Kukwe kira 40

Moisés käkwe jä metani

KÄ NIKANI... ¡10, 20, 30, 39 ta! Aune nitre Israel nämene kä ngwarbe nötare yekänti. Akwa kä jökrä yete Jehová juta kwe ngübabare. Bukani maná yete kwe. Rare nämene jie ngwen muta yebiti, aune dibire ñukwä trä yebiti. Dän ñan nikani ngwarbe kän aune ngoto ñan namani bren.

Nitre Israel kä mikaninkä Egipto ye bitikäre kä nikani gre ketebu ta, kä ye ngwane nämene kä gre ketebukäre söi kena yete. Nitre Israel nämene bobukäre kä Cades känti. Kä 40 ye känenkri, niaratre nämene yete angwane nitre ni jätä biti nibu juani kä Canaán tuinbiti. Míriam Moisés ngwai krütani Cades. Yete kukwe tare nakaninkä, käne ye erere.

Ñö ñaka namani kwen nitre ie. Namani niere Moisés ie: ‘Nun krütadre Egipto ye rabadre bäri kwin nunkrä. ¿Drekäre mä jatani nun ngwena kä nekänti? Nete jondron ñaka nirien jire. Nete kri ngwä ñaka, higo, uva, aune granada ñakare jire. Ñö ñaka ñadre jire chi.’

Moisés bätä Aarón nikani orare tabernáculo yete angwane, Jehová niebare Moisés ie: ‘Nitre ye ükökrö. Biti, jä tä yete ye ie mäkwe ñäkä nitre jökrä okwäbiti. Jä nete ñö rabai nen ere mun aune jondron nire munkwe ye jökrä kräke.’

Ye erere Moisés käkwe nitre ükaninkrö, aune niebare kwe: ‘¡Nitre ñaka tö ngwen Ngöbö ie, ti kukwe nuin! ¿Ti bätä Aarón käkwe ñö diandrekä jä nete mun kräke?’ Biti, Moisés jä ye metani bobu krimana yebiti, aune ñö namani nen ere yete. Ñö namani ere nitre bätä jondron nire jökrä kräke.

Akwa Jehová namani rubun Moisés bätä Aarón kräke. ¿Ñobätä gare mäi? Ñobätä ñan aune Moisés bätä Aarón käkwe niebare nunkwe ñö mikai nen jä nete. Akwa Jehová käkwe ye nuainbare. Moisés bätä Aarón käkwe ñaka kukwe metre niebare, yebätä Jehovakwe mikai ja ngie nuin niebare kwe ietre. Ngöbö Jehová käkwe niebare ietre. ‘Mun ñaka näin juta tikwe ngwena kä Canaán känti.’

Biti nitre Israel käkwe kä mikaninkä kä Cades känti. Namani ngutuä Hor yekänti. Ngutuä yebiti Aarón krütani. Ka namani 123 niarabiti angwane krütani. Nitre Israel namani ulire krubäte, aune sö krati Aarón muaibare kwetre. Eleazar Aarón monsoi namani ji dokwäre nitre Israel kräke.

Números 20:1-13, 22-29; Deuteronomio 29:5.

Kukwe kira 41

Kulebra cobrere

¿KULEBRA nibrani kribätä ye metre? Ñakare. Sribebare cobrere. Moisés käkwe mikadre kribätä kwin ne kwe nitre käkwe mikadre ñärärä aune tädre nire niebare ie Jehovakwe. Akwa kulebra mada tä tibien, ye abokän metre. Ye käkwe nitre kwetani aune namani bren. ¿Ñobätä gare mäi?

Nitre Israel käkwe ñäkäbare Ngöbö aune Moisés rüere yebätä. Namanintre niere: ‘¿Ñobätä mäkwe nun dianinkä kä Egipto känti, ne kwe nun gatadre kä ngwarbe nötare nekänti? Mrö aune ñö ñakare jire nete. Aune nun ñaka tö niena maná kwetai.’

Akwa maná ye mrö kwin. Jehová biani ietre. Aune ñö biani kwe ietre. Akwa Jehová käkwe nitre ngübabare yebätä niaratre ñaka debe biani ie. Yebätä Jehovakwe kulebra käme juani nitre Israel mikakäre ja ngie nuin. Kulebra ye käkwe niaratre kwetani, aune kwati krütani.

Mrä nitre käkwe niebare Moisés ie: ‘Nunkwe ja mikani ngite, ñobätä ñan aune nunkwe blitabare Jehová aune mä rüere. Orare Jehová ie ne kwe kulebra ne diandrekä kwe.’

Moisés käkwe orabare niaratre ütiäre. Moisekwe kulebra cobrere sribedre niebare ie Jehovakwe. Mikadre kribätä kwe niebare ie, ne kwe ni jökrä kwetadre kulebrakwe ye käkwe mikadre ñärärä. Ngöbökwe niebare erere Moisés nuainbare. Nitre kwetani kulebrakwe ye nikrabare kulebra cobrere yebätä aune namaninta kwin.

Kukwe nebätä ni raba ja tötike. Ni jökrä kwetata kulebrakwe nitre Israel ye erere. Ni jökrä nemen umbre, bren aune tä krüte. Ni brare bätä meri kena, käkwe Jehová tuanimetre, yebätä kukwe ne nemen bare, aune ni jökrä niaratre monsoi. Akwa Jehová kukwe ükaninte nikrä ne kwe nikwe nünandre kärekäre.

Jehová käkwe Monsoi kwe Jesukristo, juani Kä tibienbätä. Nitre kwati nämene nütüre Jesús ye töi käme, yebätä metani kribätä. Akwa Jehovakwe Jesús biani ni diantarikäre. Nikwe niara kukwei mikadre täte angwane, ja nire kärekäre ye raba nemen nikwe. Akwa biti nikwe ja tötikai bäri kukwe nebätä.

Números 21:4-9; Juan 3:14, 15.