Kukwe ja tötikara 16

Ngöbö tare nikwe ye nikwe bämikadre

Ni törba ja ketai käre ja ketamuko nikwe yebe, ye aune ni tädre blite ben. Nita niara kukwe nuin, bätä niarata ni kukwe nuin arato. Arato nita niara kädriere kwin ni madabe. Ni tö ja mäkäi käre Ngöböbe aune, ye erere nikwe nuaindre arato. Nikwe dre nuaindre kukwe nebätä ye Biblia kätä niere ye abokän mäkwe mika ñärärä.

Oradre mantre jetebe Jehovae. “Munkwe blitadre janknu Ngöböbe.” (Romanos 12:​12, Kukwe Kuin Ngöbökwe.)

Biblia, Kukwe Ngöbökwe yebätä ñäkädre. “Ngöbö Kukwei jökrä abko Ngöbökwe mikani gare metre nitre tärä tikakaye, aisete kukwe ütiäte dirikrä amne kuin mäträkrä amne, kuin ni mda töi diankrä.” (2 Timoteo 3:​16, Kukwe Kuin Ngöbökwe.)

Ngöbö kukwei ye driedre ni madai. “Aisete mun nän, amne nitre nünanka kä jökräbti temen, ye känti mun näin ti mike gare ietre amne munkwe niaratre mika ja töitikaka siba tibe [. . .] Amne kukwe diribare tikwe munye, ye erere munkwe diri jökrä ietre amne niaratre käkwe ti kukwei ye mikadre täte jökrä arato, abkokäre munkwe diri ietre.” (Mateo 28:19, 20, Kukwe Kuin Ngöbökwe.)

Nitre ja ketamuko Ngöbökwe yebe nikwe ja ketadre. “Nire kätä näin ni töbätä ben ye rabai töbätä arato.” (Proverbios 13:20.)

Ni tädre nemen gätäbätä Ju ja Ükarakrö ye känti. “Erere arato, ari ja kite ja tarere kwärikwäri amne sribi kuin nuene jakrä kwärikwäri [. . .] ari ja die mike kwärikwäri näin gätäbtä.” (Hebreos 10:24, 25, Kukwe Kuin Ngöbökwe.)

Sribi Gobran Ngöbökwe nuainta ye nikwe dimikadre. “Ye abko, munkwe ngwian biandre nuäi nüai btä munta töbike, ye erere munkwe bian, akwa munkwe ñan biandre ja moto ulire bti amne ñan ni mdata biamna, ñobtä ñan angwane kä nuäre nibtä ngwian bien, ni ye abko Ngöböta tarere.” (2 Corintios 9:​7, Kukwe Kuin Ngöbökwe.)