KUKWE JA TÖTIKARA 7

Kukwe metre yebiti diridre

Lucas 1:3

KUKWE MIKATA GARE: Kukwe meden metre yebiti mäkwe nitre dimika kukwe kwin mike gare jai.

Kukwe metre yebätä mäkwe kukwe känändre. Kukwe Ngöbökwe tä dre niere ye erere mäkwe nie aune mäkwe ñäkäbätä. Nitre ja tötikaka krikri tä kukwe niere, noticia, kukwe namani bare mikata gare o kukwe mada mada tä ükaninte kwin o ñakare ye mäkwe mika gare jai.
Mäkwe kukwe dianinkä ye erere mäkwe mika gare. Mäkwe texto mikadre gare ngwane, Jehová tö dre mikai gare nie bersikulo yebiti ye mäkwe mika gare jai. Arato kukwe drieta Bibliabätä aune “ni klabore ie tö ngwan raba bätä töbätä” tä tärä sribere ye erere mäkwe kukwe mika gare (Mt. 24:45, TNM). Nitre mada tä tärä sribere yebätä mäkwe kukwe diandrekä ngwane, ñokäre aune ñobätä kukwe ye tikani ye mäkwe mika ütiäte jai.

Kukwe mikata gare ye erere mäkwe nie. “Nitre ruäre” nieta ngwane mäkwe ñaka “nitre kwati krubäte” nie, “ruäre ngwane” nieta ye täte mäkwe ñaka “käre” nie.
Mäkwe nitre dimika töbike kwin. Mäkwe ñäkädre textobätä o mäkwe kukwe dianinkä täräbätä ye mikadre gare ye bitikäre, mäkwe kukwe ngwantari o mäkwe kukwe bämika nitre dimikakäre kukwe mike gare akwle jai.