteba kwe yekrä. Kä nükani Isaac ie kukwe kwin niekäre monsoi umbre yekrä. Ñan ñobätä aune Esaú ye abokän umbre Jacob yekrä, yebätä niara tö namani kukwe ye niemana jai. Akwa jondron rünkwe rabadre kwe ye rürübäinbare kwe Jacob ie. Arato, monso nibu ye däredre känenkri Ngöbökwe niebare jondron kwin ye rabai Jacob yekwe. Ye erere namani bare. Isaac käkwe jondron kwin ye biani monsoi Jacob ie.

Kukwe ye namani gare Esaú ie angwane, namani rubun Jacob kräke. Namani rubun krubäte yebätä Jacob mürie ketai kwe niebare kwe. Kukwe ne namani gare Rebeca ie angwane, namani töbike krubäte. Yebätä niebare kwe Isaac muko kwe ye ie: ‘Jacob käkwe ja mikai gure meri Canaán ben angwane, ye käkwe ti mikai bäri ulire krubäte.’

Yebätä Isaac käkwe monsoi Jacob käräbare aune niebare kwe ie: ‘Mäkwe ñaka ja mika gure meri Canaán yebe. Ñakare aune mä rika Harán mä ruai Betuel yekänti. Aune mäkwe ja mika gure niara monsoi Labán ngängän yebe.’

Jacob käkwe rün mikani täte, aune nikani Harán mräkätre nämene nüne yekänti.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.