KUKWE JA TÖTIKARA 6

Texto mikadre gare mrebe

Juan 10:33-36

KUKWE MIKATA GARE: Mäkwe ñaka ñäkä jerekäbe textobätä biti mä rika blite kukwe madabätä. Mä tö kukwe meden mikai gare nitre ie aune texto ye tä kukwe ye mike gare ño ye mäkwe mika gare ietre.

NUAINDRE ÑO:

Kukwe meden kädrieta ye mäkwe kädekate bäri. Mäkwe ñäkädre textobätä ye bitikäre, kukwe meden mä tö mikai gare ye mäkwe kädekate. Ye nuainkäre, mä raba kukwe ye ara kädekete bati bobu o kukwe ngwentari nitre ie ne kwe kukwe ye rabadre gare ietre.

Mäkwe texto kädekadrete ja töibiti kukwe mikakäre gare ngwane, kukwe kädrieta mäkwe ye mikata gare ño texto yekänti ye rabadre gare kwin nitre ie.
Kukwe meden metre ye mäkwe kädekate. Ñobätä mäbike ñäke texto yebätä ye mäkwe mikadre gare ngwane, kukwe kädekateta texto yekänti ye tä kukwe ye mike gare ño ye mäkwe nie.

Mä tädre texto keteiti mike gare ngwane, mäkwe Biblia tuanmetre metaninte. Ye köböire, kukwe nieta mäkwe ye tä Bibliabätä rabai gare nitre ie.
Mäkwe kukwe mika gare nuäre. Kukwe kiakia ñan kädrieta ye mäkwe ñaka kädekate. Kukwe meden niena gare nitre ie aune kukwe kädriei mäkwe ye kräke mäkwe kukwe keta kabre mikadre gare o ñakare yebätä mäkwe töbika kwin.