Kukwe kira 60

Abigail bätä David

¿MERI bä nuäre tä näin David kokwäre ye gare mäi? Kä Abigail. Niara ie töbika gare kwin, aune David dimikani kwe ne kwe ñaka kukwe käme nuaindre kwe. Ni jämi ne mike gare jai känenkri, dre nämene nakainkä Davibätä ani mike gare jai.

David ngitiani Saúl ngänikaire, biti ja ükani kwe kä mäkäte. Niara etebatre bätä mräkätre nämene niken känti. Nitre 400 nikani känti, aune David namani niaratre jie ngwanka. David nikani rei Moab känti aune niebare kwe: ‘Mä raba ti rün bätä ti meye tuenmetre nüne jakänti, ne kwe dre rabai bare tibätä ye rabadre gare tie.’ Biti, David bätä nitre nänkä ben käkwe ja ükani kä dubete.

Ye bitikäre, Abigail namani gare David ie. Niara muko Nabal ye jondron bökäne krubäte aune kä ere kwe. Obeja nämene 3.000 kwe aune kabra 1.000. Nabal töi käme. Akwa muko kwe Abigail bä nuäre krubäte. Arato jondron kwin nuain gare ie. Bati mräkätre kwe mikani kwäre kwe. Nuainbare ño kwe ani mike gare jai.

David bätä nitre nänkä ben käkwe ja töi mikani kwin Nabal kräke. Obeja kwe ye kriemikani kwetre. Bati David käkwe ni juani ja di kärere Nabal ie. Nitre ye namani Nabal känti aune David bätä nitre mräkä namani obeja druen tikekä. Köbö yete Nabal nämene bieta nuainne aune jondron nämene ere kwetadre kwe. David nitre juani ye käkwe niebare: ‘Nun ja töi mikani kwin mäkrä. Nun ñaka obeja goire krati jire mäkän, akwa nunkwe mä dimikani ngübare. Mä raba mrö bien kwetadre nunye nunta kärere mäi.’

‘Nitre mun ye erere ie ti ñaka mrö biain,’ Nabal niebare. Blitabare rubune krubäte kwe, aune kukwe käme niebare kwe Davibätä. Nitre kukwe ne niebare David ie angwane, namani rubun krubäte. ‘¡Jondron rükrä ükete jabätä!’ niebare kwe ietre. Biti nikani Nabal bätä nitre nänkä ben kämike.

Nabal kukwe tare niebare, ye ni iti nänkä ben käkwe niebare Abigail ie. Bengwaire Abigail jondron kwetadre ükaninkrö, mikani kwe mula yebätä aune nikani. Namani David känti angwane, nankwani timon mula yebiti aune niebare kwe: ‘Dänkien, mä ñan ti muko kukwe töibika, tita kärere mäi. Niara töi ñaka, aune ñaka kukwe kwin nuainne. Tiki jondron ne ngwena mäkrä. Kain ngäbiti tita kärere mäi, kukwe namani bare ye mäkwe juan ta nunbiti.’

‘Mä töbätä,’ David niebare ie. ‘Mä ti töimiri ñaka Nabal kämike töi käme yebätä. Näntä töi jämebiti ja gwirete.’ Biti Nabal krütani angwane, Abigail namani David mukore.

1 Samuel 22:1-4; 25:1-43.