Nitre tä ni kukwe nuin ye brukwäte ni raba kukwe mike nemen ño
1. ¿Jesukwe kukwe driebare ye matani ño nitre ja tötikaka kwe yebätä?
1 Nitre nämene Jesús kukwe nuin ye brukwäte nämene kukwe mike nemen, ye medenbätä Biblia tä niere bati nitre ja tötikaka kwe ye brukwäbätä “kä n[amani] nuäre krübäte” (Luc. 24:32, Kukwe Kuin Ngöbökwe). Ni brukwä ye rabadre ni töi mike Ngöbö mike täte, ye medenbätä ¿ni raba nitre ja tötikaka nibe ye dimike ño ne kwe ja töi kwitadre kwetre kukwe ruärebätä? (Rom. 6:17.)
2. Töbikadre kwin blitakäre aune ni mada töi mikadre nüke gare jai, ¿ye raba ni dimike ño kukwe mike nemen nitre brukwäte?
2 Töbikadre kwin blitakäre aune ni mada töi mikadre nüke gare jai. Dre kwin aune dre käme ye nita mike gare nitre ie, ye ñan aibätä tätre ja töi kwite. Ñodre, niaratre tä kukwe mike täte ye ñaka metre nikwe mikadre gare ietre bersikulo keta kabre yebiti angwane, niaratre ñaka raba kukwe drieta kain ngäbiti. Ñobätä tätre kukwe ye mike täte aune tätre ja ngwen ye erere ye mikadre nüke gare käne jai töi mikakäre kukwe drieta ietre yebätä. Nikwe töbikai kwin käne kukwe ngwantarikäre aune nikwe töbikai kwin niekäre angwane, ye käkwe töi mikai dreta töite ye niere nie (Prov. 20:5). Ye aibe ngwane ni rabai texto Bibliabätä denkä kukwe mikakäre nemen brukwäte. Ye medenbätä, nikwe ja töi mikadre niaratrebätä aune nikwe ngübadrebätä bätärekä ye ütiäte krubäte (Prov. 25:15). Nitre ñaka nirien ja erebe kukwe ja üairebiti ye mäkwe ngwan törö jai. Kä mikadre niken ta ne kwe üai deme Jehovakwe sribidre niaratre töibätä aune tätre ja ngwen ño yebätä (Mar. 4:26-29).
3. ¿Ni raba nitre ja tötikaka nibe ye dimike ño ne kwe ja töi mikadre kwin kwetre ni kristiano erere?
3 Nikwe dimikai ye köböire töi rabai ni kristiano erere. Jehová töita kwin ni kräke aune tä ni tarere nieta bersikulo ruärebätä ye nikwe kädriedre bentre ye käkwe dimikai ja töi ükete kwin ni kristiano erere. Ni ütiäte krubäte Ngöbö kräke ye mikakäre gare ietre ni raba ñäke Salmos 139:1-4 aune Lucas 12:6, 7 yebätä. Kukwe ñaka nuain bä ni kräke akwa Jehová tä nuainne ni kräke yebätä nitre tä debe bien angwane, Jehová tä nemen bäri tare kwetre aune töita nemen bäri mikabätä täte (Rom. 5:6-8; 1 Juan 4:19). Ne madakäre, niaratre tä ja ngwen kwin ye mate kwin Jehovabätä nemen gare ietre, ye käkwe töi mikai ja ngwen kwin kä mikakäre juto Ngöböbätä aune mikakäre ütiäte (Sal. 78:40, 41; Prov. 23:15).
4. ¿Nita kukwe metre driere nitre madai ye ngwane ni raba ja ngwen ño Jehová erere?
4 Kukwe ükaninte Jehovakwe ye niara ñaka ni töi mike ja dibiti mike täte, ñakare aune kukwe nieta kwe nie mäträkäre nibätä ye mikadre täte ye kwin ni kräke mikata gare kwe nie (Is. 48:17, 18). Nikwe nitre ja tötikaka ye tuainmetre akwle kukwe mike nüke gare jai angwane, nita ja ngwen Jehová ye erere nikwe bämikai. Ye erere ngwane ja töi kwitai kärekäre kwetre kukwe ruärebätä (Rom. 12:2). Ye köböire batire batire niaratre rökräi bäri Jehová “nitre brukwä mik[aka] gare jai” ye ken (Prov. 17:3).