KUKWE JA TÖTIKARA 2

Blitadre bängrabe

2 Corintios 2:17

KUKWE MIKATA GARE: Mäkwe blita bängrabe aune ja brukwä tätebiti, ye köböire kukwebätä mätä blite aune nitre mä kukwe nuaka ye ütiäte mä kräke ye mäkwe bämikai.

NUAINDRE ÑO:

Mäkwe ora aune ja tötika kwin. Mäkwe ja di kärä Jehovai ne kwe kukwe medenbätä mätä blite yebätä nitre ja töi mikadre aune ñaka mäbätä. Kukwe ütiäte mä tö mikai gare ye mäkwe mika gare kwin jai. Kukwe tä tikani yebätä mäkwe ñaka ñäkä jerekäbe. Ñakare aune mäkwe blita ja kukweibiti arato.

Mäkwe ñäkäi Biblia, tärä o täräkwatabätä ngwane, mäkwe mika gare kwin jai ne kwe mäkwe ñäkädre kwinbätä. Kukwe ye ni mada käkwe niebare ngwane, ja nämäne ruin ño ie ye erere mäkwe ja kukwei mika, akwa mäkwe ñaka ja kukwei mika biti bäri.
Mäkwe blita ja brukwä tätebiti. Ñobätä kukwe ye rabadre gare nitre ie yebätä mäkwe töbika. Mäkwe töbika nitre yebätä. Ye erere mäkwe nuaindi ngwane, mätä nünaninkä ño aune mätä ja bämike ño yebiti mäkwe bämikai mätä kukwe mike gare ye metre bätä mä töita kwin nitrebätä.

Blitadre bängrabe ye abokän matadre kwin nitre mada olote. Mätä kukwe mike gare ye ütiäte krubäte, aisete mäkwe kukwe jökrä kädekate kwin aune nieta ño metre ye ererebätä.
Mäkwe nitre mika ñärärä. Ye nuain raba mä käite ngwane, mäkwe nuain. Mätä kukwe kädriere ngwane, mäkwe ñaka nikra jerekäbe, ñakare aune mäkwe ni itire itire mika ñärärä.