Salomón namani gobrane Israel ye ngwane, Jehovakwe ngwantaribare ie: ‘¿Ti dre biandre mäi ie mä tö?’. Salomón niebare ie: ‘Ti tä monsore krubäte jondron nuain jämi gare kwin tie. Mä raba ti mike töbätä ne kwe ti rabadre juta mäkwe ngübare kwin’. Jehová niebare ie: ‘Ti mä mikai töbätä mä ribeni tie ye erere, ti mä mikai bäri töbätä nitre kä jökräbiti tibien ye ngwä. Arato, tikwe jondron biain krubäte mäi aune mäkwe ti mikai täte ngwane mäkwe nünain raire’.

Salomón templo ye kömikani. Oro, jondron ngwiane, tabla aune jä yebiti sribi nuainbare kwe. Jondron ye jökrä namani ütiäte. Nitre brare aune meritre kwati krubäte ie sribi nämene gare kwin yekwe sribibare. Kä nikani kwä kükü ta ngwane templo namani bare täte. Angwane kä nükani templo ye mikakäre gare Jehovai, aisete kä jondron kukwakäre yebiti jondron mikani kukwadre. Salomón namani ngukodokwäbiti kä jondron kukwakäre ye känenkri aune orabare kwe: ‘Templo bäri kri aune bäri bä nuäre krubäte tädre mäkwe templo ne kräke. Akwa, nunta mä mike täte ye mä raba kain ngäbiti aune nunta orare mäi ye mä raba kukwe nuin’. ¿Dre namani bare? ¿Templo ye namani tuin kwin Jehovai? ¿Salomón orabare ye niarakwe kukwe nuani? Salomón orabare ünä ye ngwane, ñukwä kä kwinbätä näkäni tibien aune kä jondron kukwakäre yebiti jondron nämene mikani ye kukwani kwe. Yebiti Jehovakwe bämikani templo ye namani kwin krubäte kräke. Ye jutuabare nitre Israel ie angwane kä namani juto krubäte bätätre.

Rei Salomón namani gare kwin nitre jökrä Israel yei aune kä mente känti arato, ñobätä ñan aune niara nämene töbätä krubäte. Nitre nämene niken känti ne kwe kukwe nämene nitre ye kisete ye niara rabadre dimike ükete. Arato reina kä Seba yekänti nikani kukwe ñaka nuäre ngwantarikäre ie, niara töi gakäre. Salomón kukwe ye mikani gare ie ngwane, niebare kwe: ‘Nitre kukwe mikani gare mäbätä tie ye tikwe ñaka mikani era jai, mä abokän töbätä nieba tie, akwa matare nibira gare tie mä bäri töbätä. Jehová Ngöbö mäkwe ye tä kukwe kwin mike nemen bare mä kräke’. Juta Israel yekänti nitre nämene nüne kwin aune kä nämene juto bätätre. Akwa, ye erere ñaka namani bare jankunu.

Salomonkwe Jehová mikani täte ye ngwane nitre nämene nüne jäme Israel. Akwa niara ja mäkäninte meritre kwati juta mada madate yebe aune meritre ye nämene jondron ngwarbe üai sribeta ngöböre ye mike täte. Bätärekä bätärekä, Salomón jatani ja töi kwite aune namani jondron ngwarbe üai sribebare ngöböre ye mike täte arato. Jehová namani rubun krubäte aune niebare kwe ie: ‘Tikwe gobran ye diainkä juta Israel yete mä mräkätre yekän aune tikwe ñäkäibiti ketebu. Tikwe kä bäri ere ye biain ni sribikä mäkwe iti ie aune mä mräkätre yekwe gobrain kä braibebiti’.

Jehovakwe kukwe mada nuainbare ne kwe dre niebare kwe ye rükadre gare kwin nitre jökrä ie. Nitre sribikä Salomonkwe ye iti, kädeka nämene Jeroboán nikani kä madakänti aune ji ngrabare niara ngätäni ni Ngöbö kukwei niekä Ahíya yebe. Ni Ngöbö kukwei niekä nämene dän ngwen jabätä ye ötaninte kwe 12 kiakia aune niebare kwe Jeroboán ie: ‘Salomón mräkätre yekän Jehová bike gobran denkä aune bike ñäkebiti ketebu. Dän oto ne den öta jätä jai, ñobätä ñan aune mä rabai reire nitre juta keta jätä yebiti’. Dre nakaninkä ye namani gare Salomón ie ngwane, tö namani Jeroboán murie ketai. Aisete Jeroboán ngitiani Egipto. Ja känenkäre Salomón krütani aune ngobo kwe Rehoboam namani gobrane täte. Angwane Jeroboán nütübare kukwe tare ye nikanina ta aune nikaninta Israel.

Ye bitikäre nitre umbre ji ngwanka Israel ye käkwe niebare Rehoboam ie: ‘Mäkwe kukwe kwin nuaindi nitre kräke angwane niaratre ja ngwandi metre mäi’. Akwa nitre ja ketamuko bäri bati kwe yekwe niebare ie: ‘Mäkwe ñaka kukwe kwin nuain nitre kräke. Mäkwe niaratre mika sribire bäri ja dibiti’. Rehoboam ja ketamukotre bäri bati ye kukwei mikani täte aune nitre mikani ja tare nike kwe. Angwane nitre ye namani rubun kräke aune Jeroboán mikani reire nitre juta kwä jätä yebiti. Juta keta jätäbiti gobran namani ye abokän kädekani gobran Israel. Aune gobran namani juta ketebubiti ye kädekani gobran Judá aune ja ngwani metre kwetre Rehoboam ie. Ye erere juta 12 Israel ye ñäkäninbiti.

Jerusalén yete Rehoboam nämene gobrane. Jeroboán ñaka tö namani juta kwe tuai niken kä yekänti Jehová mike täte. ¿Ñobätä gare mäi? Ñobätä ñan aune nane nitre ye käkwe ñaka niara kukwei mikadre täte ñakare aune Rehoboam kukwei mikadre täte kwetre ye jürä namanibätä. Aisete, nibi ngäbä orore sribebare krobu kwe aune juta kwe yei niebare kwe: ‘Jerusalén tä mente krubäte. Mun raba jerekäbe nete nibi ngäbä orore ne mike täte’. Nitre ye niara kukwei mikani täte aune Jehová käi kwitaninkä kwetre jabiti bobukäreta.