Kukwe tare nakaninkä Job yebätä akwa ja ngwani metre kwe

Job nünanbare kä Uz yekänti nitre Israel nämene klabore Egipto ye ngwane. Job ñaka israelita, akwa nämene Jehová mike metre täte. Mräkätre nämene kwati krubäte aune nämene jondron bökäne krubäte. Job nämene ja ngwen töbätä aune nämene kukwe metre nuainne yebätä mika nämene ütiäte jai. Ne madakäre, nitre bobre aune nitre nämene jondron ribere jai ye kräke nämene ja töi mike mantiame. Job ja ngwani metre.

Jehová nämene bäri ütiäte Job kräke ye bämikani kwe

1:8-11, 22; 2:2-5

• Job nämene ja ngwen metre ye mikani ñärärä Diablukwe. Job nämene Ngöbö kukwei mike täte ye ñan ai gäräbare kwe, ñakare aune, töi ñobiti nämene Ngöbö mike täte yebätä blitabare kwe.

• Job nämene Ngöbö mike täte jondron täri niebare Satanakwe.

• Kukwe ye metre o ñakare ye mikakäre gare, Jehovakwe Job tuanimetre Satana ie, yebätä kukwe keta kabre nuainbare kwe Job yebätä.

• Job ja ngwani metre, akwa ni kä tibienbätä ñaka raba jire Ngöbö mike metre täte niebare Satanakwe.

• Job ñaka blitabare blo Ngöböbätä aune ñaka ngite kitani kwe Ngöböbiti kukwe tare nämene nakainkäbätä yebätä.