¿Mätä ja di ngwen ne kwe mä kädekadre sribikäre konkrekasionte?
1. ¿Ñongwane nitre brare raba kukwe nieta 1 Timoteo 3:1 ye erere nuainne?
1 1 Timoteo 3:1 tä niere: “Nire tö ja mikai nitre tödekaka Jesubti jie ngwianka, ye abko tö sribi kuin nuein”. Kukwe nieta Bibliabätä ne tä nitre brare töi mike ja di ngwen sribikäre konkrekasionte. ¿Mä rabadre tän ye ngwane mäkwe nuaindre? Ñakare. Bäri kwin mäkwe nuaindre gwäune. Nengwane mä rabadre ja kite nuainne aune dre dre ribeta ne kwe mä rabadre sribikä konkrekasionte ye mäkwe nuaindre (1 Tim. 3:10, Kukwe Kuin Ngöbökwe [WBT]). ¿Mäkwe ja ngökabarera ñöte? Mäkwe dre nuaindre sribikäre konkrekasionte ye ani mike gare jai.
2. ¿Mäkwe ja töi mikadre ño ni mada dimikabätä, aune mä raba dre nuainne ni mada kräke?
2 Mäkwe ja töi mika ni mada dimikabätä. Mä kädekadre bäri ütiäte konkrekasionte ye ñan ai ngübadre mäkwe, ñakare aune mäkwe “sribi kuin nu[aindre]”, abokän köböire mäkwe ni mada dimikadre. Yekäre ütiäte mäkwe ja töi mikadre ja mräkätre dimike. Jesukwe bämikani ño yebätä mäkwe töbikadretari ye raba mä dimike nuainne (Mat. 20:28; Juan 4:6, 7; 13:4, 5). Ni mada dimikadre ye ñaka nemen nuäre mä kräke angwane, mäkwe ja di kärä Jehovai (1 Cor. 10:24). ¿Mä raba kukwe meden nuainne ja mräkätre bren o niena umbre ye kräke? Ju ja Ükarakrö yete sribi nuainta ye mä raba nuainne arato, ñodre, kä bätete o kri blü ükete. ¿Kwela Sribi Ngöbökwe Kräke yete mäkwe kukwe kädriedre ni mada täte ribedre mäi angwane mä tädre juto nuainkäre? Mäkwe ni mada dimikai yekwe kä mikai juto krubäte mäbätä ye rükai gare mäi (Hech. 20:35).
3. ¿Dre bäri ütiäte sribikäre konkrekasionte, aune ñokänti raba nemen nikwe?
3 Mäkwe ja mika dite kukwe ja üairebiti. Nire nire tö sribidi konkrekasionte ye tädre dite kukwe ja üairebiti ne kwe rabadre kädekani sribikäre konkrekasionte aune jondron nuain gare ie ye ñan ai köböire rabai kädekani. Ni dite ja üaire ye tä töbike Jehová aune Jesús erere (1 Cor. 2:15, 16). Tä ja töi mike ño ye tä mike gare “Ngöbö Üai tä” niarabätä (Gál. 5:22, 23). Tä Gobran Ngöbökwe mike käne nuaindre jai aune tä kukwe driere käre (Mat. 6:33). Mä tädre dite ja üaire yekäre, käre mä rabadre köbö ükete jai ja tötikakäre kaibe: mandre jetebe mä rabadre ñäke Bibliabätä, Ni Mikaka Mokre bätä ¡Despertad! ye jökräbätä mä rabadre ñäke aune mä rabadre ja tötike gätä nuainta ye kräke, aune mä ñaka rabadre gätä ye juen ja bäre (Sal. 1:1, 2; Heb. 10:24, 25). Timoteo monso bati ja ketaka Pablobe ye dimikani kwe nirien kukwe ja üairebiti angwane, niebare kwe ie: “Kukwe diri makwe, yebtä makwe töbika kuin ja käne” (1 Tim. 4:15, 16, WBT). Yebätä kukwe tä kädriedre mäi Kwela Sribi Ngöbökwe Kräke yete aune kukwe driedre ye kräke mäkwe ja tötikadre kwin. Kukwe driedre ye mäkwe nuain käre. Mäkwe ja töi mika sribi Ngöbökwe nuainbätä, ñodre, ja mike prekursor, sribire Betel o niken Kwela Nitre Brare Kaibe Tötikakäre Bibliabätä yete, aune mäkwe ja di ngwan ne kwe rabadre mäkwe. Mäkwe ja mikai dite kukwe ja üairebiti ye käkwe mä kriemikai “jändrän kämekäme mdei tä krübäte ni bati batiye” yebätä (2 Tim. 2:22, WBT).
4. ¿Ja ngwandre metre aune tö ngwandre ye ñobätä ütiäte?
4 Mäkwe ja ngwan metre aune mäkwe tö ngwan. Siklo kena yete mrö nikabare ye ngwane konkrekasion namani mrö nike arato. Aune mrö döräikäre, nitre apóstol käkwe “ja mräkä[tre], [...] töbtä töbtä” dianinkä, ye abokän, niaratre nämene ja ngwen metre aune tö ngwen gärätä. Ja mräkätre ye käkwe sribi nuaindi kwin nämene gare ietre, yebätä ja töi mikani kwetre sribi bäri ütiäte nuainne (Hech. 6:1-4). ¿Ye tä dre driere mäi? Sribi mikadre nuaindre mäi angwane, mäkwe ja di ngwan nuainne kwin. Mäkwe ja ngwan Noé erere, dre dre nuaindre kwe arca sribekäre Ngöbökwe niebare ie ye erere nuainbare kwe (Gén. 6:22). Ja ngwandre metre ye bäri ütiäte Jehová kräke aune ye tä bämike nita dite ja üaire (1 Cor. 4:2; recuadro “Ni tötikata sribikäre ye ütiäte krubäte” yebätä ñäkädre).
5. ¿Ñobätä monsotre rabadre ja di ngwen sribikäre kokrekasionte?
5 Niebare ye erere, Jehová tä nüra ja üaire mike nirien bäri (Is. 60:22). Kä kwatire kwatire te nitre 250.000 näre tä ja ngökö ñöte. Nitre kwati tä ja mike juta Jehovakwe yekri, yebätä nitre dite kukwe ja üairebiti aune raba sribire kwin konkrekasionte ye ribeta. Kä nengwane sribi Jehovakwe tä nuaindre krubäte (1 Cor. 15:58). Yebätä, monsotre tä ja di ngwen sribikäre konkrekasionte ye töita sribi kwin nuainbätä.
[Kukwe nieta página 2]
Nitre kwati tä ja mike juta Jehovakwe yekri, yebätä nitre dite kukwe ja üairebiti aune raba sribire kwin konkrekasionte ye ribeta
[Recuadro página 3]
Ni tötikata sribikäre ye ütiäte krubäte
Nitre umbre rabadre sribi mike monsotre tä ja ngwen kwin ye kisete aune nuaindre ño kwetre ye rabadre driere ietre. Ñodre, ni ni tuabitikä konkrekasionte tä mike gare, gätä nuainbare ye bitikäre namani täkäni plataforma yekänti blitakäre ni iti kukwe driekä yebe aune dimikakäre. Aune monso chi nämene nünaninkä krö niaratre ken ye jutuabare ie, aune nämene niara ngübare blitakäre ben o ñakare ye ngwanintari kwe ie. Monso chi ye niebare ie, niara nämene kädekani kä sökakakäre aspiradora yebiti plataforma yekänti gätä ye bitikäre. Rün aune meye namanina juto nänkäreta, akwa sribi mikani niara kisete ye tö namani nuaindi. Töi kwinbiti, ni ni tuabitikä konkrekasionte ye nikani täke kä madakänti. Ye bitikäre mikani gare kwe: “Nitre umbre konkrekasion yete ye nämä juto biare monsotre kia dite kukwe ja üairebiti ye kisete sribi mike nuaindre konkrekasionte tötikakäre. Yebätä, batire batire ti nämä niken konkrekasion ye tuinbiti angwane, ni umbre konkrekasionte nämä niere tie monsotre ruäre kädeka raba ni sribikä konkrekasionte”.