Nikwe nändre jankunu kukwe metre yebiti

1. Kukwe metre namani gare ño nie yebätä blitadre, ¿ye ñobätä kwin ni kräke?

“¿KUKWE metre namani gare ño mäi?”. Bä kabre nikwe blitabarera kukwe ngwandreta nebätä raba ruin nie. Bäsi käre tä nemen bare ja mräkätre tä nemen gare kena nie ye ngwane. Ñokänti niaratre tä kukwe metre mike täte aune jatani tarere ye ni töta nemen kukwe nuabätä. Aune kukwe metre ye ño ni kräke ye ni töta nemen mikai gare ietre (Rom. 1:11). Nita blite ne kwrere jabe ye köböire jondron ütiäte tä nikwe ye tä nüketa törö nie. Ne tä ja di bien nie ja töi mikakäre bäri nänkäre jankunu kukwe metre yebiti. Ye abokän nüne kä mikakäre juto jankunu Jehovabätä aune kukwe kwin mikadre nemen bare ni kräke yekäre (3 Juan 4).

2. ¿Dre rabai gare nie kukwe ja tötikara nekänti?

² Kukwe ruäre abokänbätä nita kukwe metre tarere ngwainta törö nie. Aune jondron ütiäte tä nikwe yebätä ni raba debe bien ño jankunu rabai gare nie kukwe ja tötikara nekänti. Aune mrä, Jehová jatani ni ngwena juta kwe kokwäre yebätä nikwe debe biain bäri (Juan 6:44). Biti ni tö rabai blitai bäri nitre madabe kukwe metre yebätä.

ÑOBÄTÄ NITA “KUKWE ERA METRE” TARERE

3. ¿Kukwe meden bäri ütiätebätä nita kukwe metre ye tarere?

³ Kukwe keta kabrebätä nita kukwe metre tarere. Jehová kukwe metre bökänkä nita tarere ye bäri ütiäte. Niara dite krubäte, niara kä kwin aune kä tibien Sribekä namani gare nie niara kukwei Biblia ye köböire. Niara ni Rün kä kwinbiti tä ni tarere aune töita nibätä ye bäri ütiäte (1 Ped. 5:7). “Ngöbö ni mike tuin bobre jai aune moto kwin, ni ngübare bätärekä, ni tarere metre aune kukwe metre niere” ye gare nie (Éx. 34:6). Niara tä kukwe metre ye tarere (Is. 61:8). Jehová ñan tö ni tuai ja tare nike aune köbö kitani kwe ja tare nika diankakäre ye niara tä ngübare kisere (Jer. 29:11). ¡Köbö ye rükadre gwä ngwane ye nita ngübare! Kukwe yebätä Jehová tare krubäte nikwe.

4, 5. Jä doboko kitata mrente nguse ru ketabätäkäre ye kwrere tödekara nikwe, ¿ye ñobätä Pablokwe niebare?

⁴ Kukwe madabätä nita kukwe metre tarere ye abokän tä ni dimike nita nüne ño yebätä. Ñodre, kukwe kwin rabai bare ja känenkäre ye abokän tödekara kwin Biblia tä käbämike nie. Kukwe ye ngwankäre törö Pablo tikabare: “Ngöbökwe jändrän köböi mikani nie, bti nita tödeke, ye abko jä doboko ye kwrere, ñobtä ñan angwane nita tödeke Ngöböbti ye abko käta ni mike nünenkä dite jabtä” (Heb. 6:19). Jä doboko kitata mrente nguse tä ru ketete dime, ye kwrere tödekara kwin Bibliabätä ye tä ni mike dite aune töi jämebiti ja tuakäre kukwe tare yebe.

⁵ Pablokwe kukwe ne niebare ngwane, nämäne blite nitre dianinkä nänkäre kä kwinbiti yebätä. Akwa arato nitre kristiano tä tö ngwen nüna kärekäre kä tibienbätä ye kräke kukwe ne niebare kwe arato (Juan 3:16, TNM). Erametre, tödekara nünakäre kärekäre ye köböire nita nüne kä jutobiti.

6, 7. ¿Biblia tä kukwe niere kä ja känenkärebätä ye käkwe Yvonne dimikani ño?

⁶ Kukwe namani bare meri iti testiko kädekata Yvonnebätä ye ani mike gare jai. Niara ririabare mräkätre ñan testiko ye ngätäite. Ye medenbätä nämäne chi ngwane, gata jürä nämänebätä. Bati ñäkäbare kwe täräbätä aune kukwe ne kwani ie: “Bati köbö jetebe se kwrere jondron jökrä riaikä”. Niara tä niere: “Kukwe ne ñan nämä ti ngwen ja düke deu. Ti nämä töbike krubäte kä ja känenkäre yebätä. Aune ti rababa niere jai: ‘Ja nire ne abokän ñan jerekäbe kore. ¿Tita dre nuainne nete?’. ¡Ti ñan tö rababa krütai!”.

⁷ Yvonne nämäne bati ngwane, nitre testiko Jehovakwe namani gare ie. Niara tä niere: “Nüna ja känenkäre kä tibienbätä kä bä nuäre yete ye ie ti jataba tö ngwen”. Kukwe metre namani gare ie ye käkwe dimikanina krubäte, yebätä tä niere: “Töbikakwe kä ja känenkäre yebätä o gata yebätä ñan jatabara ti ngwen ngwätere krubäte ti nämä niken ja düke ye ngwane”. Yvonne kräke ja nire ye ütiäte krubäte ye ñan ni töi mike niä, yebätä niara töta nemen blitai krubäte nitre madabe tödeka kwe yebätä (1 Tim. 4:16).

8, 9. a) Ni brare iti ie jondron ütiäte kwani aune ye namani ütiäte krubäte kräke, ¿ye bämikani ño kwe Jesukwe kukwe bämikani yekänti? b) ¿Kukwe metre ye tuin ño mäi?

⁸ Kukwe kwin Gobran Ngöbökwe ye kite kukwe metre drieta Bibliakwe yebätä arato. Jesús kukwe metre ye bämikani jondron ütiäte tä kwen nie yebätä. Niebare kwe: “Kä gobrankrä Ngöbökwe abko ngwian kabre tädre rükaninte dobote nguse ye kwrere abko krörö: Ni iti nämane sribire ye känti ngwian kabre ütiäte kri ye kwani ie angwane, niara käkwe ngwian ye ükaninta känime kä ye känti. Abti nikani, käkwe jändrän kwe erere rürümoinbare jökrä, bti nikani käkwe kä ye kökani jakrä, niara rabadre ngwian kabre ye bkäne abkokäre” (Mat. 13:44). Mikata gare erere ni brare iti ne ñan nämäne jondron ütiäte ye känene. Akwa kwani ie ngwane, kukwe ñan nuäre nuainbare kwe jondron ütiäte ne rabadre kwe yekäre: jondron nämäne kwe ye jökrä rurubäinbare kwe. ¿Ñobätä nuainbare kwe? Ñan ñobätä aune jondron kwani ie ne bäri ütiäte jondron nämäne kwe rurubäindre kwe ye kräke.

⁹ ¿Kukwe metre ye tuin kore mäi arato? ¡Jän, raba ruen nunye! Nita sribire kä jutobiti Jehová kräke aune tödeka nikwe nünankäre kärekäre Gobran Ngöbökwe yete, ye keta ñan raba kukwe käbämikata kä nebätä yebe, ye gare metre nie. Kukwe jökräbätä nita ja di ngwen ja ketakäre kwin Jehovabe ye kwin ni kräke. Nita ja kete Jehovabe ye ütiäte krubäte ni kräke. Aune kukwe mada ñan jire raba kä mike juto nibätä nita Jehová mike täte ye kräke (Col. 1:10).

10, 11. ¿Dre käkwe Michael dimikani ja töi kwite täte kukwe nuain nämäne kwe yebätä?

¹⁰ Nitre kristiano kwati käkwe kukwe ñan nuäre nuainbare kä mikakäre juto Jehovabätä. Ruäre käkwe ja tötika ja mikakäre ütäte ütiäte kä tibienbätä ye tuanimetre. Mada abokän, käkwe ñan ja töi mikani niken jankunu jondron känebätä jiebiti. Ruäre abokän käkwe ja töi kwitani täte nämäne dre nuainne yebätä. Ye erere namani bare Michaelbätä. Niara ñan ririabare mräkätre kukwebätä ye ngätäite. Nämäne ja kite ja metabätä. Niara tä niere: “Ti nämä dite aune kwin yebätä ja nämä ruin kwin tie. […] Aune ti ganain ñan raba jire nämä ruin tie”. Akwa jatani ja tötike Bibliabätä ye ngwane, Jehová töita ño ja nuainta tare yebätä nükani gare ie (Sal. 11:5). Ja mräkätre gure testiko käkwe tötikani Bibliabätä, yebätä nieta kwe: “Tikwe ja kita ja metabätä ye tuadremetre ñan nieba jire kwetre tie, ñakare aune ja töi mikaba kwatibe kwetre kukwe metre ye driere tie”.

¹¹ Michael ie kukwe jatani nemen gare bäri Jehovabätä ngwane, jatani tarere bäri. Kukwe keteiti mada matani niara brukwäte ye abokän, nire tä sribire Jehová kräke ye tä mike tuin bobre jai. Michael rabadre kukwe den nuaindre jai ye käkwe niara nämäne nüne ño ye kwite täte ye nükani gare Michael ie. Niara tä niere: “Tikwe ja meta ye tuadremetre ye kukwe bäri ribi nämä nuaindre tie. Akwa ye käkwe kä mikadre juto Jehovabätä ye nämä gare tie aune tikwe ñan ja di ngwain ngwarbe nämä gare metre tie arato”. Kukwe metre driebare Michael ie ye mikani ütiäte kwe jai aune kukwe metre kwani ie ye nükani gare ie, ye käkwe niara dimikani ja töi kwite täte nämäne nüne ño yebätä (Sant. 1:25).

12, 13. ¿Kukwe metre Bibliabätä ye käkwe Mayli dimikani ño?

¹² Kukwe metre ye ütiäte mikakäre gare, Biblia tä kete ñotra träta nemen deu ye kwrere (Sal. 119:105; Efes. 5:8). Mayli, nünanka kä Azerbaiyán, tä debe bien krubäte ñan ñobätä aune Biblia Ngöbö Kukwei tä ji trä tike niara käne. Niara mräkätre tä kukwe ketebu mike täte: rün kwe musulmán aune niara meye judía. Mayli tä niere: “Ngöbö tärä ye ti nämä mike era jai, akwa kukwe ruäre ñan nämä nüke gare tie. Ti nämä ngwentari jai: ‘¿Ñobätä ni sribebare kwe? Nita nire ngwane ni ngwanta ja tarenike, bitikäre ni ngwain ja tarenike bäri kä ñukwäre te, ¿ye erere akräke drekäre nita nire?’. Kukwe jökrä ye tä nemen bare Ngöbö töi köböire nieta nitrekwe, ye nämä ti ngwen töbike: ‘Muñeco ngwanta ngrenkä jondron ñokwa nuainkäre, ¿ye erere nita Ngöbö kisete? ¿Nita ja tarenike ye Ngöböta käi ngwen juto jabätä?’”.

¹³ Mayli nämäne kukwe ngwentari jai yebätä nämäne kukwe känene jankunu. Ja känenkäre, ja tötika Bibliabätä kani ngäbiti kwe. Biti ja mikani kwe testiko Jehovakwe. Tä niere: “Kukwe metre mika nämä gare Bibliabätä rababa gare tie ye käkwe ti töi mikaba jäme aune ti dimikaba ja nire ye mike tuin jene jai”. Mayli erere, “mun nämane nüne kä ikote Ngöbö okwä bäre mento, akwa Ngöbö ara jire käkwe mun käräbareta nüne kä trä kuin bä nuäre jen kwe te”, yebätä nunta Jehová mike täte aune käikitekä (1 Ped. 2:9).

14. ¿Ni raba dre nuainne kukwe metre ye tarekäre bäri? (Recuadro “Kukwe mada bämikata” mikadre ñärärä).

¹⁴ Kukwe metre ye ütiäte krubäte bä mirira nie párrafo ruäre nekänti. Metrere kukwe mada nüke bäri ni töite. ¿Ñobätä ni ñan ja töi mike kukwe mada känene bäri kukwe metre ye tarekäre? Ni jatai kukwe metre ye tarere bäri ngwane, nita tarere metre ye ni tö rabai bämikai.

KUKWE METRE TARE NIKWE NITA BÄMIKE ÑO

15. ¿Kukwe meden keteitibiti kukwe metre tare nikwe nita bämike?

¹⁵ Kukwe metre tarekäre bäri nikwe ja tötikadre Bibliabätä aune täräkwata dianinkä Bibliabätä yebätä. Ni niena kira kukwebätä o bitinkä kukwebätä, akwa käre kukwe mrä tä mikadre gare jai nie. Tärä ne sribebare kena inglere tä niere: “Kriblü chi tä kä nötare te abokän känti kiangätä käme tä nirien bäri abokän käta bäsi kämike, ye kwrere kukwe metre bämikata. Kwandre mä ie mä tö ngwane, mäkwe ja ngwan mokre; [...] mä tö rabai nemen bäkäne ngwane, mäkwe ja mikate kwintubu diankäre jai. Kriblü kwatibe kukwe metrebätä tä mäkwe, ye ñan aibe raba debe mä kräke. [...] Mäkwe ükakrö jankunu; mäkwe känä jankunu”. Ja tötikakäre Bibliabätä ni rabadre ja di ngwen, akwa ye kwin ni kräke.

16. ¿Mäta ja tötike ño köböire tä nemen bare kwin mäi? (Proverbios 2:4-6).

¹⁶ Ñäkädre täräbätä aune ja tötikadre ye ni kwati ñan töta nemen nuain, akwa nikwe ja tötikadre Jehovata ribere nie ne kwe kukwe metre ye rükadre gare nie (ñäkädre Proverbios 2:4-6 yebätä).b Nikwe ne erere nuaindi ngwane, käre kukwe kwin rabai bare ni kräke. Ja mräkä iti kädekata Corey tä ñäke Bibliabätä ngwane, tä töbiketari bersikulo keteitibebätä nieta kwe. Niarata niere: “Tita nota mike ñärärä, referencia marginales yebätä tita kukwe känene. […] Ye köböire kukweta nüke gare bäri kwin tie”. Mätä ne erere nuainne o mäta nuainne jene, akwa mäkwe ja di ngwain aune kä diainkä jai ja tötikakäre Bibliabätä, yebiti mäta kukwe metre tarere mäkwe bämikai (Sal. 1:1-3).

17. ¿Nünandre kukwe metrebätä ye dre gärätä? (Santiago 1:25).

¹⁷ Metrere, ja tötikata Bibliabätä ye ñan ngörä. Kukwe metre rabadre gare kwin nie yekäre, nikwe nünandre kukwe metre ye ererebätä, ye abokän dreta nemen gare nie ye erere nikwe nuaindre. Ye köböire kukwe metre tä nikwe raba kä juto metre bien täte nie (ñäkädre Santiago 1:25 yebätä). Kukwe metre ererebätä nita nüne, ¿ye ni raba mike gare ño jai? Dre nuainta kwin nikwe aune dre nuain raba bäri kwin ye mikakäre gare jai, nikwe ja trä tuadre nieta ja mräkä itikwe. “Nikwe nünandre ño Ngöbö ngwärekri nena gare nie, ye kwrere nikwe nünandre” jankunu mikani gare Pablokwe (Filip. 3:16).

18. ¿Ñobätä nita ja di ngwen krubäte nänkäre “kukwe era metre Ngöbökwe” yebiti?

¹⁸ Nita ja di ngwen krubäte “kukwe era metre Ngöbökwe” ye nuainkäre, ye köböire kukwe kwin tä nemen nikwe yebätä töbike. Nita nemen nüne bäri kwin ye ñan ngörä, ñakare aune nita kä mike juto Jehovabätä aune ni mräkätre ja üairebiti yebätä (Prov. 27:11; 3 Juan 4). ¡Kukwe mada ñaka bäri kwin kukwe metre tarekäre aune nünankäre kukwe metre ye ererebätä!