Kukwe kira 29

Ñobätä Moisés ngitiani

MOISÉS tä ngitie kä Egipto yebätä mike ñärärä. ¿Nitre tä näin jiebiti ye tuin mäi? ¿Ñobätä tö Moisés kämikai gare mäi? Ani mike gare jai.

Faraón rei Egipto, ye gwirete Moisés ririabare. Namani ütiäte aune töbätä kri. Moisés ye ñaka nitre Egipto mräkä nämene gare ie, ñakare aune mräkätre israelita abokän nämene klabore.

Kä namani 40 Moisés yebiti angwane, nikani juta kwe ye mike ñärärä. Mika nämene ja tarenike. Moisés käkwe ni iti Egipto tuani ni iti Israel mete. Nikrabare ja bäre kwe aune ni ñaka jutuabre ie, yebätä ni Egipto kämikani kwe. Moisekwe ni ye ngwaka ükani ümante.

Jädrinaine Moisés nikani juta kwe tuinbiti bobukäre. Tö namani juta kwe dimikai ne kwe ñaka tädre klabore. Akwa ni Israel kwani nibu ja mete ie, aune Moisekwe niebare iti nämene kukwe käme nuainne ye ie: ‘¿Ñobätä mätä mä eteba mete?’

Ni ye käkwe niebare: ‘¿Nirekwe mä mikani gobrane aune kukwe ükete nunkrä? ¿Mäkwe ni Egipto kämikani ye erere mä tönibi ti kämikai?’

Moisés nikaninkä. Niarakwe kukwe nuainbare ni Egipto yebätä ye nitre käkwe gani namani gare ie. Kukwe ye namani gare Faraón ie aune nitre juani kwe Moisés kämike. Yebätä Moisés ngitiani mento kä Egipto ye bäre.

Moisés nikani mento kä Egipto yebätä ngwane, nikani mobe kä Madián känti. Yete Jetró mräkä namani gare ie, aune ja mikani gure kwe ngängä iti Zípora ben. Kä gre ketebu te nünanbare kwe kä Madián känti. Kä namanina 80 niara yebiti. Moisés nämene obeja Jetrokwe ngübare ye ngwane, jondron ñan tuabare namani bare käkwe Moisés töi kwitani täte. Kukwe meden ye ani mike gare jai página ne kwäräkri.

Éxodo 2:11-25; Hechos 7:22-29.

Kukwe kira 30

Kri jutra ngitiekä

MOISÉS nikani kä tokwä Horeb känti mikä känene obeja kräke. Ye ngwane kri chi namani jutra ngitiekä tuani kwe, ¡akwa kri chi ye ñaka namani nukwe!

‘¡Ñaka nükani gare!’ Moisés ie. ‘Ti niki mike ñärärä bäri ken.’ Kri chi ye ken namani angwane, ni kukwe juruabare ie: ‘Mäkwe ñaka kröta bäri ken. Mätä kä deme känti yebätä Sandalia tikete ja ngotobätä.’ Ngöbökwe blitabare ángel iti köböire yebätä Moisekwe ja ngwäre kriemikani.

Ngöbökwe niebare: ‘Tita juta tikwe ye tuin ja tarenike Egipto. Tikwe mikai kwäre, tikwe mä juain mike kwäre.’ Jehovakwe ja töi mikani juta kwe ye ngwen kä bä nuäre Canaán känti.

Akwa Moisekwe niebare: ‘Ti ni ngwarbe.’ ¿Ñokänti ti raba kukwe ye nuainne? Ti rikadre aune nitre käkwe niedre tie: “¿Nirekwe mä juani?” ¿Tikwe dre niedi?’

‘Mäkwe kukwe ne niedi,’ niebare Ngöbökwe ie. ‘“JEHOVÁ Ngöbö Abrahankwe, Ngöbö Isaackwe aune Ngöbö Jacobkwe käkwe ti juani munkänti.”’ Ye bitikäre Jehovakwe niebare: ‘Ti kä ne abokän kärekäre.’

Akwa Moisekwe niebare: ‘Mäkwe ti juani tikwe niedi ietre angwane ñaka rabai era kräke ye ngwane, ¿tikwe dre nuaindi?’

‘¿Dreta mä kisete?’ ngwanintari Ngöbökwe ie.

‘Krimana,’ niebare Moisekwe

‘Kite tibien,’ niebare Ngöbökwe ie. Moisekwe nuainbare angwane, krimana ye nikwitani kulebrare. Jehovakwe jondron mada ñan tuabare mikani tuare Moisés ie. Niebare kwe: ‘Kise krien dän yete jai.’ Moisekwe nuainbare, kise dianinte kwe angwane ¡namani ngwenbrere! Ni bren lepra kisete erere bä namani. Angwane Jehová ja di biani Moisés ie jondron ketamäkäre ñan tuabare nuainkäre. Mrä niebare kwe ie: ‘Jondron ñan tuabare ne köböire tikwe mä juani rabai gare nitre Israel ie.’

Biti Moisés nikaninta ja gwirete aune niebare kwe Jetró ie: ‘Ti mräkätre tua ño ye ti tuenmetre niken mike ñärärä kä Egipto känti.’ Jetró käkwe Moisés juani aune niara nikani kä Egipto yekänti.

Éxodo 3:1-22; 4:1-20.