Kukwe kira 92

Jesús nitre krütani ganinkröta

MONSO merire tuin nete yebiti kä 12. Tä nakani kisebiti Jesús ie, aune meye bätä rün tä niara ken. ¿Ñobätä kätä juto krubäte bätätre gare mäi? Ani mike gare jai.

Monso merire ye rün kä Jairo ni ütiäte kri. Bati ngängän namani bren, aune mikani jänbiti kwe. Akwa ñaka namaninta räre; namani bäri bren. Jairo bätä muko kwe namani töbike krubäte, monso ye krütai namani tuin ietre. Niara ngängän itibe kwe. Yebätä Jairo nikani Jesús känene. Jesús nämene jondron ñan tuabare nuainne nämene gare ie.

Jesús kwani Jairo ie aune, nitre kwati nämene niara bäre ta. Akwa Jairo nikani nitre kwati ye ngätäite ta aune namani ngitianinkä Jesús ngotobätä. ‘Ti ngängän tä bren krubäte,’ niebare kwe. ‘Jakwre, aune mä mikata kwin,’ tita kärere mäi. Jesús näin niebare kwe.

Nitre nämene näin aune, namani ja gitekä kwärikwäri rabakäre ken. Batibe Jesús namani nünaninkä. ‘¿Nire kisemiri tibätä?’ ngwanintari kwe. Jesús die näkänintubu namani ruin ie, aune ni iti käkwe kise mikanibätä namani gare ie. Akwa ¿nire? Ye meri iti nämene bren kä kwäjätä biti kubu te. ¡Niara jatani käkwe kise mikani dän Jesukwe yebätä, aune namaninta kwin!

Yebätä ja namani ruin bäri kwin Jairo ie, ni mada mikadreta kwin ye nuäre Jesukrä namani gare ie. Akwa ni iti kukwe niekä nükani. ‘Ñaka Jesús nika mada’ niebare kwe Jairo ie. ‘Mä ngängän küre.’ Ye juruabare Jesús ie aune niebare kwe Jairo ie: ‘Mä ñaka töbika; niara rabaita kwin.’

Mrä namanintre Jairo gwirete aune, nitre nämene muen aune ulire krubäte. Akwa Jesús niebare: ‘Ñaka ngetraka. Monso ñaka krüte. Tä ja düke jerekäbe.’ Akwa niaratre namani Jesús jenmike aune kötaire, ñobätä ñan aune monso ye krütani gare ietre.

Jesús nikani gwä monso ye rün, meye bätä apóstol nimä ben monso yekänti. Kani kisebiti kwe aune niebare kwe: ‘¡Näin krö!’ Aune niara nükaninta nire, tuin nete ye erere. ¡Nükani krö aune namani näin! Yebätä rün bätä meye yebätä kä namani juto krubäte.

Jesús nitre krütani kwati ganinkröta. Kena, meri muko krütani nünanka juta Naín känti monsoi ganinkröta kwe. Biti Jesukwe María bätä Marta ngwai Lázaro ye ganinkröta arato. Ngöbökwe Jesús mikani reire, rabai gobrane ngwane nitre kwati gaikröta kwe. Ye käi rabadre juto nibätä, ¿ñan ererea?

Lucas 8:40-56; 7:11-17; Juan 11:17-44.

Kukwe kira 93

Jesukwe nitre kwati bukani

KUKWE tare krubäte namani bare. Juan ni Ngökaka ñöte kämikani. Herodías, rei muko ye brukwä nämene kräke. Rei ye töimikani kwe ni juen dokwä tikekä.

Kukwe ne namani gare Jesús ie aune, namani ulire krubäte. Nikani kaibe kä ngwarbe nötare känti. Akwa nitre nikani jiebiti. Nitre kwati ye jutuabare Jesús ie aune, namani tuin bobre ie. Yebätä, blitabare kwe gobran Ngöbökwe yebätä bentre, aune nitre bren mikaninta kwin kwe.

Köbö yete deu nitre nänkä ben nükani känti aune niebare kwetre ie: ‘Kä nibira raire deu, aune nete ni ñaka nüne. Nitre juen jondron kökö jai, juta känime yekänti.’

‘Niaratre ñaka rikadre,’ Jesús niebare. ‘Mun raba niaratre buke’. Biti Jesús ngwanintari Felipe ie: ‘¿Medente ni raba jondron kökö nitre jökrä ne kräke?’

‘Ngwian ribedi ere jondron kökakrä ne kwe ni jökrä käkwe kwetadre chi,’ Felipe niebare ie. Andrés käkwe niebare: ‘Monso ne, mrö nunkwe ngwanka, tä ban krärike bätä gwa krobu ngwen. Ñaka raba nemen täte ni jökräbiti.’

‘Nitre juen täke tibien,’ Jesús niebare. Biti debe biani kwe Ngöböi mrö yebätä, aune namani ban ye ötöbätä kia kia. Nitre nänkä ben käkwe ban bätä gwa döräibare nitre ye jökräbiti. Nitre brare nämene 5.000, aune monso kia bätä meri nämene kwati. Nitre jökrä käkwe mröbare aune namani trine. ¡Mrö namaninte ye nitre ja tötikaka Jesukwe käkwe ükaninkrö aune, ükaninkrö kutüä 12 te kwetre!

Jesús nitre nänkä ben mikani näin rute nänkäre mren Galilea yete ta. Deu murie namani dite krubäte, ñö namani mate ru yebätä kwärikwäri. Kä jürä namani krubäte nitre nänkä ben yebätä. Deu ni jutuabare ietre näin ñöbiti ta niaratre kokwäre. Kä jürä namani niaratre yebätä, aune namanintre ngwänenkä ñaka nükani gare ietre yebätä.

‘Ñan kä jürä ngwan jabätä.’ ‘¡Ti ara!’ Jesús niebare. Akwa ñaka namani ruin metre ietre. Yebätä Pedro niebare: ‘Mä ara aune, ti kärere ñöte ta mä kokwäre.’ Jesús niebare: ‘¡Jakwre!’ ¡Aune Pedro nikani ñöbiti ta! Kä jürä namani niarabätä aune nikani ñöte nguse, akwa Jesukwe dianintari.

Ye bitikäre, Jesús nitre kwati krubäte bukani bobukäre. Ye ngwane nuainbare kwe ban krä kükü bätä gwa braibebiti. Aune bobukäre jondron namani täte nitre jökräbiti. Jesús nitre ngübabare, ¡ye abokän kwin krubäte! Niara rabai gobrane ye ngwane, jondron ñaka nikwe yebätä, ¡ni ñaka rabaira töbike jire!

Mateo 14:1-32; 15:29-38; Juan 6:1-21.