Kukwe ja tötikara 15

Nitre ja ketamuko Ngöbökwe kätä jondron kwin erere nuainne

Ja ketamuko tä nemen nikwe bätä ütiäte nikrä, ye ngwane ni töta nemen ja ngwain niara kwrere. “Jehová ye kwin bätä ja ngwen metre”, nieta Bibliakwe (Salmo 25:8). Ja ketadre Ngöböbe gäre, nikwe ja ngwandre kwin bätä metre. Biblia kätä niere: “Mun abko Ngöbö ngäbriänkä amne mun tare kri kwe, aisete munkwe ja töi mika nüne Ngöbö kwrere. Erere arato, [. . .] ye kwrere munkwe ni mda mda tare arato” (Efesios 5:​1, 2, Kukwe Kuin Ngöbökwe). Kukwe ruäre bä mikata nete ne kätä mike gare nie ñokänti ni raba ja ngwen Jehová kwrere:

Nitre mada dimikadre. “Jondron kwin ye erere nikwe nuaindre ni jökrä kräke.” (Gálatas 6:​10.)

Nikwe ja mikadre sribikä kwin. “Mun mden mden nämane gore ye käkwe ñan go mda [. . .], abkokäre munkwe sribi era metre ja kise jenbti jakrä.” (Efesios 4:​28, Kukwe Kuin Ngöbökwe.)

Ja sribedre kwin ngrabare bätä ja ngwandre kwin yebiti. “Ye abko, ni ngrabare amne ni üai abko nikwe ngibiadre deme jökrä amne, nita Ngöbö jürä ngwen jabtä, ye köböire abko ari ja töi mike kwatibe nünankäre bäri deme Ngöbökrä.” (2 Corintios 7:​1, Kukwe Kuin Ngöbökwe.)

Ni mräkätre ye taredre bätä mikadre ütiäte jai. “Mun itire itire käta ja tarere au, ye kwrere jire munkwe meri munkwe tare amne, mun merire merire abko käkwe ni brare munkwe mika ütiäte jae [. . .] mun ngäbäkrere, [. . .] munkwe mun rün btä mun meye kukwei mika täte.” (Efesios 5:⁠33–​6:​1, Kukwe Kuin Ngöbökwe.)

Ni mada mada taredre. “Nikwe ja taredre jankunu kwärikwäri, ne ñan ñobätä ja tare ye Ngöbökwe.” (1 Juan 4:7.)

Kukwe ükaninte gobrankwe ye mikabätä täte. “Nikwe nitre gobranka mikadre täte. Ye mdenbtä abko, gobran itire itire, ie dre biandre ja ütiäre, ye erere bian ie munkwe, aisete nireye rürümon ütiä biandre ño ño, ye ie ja ütiä biandre metre.” (Romanos 13:​1, 7, Kukwe Kuin Ngöbökwe.)