KUKWE TÄRÄ KWATABÄTÄ: RÜBARE KÖBÖITE NÜNA ÑAKA NAMANINA KÄNE ERERE

¿Nire köböite metrere rüta nakainkä aune ja tare nikata?

Rübare Kri Kena ye mikani krüte 11 noviembre kä 1918 yete. Nitre käkwe tienda kwetre täkäninbiti aune nikanintre bailare ji ngrabare. Akwa ñaka kä ngwani juto raire kwetre jabätä. Kürübiti nitre kwati murie ketani yebiti ta kukwe bäri tare jatani nökrö nitre kä jökräbiti tibien yebiti.

Rübare juta Francia yekänti nitre jatani nakain bren käme krubäte ie junio kä 1918 ye ngwane, ye abokän bren gripe española, yekwe kukwe tare krubäte mikani nemen bare drekebe ngwarbe. Nitre rükä Estados Unidos murie ketani rüekwe yebiti ta bren yekwe niaratre murie ketani bäri sö braibe te Francia. Nitre rükä namaninta ja käite ye nükani bren ye ngwena jabätä aune bren ye namani kä jökräbiti tibien.

Rü krütani ye bitikäre mrö nika jatani aune nitre jatani nüne bobre arato. Rü krütani ye bitikäre kä Europa ye jökrä bäsi känti nitre jatani krüte mrö miare. Kä 1923 ye ngwane ngwian Alemania ye ñaka namanina bäsi ütiäte. Kä nikani kwä ti ta ye bitikäre, ngwian ñaka namanina kä jökräbiti tibien. Mrä mada, kä 1939 yete Rübare Kri Bobukäre ye nakaninkä, ye abokän rübare kena ye nuainbare jankunu. ¿Ñobätä kukwe tare ye jatani nakainkä jatäri?

KUKWE RAKADREKÄ KÄ KRÜTE NÄIRE

Ñobätä kukwe ruäre namani bare kirabe, metrere ñobätä Rü Kri Kena nakaninkä ye rükadre gare nie yekäre, kukwe rabadre bare niebare Bibliabätä ye nikwe mikadre gare käne jai. Kä rükai angwane juta jene jene rabai rüre jabe kwärikwäri aune bren bätäkä ngwarbe rabai bätä mrö nika rabai kä jökräbiti tibien niebare Jesukwe (Mateo 24:3, 7; Lucas 21:10, 11). Kukwe tare rakaikä yekwe mikai gare nüna rabaira kä krüte näire niebare kwe nitre ja tötikaka ben yei. Apocalipsis tärä mrä Bibliabätä tä kukwe mike gare bäri nie, ye abokän rübare kä kwinbiti yekwe ja tare nika mikani nakainkä Kä tibienbätä. (Mäkwe recuadro “Rübare Kä tibienbätä, rübare kä kwinbiti” ye mika ñärärä.)

Nitre nibäkä nämene näin mädä jene jenebiti nieta Apocalipsis yebätä. Kukwe tare rabai bare niebare Jesukwe ye bämikata nitre nimä yebiti: ye abokän rü, mrö nika aune bren keta kabre. (Mäkwe recuadro “¿Nitre nibäkä tä mädä jene jenebiti nieta Apocalipsis yebätä ye tä näin?”.) Erametre, Rübare Kri Kena ye köböite ja tare nika jatani krubäte abokän täbe ni näire. Aune Diablu köböite metrere kukwe ye tä nakainkä nieta Bibliakwe (1 Juan 5:19). ¿Ni tärä kukwe ye ketabätäkäre?

Apocalipsis tä mike gare “kä kitera neme braibe” Diablu käne (Apocalipsis 12:12). Yebätä tä rubun krubäte aune tä nitre mike ja tare nike krubäte Kä tibienbätä. Erametre, kukwe tare tä nemen bare abokän nita tuin ye tä mike gare kä nibira krüte Satana käne.

SRIBI DIABLUKWE DIKANTETA

Rübare Kri Kena ye bitikäre nüna ñaka namanina käne ye erere. Ye köböite rü jatani nakainkä krubäte, gobrantre jatani nikwite jabätä aune ja ngökö kwärikwäri. Yekwe bämikani metre Satana kitani kä tibienbätä arato (Apocalipsis 12:9). Gobran töi käme krubäte ie kä ñaka nemena krubäte gobrankäre gare kwin ie ye kwrere Satana ni kä nebätä gobrainkä töita käme krubäte. Kä krütai käne angwane, Rübare Kri Kena köböite kukwe tare jatani nakainkä ye ñaka rabaira.

Kukwe niebare Bibliabätä tä kukwe keta kabrebätä ni mike tö ngwen metre Jesukristo, Rei nikwe kä kwinbiti köböra “sribi Diablukwe dikente” yei (1 Juan 3:8, NGT). Kä nengwane, nitre kwati krubäte niena Gobran ye ribere. ¿Aune mä? Gobran ye köböire, Ngöbö töita ño ye rabai bare Kä tibienbätä ye nitre kukwe kwin nuainkä yekwe tuai (Mateo 6:9, 10). Gobran Ngöbökwe rabai ye ngwane, rü kri aune rü mada ye ñaka rabaita bare jire (Salmo 46:9). Mäkwe Gobran ye mika gare bäri jai aune mä täi nire nüna rabai jäme kä jökräbiti tibien ye tuakäre (Isaías 9:6, 7).

Rübare Kä tibienbätä, rübare kä kwinbiti

Rübare Kri Kena kömikani ye känenkri siklo nikani kwäjätä biti kwä ökän näre ta yete, Diablukwe “juta kä jökräbti temen” ye driebare Jesús ie (Mateo 4:8, 9). Jesukwe ñaka kani ngäbiti, akwa juta jökrä ñaka tä Satana kisete ye ñan niebare kwe, ye bitikäre Satana tä “nitre nünanka Ngöbö rüere dänkiene” niebare kwe (Juan 14:30). Ne madakäre, apóstol Juan niebare: “Kä ngöi jökrä tä Diablu kisete” (1 Juan 5:19, Ngöbö Täräe [NGT], tärä okwä ükaninte).

Satana die tärä yebätä niara köböite Rübare Kri Kena aune ye bitikäre kukwe mada tare jatani nakainkä nieta ye metre, ¿ñan ererea? Erametre, ja tare nika jatani kä jökräbiti tibien kä 1914 yete ja känenkäre ye niara köböite arato nieta tärä Apocalipsis yebätä. Kukwe meden meden rakadrekä tä Apocalipsis kapitulo 12 yebätä ye mikata gare ruäre nete:

Bersikulo 7. Miguel (Jesukristo) rübare mökata (Satana) yebe.
Bersikulo 9. Satana, “tä näin ni ngökö kwati kä jökräbti temen”, ye kitani kä tibienbätä.
Bersikulo 12. “Aingwaree mun nünanka kä temenbtä amne mun nünanka kä butubti mrente. Mun ye abko bobre jakän, ñobtä ñan angwane kä kitera neme braibe diabluye [...], aisete mätä kri mun nünanka kä temenbtä ye rüere.”

Köbö täinta jatäri Bibliakwe aune kukweta nakainkä käbiti tibien ye tä mike gare kä 1914 yete rü namani bare kä kwinbiti, Gobran Ngöbökwe ükaninte kä kwinbiti ye bitikäre.a Kä ye näire rü nakaninkä ketebu: keteiti Kä tibienbätä aune keteiti kä kwinbiti.

a Mäkwe tärä ¿Dre drieta erametre Bibliakwe? ye mika ñärärä kapitulo 8 yekänti, nitre testiko Jehovakwe sribebare.

¿Nitre nibäkä tä mädä jene jenebiti nieta Apocalipsis yebätä ye tä näin?

Ni täkäni mädä ngwenbiti ye rei kä kwinbiti. (Apocalipsis 6:2.) Rei ye abokän Jesukristo, aune tä näin kukwe ükatekäre metre (Salmo 45:4). Sribi mikani käne kisete ye abokän Satana aune chokalitre kitadre kä tibienbätä kwe (Apocalipsis 12:9).

Ni täkäni mädä tainbiti yei ja di biani “kä jäme dian[kakäre] jökrä nikän kä nebtä”. (Apocalipsis 6:4.) Kä 1914 yete ja känenkäre, rü nuainta krubäte kä tibienbätä. Rübare Kri Kena ye bitikäre krire kä nikani grebiti kwati ta angwane Rübare kri Bobukäre aune nitre murie ketani bäri: 60,000,000 näre nieta. Kä 1945 yete ja känenkäre, juta ruäre aibe te rüta akwa ja murie ketata krubäte arato. Nitre ruäre kukwe kira tikaka tä niere siklo XX ye ngwane nitre cien millone biti bäri murie ketani rübare yete.

Ni täkäni mädä drünebiti ye kisete jondron ñäkära tä ye abokän tä mrö nika bämike. (Apocalipsis 6:5, 6.) Rübare Kri Kena ye ngwane, nitre 750,000 krütani mrö miare juta Alemania yekänti ñobätä ñan aune niaratre rüe ñaka namani jondron mike nemen niaratre kisete. Kä 1921 yete nitre Rusia 2,000,000 biti bäri krütani mrö miare, aune kukwe tare ye erere namani bare juta madate. Siklo XX yete nitre 70,000,000 näre krütani mrö miare nieta. Kä nengwane monsotrebiti kä jämi kwärike tä krüte 3,000,000 biti bäri kä kwatire kwatire te ñaka mröre kwin yebätä.

Ni täkäni mädä bä sotrobiti ye abokän tä bren tare krubäte ngwen (Apocalipsis 6:8.) Siklo XX yete bren tare krubäte nikabare ye abokän bren gripe española. Nitre nibe krütani bren ye kisete nie ñaka ja erebe, akwa nitre 50,000,000 krütani nieta. Tärä Man and Microbes tä mike gare: “Bren tare ñan tuabare erere bren ye kisete nitre krütani bäri [...]. Bren ye erere bren bubónica ye kisete nitre ñaka krütani krubäte drekebe ngwarbe”. Bren viruela, malaria aune tuberculosis (mura nöta) ye nemen neketekä ni madabätä arato abokän kisete nitre millon kwati krubäte krütani siklo XX yete.