“Ma jana ja mäketa käne ma mräkäbe”

Mä tädre nüne Jesús näire kä Galilea yekänti ye bämike ja töite. Mä rikadre Jerusalén yete fiesta Cabaña ye käi ngwankäre juto jabätä. Nitre kwati kä jökrä känti rükadre siba yete aune kä rabadre nokwre jutate. Ne madakäre, mä törbadre jondron biain kukwadre Jehovai. Ye medenbätä mä rikadre cabra ngwena nitre kwati tä ji ngrabare ye ngätäite ta templo kokwäre. Mä rabadre templo yete ngwane, nitre kwati tädre ja ükaninkrö yete; niaratre arato törbadre jondron biain kukwadre. Mrä, kä rükadre mäi cabra biankäre nitre sacerdote ie. Akwa, mä rabadrera bien ngwane, batibe ja mräkä iti tädre siba yete o tädre jutate abokän tä rubun mäbe ye rükadre törö mäi. Mäkwe dre nuaindre ye Jesukwe mikani gare (ñäkädre Mateo 5:24 yebätä). ¿Mun rabadre dre nuainne nünankäre jäme jabe niebare Jesukwe? Kukwe tä mikani jatäri yete kukwe meden nuaindre metrere ye mäkwe täräi mikaka.

¿MÄ RABADRE DRE NUAINNE?

• Ja mräkä ye tädre rubun kukwe bökänbätä rabadre ruin mäi ye aibe ngwane mäkwe blitadre ben.

• Ja mräkä yei bren ñäkädre aune niara ngite arato rabadre ruin mäi yebätä mäkwe niara töi mikadre ja dibiti kukwe ye kain ngäbiti.

• Niarakwe blitadre ngwane mäkwe kukwe nuadre bätärekä, tädre dre niere ye ñaka rükadre gare täte mäi aune mäkwe ñaka ja töi mikani blo kräke, akwa ngite juandre ta kwe mäbiti ye mäkwe ribedre ja brukwä tätebiti ie.

¿JA MRÄKÄ YE ABOKÄN RABADRE DRE NUAINNE?

• Mäkwe dre nuainbarebätä ye niarakwe niedre ja mräkätre aune ja ngwaitre madai ne kwe ja mikadre kwetre niarakri.

• Kukwe namani jabätä munye ye jökrä ngwandreta törö kwe mäi aune mä ngite mäkwe niedre ye ribedre ja dibiti kwe mäi.

• Mäkwe ja töi mikani bobre aune mäkwe ñaka kä jürä ngwani jabätä blitakäre ben ye rabadre bäri ütiäte kräke bätä ngite juandre ta kwe mäbiti ja brukwä tätebiti.

Kä nengwane ni ñaka jondron nire kukwe Ngöbö mikakäre täte. Akwa, ni tädre jäme ja mräkätre aune ja ngwaitre ben bätä nikwe Ngöbö mikadre täte niara tö ie ye erere, ¿ye ñobätä ja erebe niebare Jesukwe?