Ja ngwandre mokre “kwra lion [...], tä [...] ngwäne krikri” yebätä

1. ¿Ángel iti nämene ja kete Jehovabe ye käkwe dre nuainbare?

ÁNGEL iti nämene ja kete Jehovabe kena. Akwa bati niara tö namani nitre kä nebätä tuai ja mike täte Ngöbö yebiti ta. Niara nämene töbike jankunu kukwe yebätä, ye käkwe töi mikani ja mike ngite (Santiago 1:14, 15). Niara ja mikani Jehová rüere aune namani “ni ni ngökaka rün” (Juan 8:44, Ngöbö Täräe, tärä okwä ükaninte). Niara jämi ja mike Ngöbö rüere ye känenkri kädeka nämene ño ye ñaka gare nie, akwa kä nengwane nita kädeke Satana.

2, 3. ¿Ñobätä Jehová rüe ye kädekata “Satana”, “Diablu”, “tbi” aune “mökata”?

² Satana ye Jehová rüe aune ni kä nebätä rüe bäri käme krubäte. Niara töi ño käme krubäte ye Biblia tä mike gare nie. Ñodre, Biblia tä kädeke Satana, ye abokän ni ja mikaka “Ni Mada Rüere” meden gärätä. Tä kädeke kore ñobätä ñan aune niara ye brukwä Gobran Jehovakwe ye kräke aune tä ja di ngwen krubäte ja mikakäre rüere. Satana ñaka tö Jehová tuai gobrane.

³ Apocalipsis 12:9 yekänti Jehová rüe ye kädekata Diablu. ¿Ñobätä? Ñobätä ñan aune Diablu ye abokän ni “Kukwe Ngwarbe Niekä” meden gärätä. Jehová ye ni ngökö niebare Satanakwe. Niara ye kädekata arato “tbi kira”, ñobätä ñan aune kulebra yebiti Eva ngökani kwe. Aune kädekata “mökata kri” ñobätä ñan aune niara ye jondron kri rubun aune käme krubäte ye kwrere. Jehovakwe kukwe käbämikani ye niara ñaka tö tuai nemen bare. Ne madakäre, nitre Ngöbö mikaka täte ye jökrä niara tö gaite.

4. ¿Drebätä nibike ja tötike kukwe ja tötikara nekänti?

⁴ Erametre, Satana ye Jehová rüe aune juta kwe rüe. Niara ñaka tö ni tuai Jehová mike täte jankunu. Yebätä Biblia tä ni mike mokre: “Kwra lion ie mröta nebe angwane, tä niken ngwäne krikri, käta niken jändrän känene kwetadre jae, ye kwrere jire mun rüe diablu Satana tä näin ni känene juankäre ngwarbe, aisete munkwe [...] mokre jabti” (1 Pedro 5:8). Kukwe ketamä abokänbätä ni raba ja kriemike Satana yebätä ye nibike mike gare jai kukwe ja tötikara nekänti.

SATANA YE DITE KRUBÄTE

5, 6. a) Angeletre ye dite krubäte ye mä raba mike gare kukwe keteitibiti. b) ¿Ñobätä Biblia tä niere Satana ye “di tärä ni kä mikakrä”?

⁵ Angeletre ye dite krubäte (Salmo 103:20). Niaratre ye bäri töbätä aune bäri dite ni kräke. Angeletre ja ngwanka metre ye tä jondron kwin nuainne die yebiti. Ñodre, kirabe ángel itibe käkwe nitre rükä 185,000 kämikani köböitibe deu. Ni kä nebätä kräke kukwe ye ñan nuäre nuaindre aune nitre rükä kräke ñaka rabadre nuäre arato (2 Reyes 19:35). Köbö mada ngwane, ángel iti käkwe nitre apóstol Jesukwe dianinkä kä ni ngite kitakäre yekänti. Jukwe tikani kwe, nitre apóstol ye dianinkä kwe aune jukwe ye dikaninta kwe, akwa guardiatre ye käkwe ñaka gani jire (Hechos 5:18-23).

⁶ Nibira gare nie ye erere, angeletre ye tä die yebiti jondron kwin nuainne. Akwa Satana abokän tä die yebiti jondron käme nuainne. Niara ye dite krubäte. Ye medenbätä, Biblia tä niere niara tä ni kä nebätä “dänkiene” aune tä “ngöböre” ni kä nebätä yebiti (Juan 12:31; 2 Corintios 4:4). Niara ye “di tärä ni kämikakrä” nieta Bibliakwe arato (Hebreos 2:14). Akwa ye ñan tä mike gare niara tä nitre jökrä murie kete akwle. Ye erere ngwane, ¿ñobätä Biblia tä niere niara ye “di tärä ni kä mikakrä”? Kena, tä nitre töi mike käme ja kräke kwärikwäri aune nitre ye tätre nemen ja nuainne tare. Ketebukäre, niara ye köböite Adán aune Eva ja mikani ngite aune yebätä ngite nikani ni jökräbiti aune nita krüte (Romanos 5:12). Yebätä Jesús niebare Satana ye ni murie ketaka (Juan 8:44). Erametre, Satana ye dite krubäte.

7. Kukwe namani bare kädrieta Bibliakwe abokän tä mike gare chokalitre ye dite krubäte ye mä raba niere.

⁷ Nita ja mike Satana rüere ye ngwane, nita ja mike nitre ja ketaka ben ye rüere arato. Chokalitre ye ja ketaka Satanabe, niaratre ye angeletre bikaka bäri (Apocalipsis 12:3, 4). Kukwe namani bare kädrieta Bibliakwe ye tä mike gare niaratre ye bäri dite ni kä nebätä kräke aune raba ni mike ja tare nike krubäte (Mateo 8:28-32; Marcos 5:1-5). Satana aune chokalitre dite krubäte ye nikwe ñaka käi kwitadrekä jire jabiti (Mateo 9:34). Akwa Jehová diebiti ni raba niaratre ganainne.

SATANA YE TÖI KÄME KRUBÄTE

8. a) ¿Satana tö dre nuain? (Üai bämikani kena mikadre ñärärä.) b) ¿Dre tuanina mäkwe abokän tä mike gare mäi nitre kä nebätä ye töita käme krubäte Satana erere?

⁸ Satana ye töi käme krubäte. Kukwe ja tötikara nebätä párrafo 4 yekänti nibi gare nie erere, Biblia tä niere niara ye león kwrere aune tä ngwäne krikri ja dibiti, ñobätä ñan aune tä murie niken krubäte. Kä te nita nüne ye tä niara kisete, akwa ye ñaka nemen debe kräke (1 Juan 5:19). Niara tö nitre nänkä kä kwinbiti täbe Kä tibienbätä aune “obeja mda mda” ye murie ketai arato (Juan 10:16; Apocalipsis 12:17). Ye nuainkäre tä nitre töi mike ja mike nitre kristiano metre ye rüere, niara jatani kukwe ye nuainne siklo kena aune täbe nuainne kä nengwane.

9, 10. a) ¿Satana ja mikani ño juta Israel ye rüere? b) ¿Ñobätä Satana tö namani ja mikai juta Israel ye rüere krubäte? c) ¿Ni Jehová mikaka täte tä kukwe käme krubäte nuainne ye ngwane kätä nemen ño Satana yebätä raba ruin mäi?

⁹ León ie mröta nemen ye ngwane jondron nire tä kwen ie ye ñaka tä nemen tuin bobre ie. Tä nire aune tärä nemen ngwakare ye ngwane ñaka tä nemen tuin bobre ie. Ye erere arato, nitre rüere Satana tä ja mike ye ñaka tä nemen mike tuin bobre jai. Satanakwe ja mikani ño juta Israel rüere yebätä ani töbike. Niarakwe nitre israelita mikani kukwe käme nuainne, ñodre Zimrí mikani kwe ja mike ngite meribe aune Guehazí töi mikani kwe jondron jenena den jai. Kukwe ye käkwe nitre mada mikani ja tare nike krubäte. Kukwe namani bare ye käi namani juto krubäte Satanabätä raba ruin nie (Números 25:6-8, 14, 15; 2 Reyes 5:20-27).

¹⁰ ¿Ñobätä Satana namani ja mike juta Israel ye rüere krubäte? Ñobätä ñan aune juta yekri Mesías jatai ye nämene gare ie. Aune Mesías ye käkwe niara gaite aune Jehová aibe tä gobrankäre ye mikai gare metre kwe ye nämene gare kwin ie arato (Génesis 3:15). Jehová tädre nitre israelita ye kain ngäbiti jankunu yei Satana ñaka tö namani, aisete ja di ngwani krubäte kwe nitre ye töi mikakäre ja mike ngite. David ja mikani ngite meri madabe ye ngwane ñaka mikani tuin bobre kwe jai. Moisés ñaka namani Kä Käbämikani yekänti, ye ngwane ñaka namani tuin bobre ie arato. Erametre, ni Ngöbö mikaka täte tä kukwe käme krubäte nuainne ye ngwane kätä nemen juto Satanabätä. Tä nemen kukwe ye erere den jai yakrä Jehovabätä (Proverbios 27:11).

11. ¿Ñobätä Satana tö namani Sara ye nuaite raba ruin nie?

¹¹ Mesías jatai nitre meden meden mräkä yekri ye kräke Satana brukwä namani. Ñodre, “tikwe juta kri ükaite mä köböire” niebare Jehovakwe Abrahán ie ye ngwane kukwe namani bare ye ani ngwenta törö jai (Génesis 12:1-3). Abrahán aune Sara namani Egipto ye ngwane, rei juta yete nikani Sara ngwena ja mikakäre gure ben. Akwa Jehovakwe Sara mikani kwäre (Génesis 12:14-20). Juta Guerar yekänti rei mada tö namani kukwe ye erere nuaindi, Isaac jämi därere ye känenkri (Génesis 20:1-7). ¿Satana tö namani nitre reire ye töi mikai Sara yebätä? Biblia ñaka kukwe ye niere. Akwa ni rabadre ngwen törö jai, Sara nämene nüne kwin juta Ur yete, akwa tuanimetre kwe nünankäre jondron nire kwata sribebare jure yete. Satana tö namani Sara ye nuaite jondron kwin krubäte nämene nitre reire yekwe yebiti aune tö namani tuai ja mike ngite muko kwe aune Jehová ye rüere raba ruin nie. Satana ñaka tö namani Sara ye tuai nemen Mesías ye mräkäre. Sara nämene gure ye niara tö namani juain ngwarbe kän, niara kädriedre blo aune ñaka rabadrera ja kete Jehovabe yei tö namani arato. Satana ye ni töi käme krubäte, ¿ñan ererea?

12, 13. a) ¿Jesús därebare ye ngwane Satanakwe dre nuainbare? b) ¿Monsotre bati tä Jehová mike täte kä nengwane ye tuin ño Satana ie raba ruin mäi?

¹² Kä nikani kwati krubäte ta angwane Jesús därebare. Ngäbäkre chi därebare ye ñaka namani tuin bä nuäre aune taredre Satana ie. Ngäbäkre ye jatani Abrahán mräkä yekri aune rabai Mesías ye nämene gare kwin ie. Ne madakäre, Diablukwe kukwe nuainbare ye Jesukwe diainkä jökrä ye nämene gare ie (1 Juan 3:8). ¿Ngäbäkre chi murie ketadre ye blo namani tuin Satana ie? Ñakare. Dre kwin aune dre käme ye ñaka nämene ütiäte kräke. Drekebe ngwarbe ja töi mikani kwe Jesús murie kete. ¿Dre nuainbare kwe?

¹³ “Jrei nitre israelitakwe” därebare ye namani gare rei Herodes ie ye ngwane, namani rubun krubäte aune tö namani murie ketai (Mateo 2:1-3, 13). Ye nuainkäre, ni juani kwe ngäbäkre kia kä kububiti o kä braibebiti kä Belén yekänti aune juta ye bäre, ye jökrä murie kete (ñäkädre Mateo 2:13-18 yebätä). Ngäbäkre kia murie ketani ye ngwane Jesús namaninte nire. Akwa, ¿kukwe ye tä dre mike gare nie Satana yebätä? Tä mike gare nie ja nire nitre kä nebätä yekwe ye ñaka ütiäte jire niara kräke, ja nire ngäbäkre kia yekwe ye ñaka ütiäte jire niara kräke arato. Erametre, Satana ye león ngwäne krikri ye kwrere. Niara ye töi käme krubäte ye nikwe ñaka käi kwitadrekä jire jabiti.

SATANA TÖ NI NGÖKAI

14, 15. ¿Satana tä nitre ngökö ño?

¹⁴ Jehová ye Ngöbö ni tarekä krubäte (1 Juan 4:8). Nitre ja mikadre Ngöbö rüere yekäre Satana tä niaratre ngökö. ¿Tä nuainne ño? Ñaka tä nitre töi mike “kukwe ja üaire ribere jai”. Ye abokän nitre ñaka Jehová ribere jai ja ketamukore rabadre nütüre yei niara tö (Mateo 5:3, TNM). Diablu ye nitre kwati ngökabarera ne kwe kukwe metre Ngöböbätä ye ñaka rabadre gare ietre (2 Corintios 4:4).

¹⁵ Jehová tö ja aibe mikamana täte ye gare Satana ie (Éxodo 20:5). Ye medenbätä, tä nitre ngökö metrere kukwe ngwarbe mikata täte yebiti. Nitre tä mräkätre kirabe, jondron sribebare Ngöbökwe, jondron nire aune jondron mada mada mike ngöböre jai, akwa ñaka Jehová mike Ngöböre jai ye käi nemen juto Satanabätä. Nitre kukwe ye nuainkä tätre nemen nütüre kukwe ye nemen kwin Ngöbö kräke, akwa kukwe mikata täte kwetre aune kukwe mada nuainta kwetre ye ñaka ütiäte jire. Isaías ni Ngöbö kukwei niekä ye näire nitre israelita nämene kukwe ye erere nuainne. Kukwe ngwarbe mika nämene täte kwetre ye Jehovakwe bämikani mrö ñaka kwin ye kwrere niaratre dimikakäre. Jondron ñaka kwin kökadre kwetadre jai ye ñaka ütiäte niebare kwe ietre. Niebare kwe ietre: “Ti kukwe nuin kwin, aune jondron kwin ye kwete” (Isaías 55:2).

16, 17. a) ¿Ñobätä Jesukwe niebare Pedro ie: “¡Satana, nän mento tibtä nete!”? b) ¿Satana töta nemen ni ngökai ño?

¹⁶ Satana raba nitre Ngöbö mikaka täte metre ye ngökö arato. Ñodre, Jesukwe niebare nitre ja tötikaka kwe yei niara käne kä namanina braibe ne kwe murie ketadre, ye ngwane kukwe namani bare ye ni raba ngwenta törö jai. Pedro nämene Jesús tarere krubäte, aisete niebare kwe ie ñaka rabadre ja töi mike krubäte kukwe nämene nuaindre ie yebätä. Akwa Jesukwe niebare ie: “¡Satana, nän mento tibtä nete!” (Mateo 16:22, 23). ¿Ñobätä Jesukwe kukwe ye niebare ie? Ñobätä ñan aune Jesús ie nämene gare kwin, niara ye krütadre nitre kä nebätä mikakäre kwäre aune Satana ye ni ngökö mikakäre gare. Kä ye nämene ütiäte niara kräke. Kä ye ñaka nämene ja töi mikakäre jäme ie. Jesukwe ñaka ja ngwandre mokre akräke rabadre kwin Satana kräke raba ruin nie.

¹⁷ Kä niena braibe nitre käme gatekäre, aisete nita kä ütiäte krubäte näire. Akwa Satana tö ni tuai ja töi mike jäme kukwe mada nuainkäre aune nikwe ja töi mikadre kä ngwen juto jabätä jondron kä nebätä yebiti ie niara tö. Kä krüte ye tä mente o ñaka rükai jire ye ni rabadre nütüre ie niara tö. Akwa ye ñaka metre. Nikwe ja ngwandre mokre aune nita nüne kä krüte näire ye nikwe ñaka käi kwitadrekä jabiti (Mateo 24:42).

18, 19. a) ¿Nikwe kukwe meden mikadre era jai ie Satana tö? b) ¿Jehová tä ni dimike ño?

¹⁸ Jehová ñaka ni tarere aune ñaka ngite juen ta nibiti jire ye ni rabadre nütüre ie Satana tö. Akwa ye ñaka metre arato. Biblia tä niere: “Ngöbö abko töi metre aisete [...] munta Ngöbö tarere, [...] munta die mike janknu, ye abko Ngöbökwe ñan käikwitadrekä jabti” (Hebreos 6:10). Ne tä mike gare nie, nita dre dre nuainne Jehová kräke ye jökrä tä mike tuin ütiäte jai (ñäkädre 1 Corintios 15:58 yebätä). Satana yebrä Jehová ñaka tarere jire aune ñaka ngite juain ta jire kwebiti. Aisete nikwe ñaka Diablu ye tuanemetre ja ngökö kukwe ngwarbe nieta kwe yebiti.

¹⁹ Kukwe ja tötikara nekänti nibi gare nie Satana ye dite krubäte, töi käme krubäte aune tö ni ngökai. Akwa ni raba niara ganainne ñobätä ñan aune Jehová tä ni dimike. Biblia tä ni mike mokre kö okwä kabre Satanakwe yebätä ne kwe ni tädre juto biare (2 Corintios 2:11). Akwa kö okwä meden meden niarakwe ye ñan aibe rabadre gare jerekäbe nie. Ni rabadre ja mike rüere. Ye medenbätä, Biblia tä niere nie: “Munkwe nünanka dite jabtä rükäre diablu Satana rüere angwane, gitiadi munbtä” (Santiago 4:7). Ni raba kä mikete ño kö okwä ketamä Satanakwe yebätä ye nikwe mikai gare jai kukwe ja tötikara mada ja känenkäre yebätä.