Kukwe kira 25

José mräkätre nikani Egipto

KÄ ÑAKA nükani José ie. Nitre sribikä ye jökrä juani jubäre kwe. José namani kaibe etebatre yebe angwane, ngetrakabare kwe. Ñobätä namani ngetrekä ye ñaka nükani gare etebatre ye ie. Biti niebare kwe: ‘Ti abokän José. ¿Ti rün tä nire?’

Etebatre nikaninkä krubäte aune kukwe ñaka namani ngitiekä. Kä jürä namani niaratre yebätä. Akwa Josekwe niebare: ‘Mun raba krötö ti ken.’ Nuainbare kwetre angwane, niebare kwe: ‘Ti abokän José mun eteba, abokän munkwe rürübäinbare nitre Egipto ie.’

José käkwe blitabare töi jämebiti: ‘Munkwe ti rürübäinbare nete yebätä, ja ñaka raba ruin ngite muen. Ngöbökwe ti juani nitre Egipto ye diantarikäre. Faraón käkwe ti mikani juta jökrä gobraine. Ye medenbätä mun nän jötrö ngwarbe ti rün känti, aune niara jatadre nüne nete munkwe nie ie.’

Josekwe kise kitani etebatre ngärä, aune demainbare kwe. José etebatre ye nükani namani gare Faraón ie angwane, niebare kwe José ie: ‘Carretas ye jänrikadre kwetre aune rün bätä mräkätre jäntädre nete kwetre. Kä bäri kwin kä Egipto känti ye tikwe biain ie.’

Ye erere nuainbare kwetre. José mike ñärärä kise kite rün ngärä, nükani Egipto mräkätre jökrä ben ye ngwane.

Jacob mräkä ririabare kwati krubäte. Jacob bätä monsoi aune bräi täte jökrä 70 nikani nüne Egipto. Niaratre muko bätä sribikä kräke nämene arato. Nitre jökrä ye namani nüne Egipto. Ngöbö käkwe Jacob kädekani Israel yebätä niaratre ye kädekani Israel. Niaratre ye namani juta ütiäte krubäte Ngöbökrä, ye nikwe mikai gare jai ja känenkäre.

Génesis 45:1-28; 46:1-27.

Kukwe kira 26

Job Ngöbö mikani täte metre

¿NI BREN ye tuin bobre mäi? Kädekata Job aune meri ye niara muko. ¿Dre nieta kwe Job ie gare mäi? ‘Ñäke tare Ngöbö rüere aune mä gata.’ Ñobätä kukwe ye niebare kwe, aune ñobätä Job käkwe ja tare nikabare krubäte ye ani mike gare jai.

Job käkwe Jehová mikani täte metre. Nämene nüne Uz, kä Canaán ye ken. Jehová nämene Job tarere krubäte, akwa ni iti abokän brukwä nämene kräke. ¿Nire gare mäi?

Satana Diablu. Satana ye ángel käme brukwä Jehovakrä. Niarakwe Adán bätä Eva mikani ñaka Jehová mike täte, niara tö namani nitre mada tuai nuainne arato. Akwa, ¿namani bare ie? Ñakare. Ni brare aune meri kwati käkwe Ngöbö mikani täte metre. ¿Nibe törö mäi?

Jacob bätä José krütani Egipto ye bitikäre, Job käkwe Jehová mikani täte bäri metre nitre Kä tibienbätä yekrä. Satana ñaka raba ni jökrä töimike käme, ye Jehová tö namani mikai gare ie. Aune niebare kwe: ‘Job mike ñärärä, niarata ti mike täte metre.’

Satana käkwe niebare, ‘mätä jondron bien ie aune jondron ere kwe, yebätä tä mä mike täte. Akwa mäkwe diainkä kän angwane ñäkäi kwe mä rüere.’

Yebätä Jehová niebare ie: ‘Nän, denkä kän. Mä törba dre käme nuain Job yebätä mäkwe nuain jökrä. Ñäkäi kwe ti rüere o ñakare ye rabai gare nie. Akwa ñaka mürie keta.’

Kena, Satana käkwe nitre mikani nibi bätä camello ye goire Job yekän, aune obeja kwe ye ngatani. Bätä monsoi brare aune merire ni jätä, ye mürie ketani mürie ditebiti kwe. Biti bren käme mikani Job yebätä kwe. Job tare nikabare krubäte. Yebätä muko kwe käkwe niebare ie: ‘Ñäke tare Ngöbö rüere aune mä gata.’ Akwa Job käkwe ñaka nuainbare. Nitre nimä ja ketaka Job yebe nükani arato, aune niara käkwe kukwe käme nuainbare namani niere ie. Akwa Job käkwe Ngöbö mikani täte metre jankunu.

Ye käi namani juto Jehovabätä, biti jondron kwin biani kwe Job ie bämikani ye erere. Mikaninta kwin kwe. Job monsoi namaninta ni jätä bä nuäre, nibi bätä obeja aune camello namani bäri ere kwe käne yekrä.

¿Job erere mä Jehová mikai täte metre käre? Mä nuaindi ngwane, Ngöbökwe jondron kwin biain mäi arato. Kä tibien jökrä sribei bä nuäre Edén erere ye ngwane, mä rabai nüne te kärekäre.

Job 1:1-22; 2:1-13; 42:10-17.