KUKWE JA TÖTIKARA 10

Ja kukwei kwitadre bä jene jene

Proverbios 8:4, 7

KUKWE MIKATA GARE: Mäkwe ja kukwei kwita bä jene jene ne kwe drebätä mätä blite ye rabadre gare kwin aune nitre törbadre kukwe ye mikai gare bäri jai.

NUAINDRE ÑO:

Ja kukwei mikadre chi o kri. Kukwe bäri ütiäte yekänti mäkwe ja kukwei mika bäri kri kukwe mikakäre gare aune nitre dimikakäre. Kukwe ükaninte nitre blo ben yebätä mäkwe ñäkädre ngwane, ye erere mäkwe nuaindre. Mäkwe ja kukwei mika bäri chi nita töbike krubäte o kä jürä nemen nibätä ye bämikakäre.

Mäkwe ñaka ja kukwei mika kri kukwe jökrä känti ne kwe nitre ñaka nütüdre mätä ñäke ietre. Mäkwe ñaka ja bämika krubäte ne kwe nitre ñaka ja töi mikadre mätä dre nuainne yebätä.
Ja kukwei kwitadre jene jene. Raba ngwane, mäkwe ja kukwei mika jondron nuäi, ngraba nuäi o kä juto nibätä ye bämikakäre nitre töite. Mäkwe ja kukwei mika bäri chi nita ulire o töbikata krubäte ye bämikakäre.
Blitadre jötrö o bätärekä. Kä juto ye bämikakäre mäkwe blita bäri jötrö. Kukwe ütiäte ye mikakäre gare mäkwe blita bäri bätärekä.

Mäkwe ñaka ja kukwei kwita drekebe ngwarbe, ye raba nitre ngwen nikenkä. Kukwe jökrä niedre mrebe ye bäri kwin blitadre drekebe ye kräke.