Kukwe kira 94

Jesús nämene monso kia tarere

JESÚS mike ñärärä nete küde kitani monso chi yebiti. Monsotre kia nämene tare kwe. Nitre tä nikren niarabätä ye apóstol kwe. ¿Jesús dre niebare ietre gare mäi?

Jesús bätä nitre apóstol käkwe nänbare mente abokän gwä nükaninta. Ji ngrabare nitre apóstol käkwe ñäkäbare jai kwärikwäri. Yebätä, namaninta aune Jesús ngwanintari ietre: ‘¿Drebätä mun ñäri jai ji ngrabare?’ Drebätä ñäkäbare kwetre jai ye gare Jesús ie. Akwa kukwe ye ngwanintari kwe, ne kwe nitre apóstol käkwe niedi ie o ñakare ye tönamani gai.

Nitre apóstol käkwe ñaka mikani gare ie, ñobätä ñan aune niaratre meden bäri ütiäte yebätä nämene ñäke jai ji ngrabare. Ruäretre tönamani ja tuai bäri ütiäte madatre yebätä. Ni tö rabadre ja tuai bäri ütiäte ni madabätä ñaka kwin, ¿ye Jesús niebare ño ietre?

Jesús monso chi ye käräbare, aune mikani niaratre jökrä ngwärekri kwe. Biti niebare kwe nitre nänkä ben ie: ‘Ti tönibi kukwe ne mikai gare kwin munye: Munkwe ja töi kwitadre aune ja mikadre monsotre kia ye erere aune, aibe köböire mun rabai gobran Ngöbökwe yete. Ni ja ngwen monso chi ne erere ye abokän bäri ütiäte gobran Ngöbökwe yete.’ ¿Ñobätä kukwe ne niebare kwe gare mäi?

Monso kia ye töi ñaka ja tuai bäri kri aune bäri ütiäte madabätä. Yebätä nitre apóstol käkwe ja töimikadre monso kia ye erere aune ñaka ja töimikadre kwetre ja tuabätä bäri kri aune ütiäte.

Jesús nämene monso kia tarere krubäte ye bämikani kwe, köbö mada ngwane. Sö nikani ruäre ta ye bitikäre nitre ruäre nükani monso kwe ngwena Jesús tuakäre. Nitre apóstol tö namani juain mento. Akwa Jesús niebare ietre: ‘Monso kia tuenmetre näin ti kokwäre, aune munkwe ñan ketabätä, ñobätä ñan aune gobran Ngöbökwe ye tä nitre niaratre ne kwrere kräke.’ Biti kisekitani monso kia yebiti kwe aune kukwe kwin niebare kwe ietre. ¡Jesús monso kia tarere nibi gare nie ye kwin krubäte! ¿ñan ererea?

Mateo 18:1-4; 19:13-15; Marcos 9:33-37; 10:13-16.

Kukwe kira 95

Jesukwe diribare ño

BATI Jesús niebare ni iti ie niarakwe mräkä kwe taredre. Ni yekwe ngwanintari Jesús ie: ‘¿Nire abokän ti mräkä?’ Dre nämene ni ye töite gare Jesús ie. Nitre nünanka niara käite bätä ni nänkä kukwebätä ben ye aibe niara mräkä nämene nütüre. Yebätä, Jesús dre niebare ie ani mike gare jai.

Ruäre kukwe kira namani bare ye Jesús nämene kädriere ni mada tötikakäre. Nete tä ye nuainne. Kukwe namani bare ni judío bätä samaritano yebätä ye kädriebare kwe. Nitre judío bäsi jökrä nämene ja rüere nitre samaritano yebe ye garera nie. Kukwe ye namani bare krörö:

Bati ni judío iti nikani jibiti ngutuäbätä motokwäre Jericó. Akwa nitre gokä käkwe gobare kän. Ngwian dianinkä kän metani aune bäsi kämikani kwetre.

Ye bitikäre, ni judío iti sacerdote nikani ji yebiti. Ni iti nuainbare tare ye tuani kwe. ¿Dre nuainbare kwe gare mäi? Nikani ji ye kwäräkri aune nikani ja käne. Biti ni mada ngöbö mikaka täte krubäte nikani ta. Niara ye levita. ¿Nünankabare kwe? Ñakare, ñaka nünankabare kwe ni ye dimikakäre. Ni sacerdote bätä levita ye tuin menteni näin jibiti motokwäre mäi.

Akwa ni nuainbare tare yebe nireta nete mike ñärärä. Ye ni samaritano. Tä ni judío dimike. Niara tä kräkäimike. Biti jänikani kwe ja dükakäre ne kwe rabadreta kwin.

Jesús kukwe ye kädriebare mrä aune, ni iti kukwe ngwanintari ye ie niebare kwe: ‘¿Nitre nimä ne meden ja ngwani ni nuainbare tare ye mräkä kwe kwrere raba ruin mäi? ¿Ni sacerdote, ni levita, o ni samaritano?’

Ni yekwe niebare: ‘Ni samaritano. Ni nuainbare tare yekrä ja töimikani kwin kwe.’

Jesús niebare: ‘Mä kukwe metre nini. Yebätä, niara ye erere mä nuain ni madabätä.’

Jesús ni mada tötikabare kwin krubäte, ¿ye tuin ño mäi? Jesús kukwe niebare Bibliabätä ye raba kukwe keta kabre ütiäte driere nie, ¿ñan ererea?

Lucas 10:25-37.