¿Kukwe mikata gare Apocalipsibätä ye tä dre mike gare mä kräke?

1, 2. ¿Kukwe keteiti medenbätä tärä Apocalipsis rabadre tuin ütiäte krubäte nie?

¿MÄ TÄRÄ üai tä ükaninkrö ni madakwe ye tuente? Nitre kwati ñan gare mäi tä üaibätä yete. Akwa batibe üai keteiti käkwe mä töi miri niä. ¿Ñobätä? Ñobätä ñan aune mä üai tä yete arato. Ñongwane aune medente, nire nire tä yete, ye mä tö ngwainta törö jai. Aisete üai ne tuin jene mäi, tä kukwe ütiäte ngwenta törö mäi.

² Tärä Apocalipsis ye üai ye kwrere. ¿Ñobätä? Kukwe ketebubätä. Kena, ñobätä ñan aune tärä ye tikani ni kräke. Kukwe ne kömikata krörö: “Kukwe mden mden rakadikä bä jötrö abko rabadre gare nie abko Ngöbökwe mikani Jesukristo kisete mikakäre gare sribikä kwekwe ie” (Apoc. 1:1). Aisete tärä ye ñan nitre jökrä kräke, ñakare aune ni Ngöbö mikaka täte ye kräke. Yebätä profecía ye ni tä mike nemen bare siba ye ñaka rabadre ni töi mike niä, ni tä üai yebätä arato.

3, 4. Tärä Apocalipsis tä mike gare erere, ¿ñongwane profecía ye rabai bare aune ye käkwe ni töi mikadre dre nuainne?

³ Kukwe ketebu abokän köbö ño näire profecía ne rabadre nemen bare yebätä ütiäte krubäte. Köbö yebätä apóstol Juan blitabare. Niebare kwe: “Ti nämä Ngöbö Muriebiti, köbö Ji dokwäte krikwe näire” (Apoc. 1:10, NGT). Apóstol Juan kukwe ye tikabare kä 96. Ye näire “köbö ji dokwäte krikwe” ye nämä mente ja känenkäre (Mat. 25:14, 19; Luc. 19:12). Profecía keta kabre Bibliabätä tä mike gare kä 1914 Jesús namani gobrane kä kwinbiti, ye ngwane köbö ye kömikani. Profecía tä tärä Apocalipsibätä abokän tä blite juta Ngöbökwebätä arato ye jatani nemen bare kä yete ja käne. Aisete “köbö ji dokwäte krikwe” ye näire nita nüne.

⁴ Nita nüne köbö ütiäte näire yebätä mäträta nibätä ja tare yebiti Apocalipsis 1:3 yete ye nikwe ngwandre törö jai: “Kukwe biani Ngöbökwe ni Ngöbö kukwei niekä neye, nebtä nire nire käkwe ñäkädre amne nire nire käkwe kukwe nuadre amne mikadre täte kwe, ni yebtä abko kä rabadi nuäre kri, ñobtä ñan angwane kukweta tikani tärä nebtä kebera nakainkä”. Metrere ni rabadre ñäke profecía yebätä ja kukwei kribiti, ni rabadre kukwe nuin aune mike täte. ¿Kukwe ruäre ye meden ni rabadre mike täte?

MÄTA JEHOVÁ MIKE TÄTE YE TÄ KAIN NGÄBITI O ÑO YE MIKE GARE KWIN JAI

5. Nita Jehová mike täte ye tä kain ngäbiti o ño nikwe mikadre gare kwin jai ye ütiäte krubäte, ¿ye tärä Apocalipsis tä mike gare ño nie?

⁵ Dre tä nemen bare konkrekasion keteitire keteitire te ye gare kwin Jesús ie ye nemen gare metre nie tärä Apocalipsis kapitulo kena yebätä (Apoc. 1:12-16, 20; 2:1). Kukwe juani kwe konkrekasion keta kükü Asia Menor ie ye tä mike gare kukwe ne abokän metre. Nitre kristiano siklo kena nämäne Jehová mike täte ye nämäne kain ngäbiti o ño ye rabadre gare metre ietre yekäre, tärä yebiti mäträbare metre kwe bätätre niaratre dimikakäre. Mäträbare kwe ye tä nitre Ngöbö mikaka täte kä nengwane ye dimike arato. ¿Ye tä dre driere nie? Nita ño ja üairebiti ye gare kwin ni jie ngwanka Jesukristo ie. Niara tä ni dimike, ni kriemike aune kukwe kiakia ye gare jökrä ie. Nikwe Jehová mikadre täte ne kwe ni kadre ngäbiti jankunu kwe yekäre nikwe dre nuaindre ye gare kwin ie. Kukwe ruäre niebare kwe mäträkäre aune ni rabadre mike täte kä nengwane ye ni bike mike gare jai.

6. a) Apocalipsis 2:3, 4 tä niere erere, ¿dre nämäne nakainkä nitre kristiano Efesobätä? b) ¿Kukwe ye tä dre driere nie?

⁶ (Ñäkädre Apocalipsis 2:3, 4 yebätä). Nikwe Jehová tarebare ño kena ye ñaka rabadre nente nikän. Jesukwe kukwe mikani gare nitre kristiano Efesio ie, ye abokän niaratre kä ngwani nüke jai aune sribibare jankunu kwetre kukwe tare yebiti ta mikani gare kwe. Akwa niaratre ñaka jatanina Jehová mike täte käne erere. Nämänentre Jehová mike täte ye Jehová rabadre kain ngäbiti yekäre rabadre Jehová tarere käne erere. Ye erere tä nemen bare kä nengwane. Nikwe kä ngwandre nüke jai ye ñaka ngöräbe, ñakare aune nikwe nuaindre kukwe kwin töire. Nita dre nuainne ye ñan aibe Jehovata mike ñärärä, ñakare aune ñobätä nita nuainne ye mikata ñärärä kwe arato. Dre töire nita kukwe nuainne ye ütiäte krubäte niara kräke. Nita niara tarere aune debe bien ie yebätä nikwe niara mikadre täte ye ie niara tö (Prov. 16:2; Mar. 12:29, 30, TNM).

7. a) Apocalipsis 3:1-3 tä niere erere, ¿kukwe meden nämäne nakainkä konkrekasion Sardis yebätä jutuabare Jesús ie? b) ¿Ni rabadre dre nuainne?

⁷ (Ñäkädre Apocalipsis 3:1-3 yebätä). Nikwe ja ngwandre ngwäte aune mokre jankunu. Konkrekasion Sardis yebätä kukwe jene nämäne nakainkä. Kenanbe nämänentre sribi ja üaire nuainne krubäte akwa ye bitikäre ñaka jatanintre sribi ja üaire ye töibikaire. Yebätä niaratre rabadre nüketa ngwäte niebare Jesukwe ietre. Kukwe nieta nete ne ni mikakäre mokre. Ni tä dre nuainne ye Jehová ñaka käi kwitekä jabiti ye tä gare metre nie (Heb. 6:10). Ni sribibarera Jehová kräke käne yebätä ni ñaka sribidre kä nengwane ye ni ñaka nütüdre. Ni nämäne sribire käne ye erere ni ñan raba nuainne, akwa sribi ni dänkienkwe yebätä nikwe ja kitadre ja di ngöibiti, ja ngwandre ngwäte aune mokre nememe kä krüte näire (1 Cor. 15:58; Mat. 24:13; Mar. 13:33).

8. ¿Jesukwe kukwe niebare nitre kristiano Laodicea ie yebätä dre raba nemen gare nie? (Apocalipsis 3:15-17).

⁸ (Ñäkädre Apocalipsis 3:15-17 yebätä). Nikwe Jehová mikadre täte kä jutobiti aune ja brukwä tätebiti. Jesukwe kukwe juanbare nitre kristiano Laodicea ie yekänti niaratre nämäne ja tuin kukwe madabe mikani gare kwe. Niaratre nämäne Jehová mike täte ye abokän nämäne “krube”. Metrere niaratre nämäne gaikrä aune bobre niebare Jesukwe, yebätä nämänentre Jehová mike tuin ño käne jai ye erere rabadre miketa tuin jai (Apoc. 3:19). ¿Kukwe ne tä dre driere nie? Ni ñan niena Jehová mike täte kä jutobiti käne erere ngwane, ni rabadre debe bien bäri Jehová ie aune juta kwe tä kukwe ja üaire bien nie yebätä (Apoc. 3:18). Ni ñaka tö jerekäbe ja töi mikai nünanbätä kwin, ñakare aune kukwe ja üaire ye tädre bäri ütiäte ni kräke kä nengwane.

9. Jesukwe kukwe niebare konkrekasion Pérgamo aune Tiatira ie ye ererebätä, ¿kukwe medenbiti ni rabadre ja ngübarebiti?

⁹ Nitre apóstata tä kukwe ngwarbe driere ye ñaka kadre ngäbiti. Jesukwe mäträbare metre ta nitre kristiano Pérgamo yebätä, ñobätä ñan aune niaratre nämäne nitre ñäkebiti aune kukwe ngwarbe driere (Apoc. 2:14-16). Madakäre abokän, nitre kristiano Tiatira ye ie kwin niebare kwe ñobätä ñan aune “kukwe ütiäte Satanakwe tä ükani kaibe” ye niaratre ñaka kani ngäbiti aune töi mikani kwe ja töi miketa kwatibe kukwe metre yebätä (Apoc. 2:24-26). Nitre kristiano nämäne tibo ja üairebiti aune ja tuanimetre kwe ngökadre kukwe ngwarbe Satanakwe ie yebätä rabadre ja töi üketeta. Jehová töi ño ererebätä ñaka kukwe drieta ye ni ñaka tö kain ngäbiti. Nitre apóstata tä tödeke erametre Jesubiti kwrere jire ja bämikata kwetre, akwa tätre kukwe nuainne kämekäme yebätä abokän Ngöbö di kri mikata ngwarbe kwetre (2 Tim. 3:5). Ni ja tötikaka kwin Bibliabätä ngwane, rabai nuäre ni kräke kukwe ngwarbe drieta ye mikakäre nüke gare kwin jai aune ñaka kain ngäbiti (2 Tim. 3:14-17; Jud. 3, 4).

10. ¿Jesukwe kukwe niebare konkrekasion Pérgamo aune Tiatira ie yebätä kukwe meden mada raba nemen gare nie?

¹⁰ Ni nemen kämekäme jabe ye ni ñaka rabadre nuainne aune kain ngäbiti jire chi. Pérgamo aune Tiatira yete kukwe mada jene nämäne nemen bare. Nitre nämäne nemen kämekäme jabe ye nitre ruäre kristiano nämäne kain ngäbiti yebätä Jesukwe mäträbare bätätre (Apoc. 2:14, 20). Nita mekerabe kukwebätä o sribi ütiäte ütiäte tä nikwe juta Jehovakwe te, akwa rabata kämekäme ni madabe ye nita nuainne ngwane, Jehovakwe ñaka ni kai ngäbiti jire chi ye tä nemen gare metre nie kukwe nebätä (1 Sam. 15:22; 1 Ped. 2:16). Ja ngwanta käme krubäte kä nengwane, akwa nikwe Jehová kukwei mikadre täte käre ye ie niara tö (Efes. 6:11-13).

11. ¿Nükebe nete dre nibira gare nie? (Recuadro “Kukwe ja töi kräke nie” ye mikadre ñärärä).

¹¹ ¿Kukwe nibi gare nie ye ni rabadre mike gare ño kukwe braibebiti? Nita Jehová mike täte ye tä kain ngäbiti o ño nikwe mikadre gare jai ye ütiäte krubäte nibi gare nie. Nita kukwe käme nuainne ye ngwane jötrö ngwarbe nikwe ja töi kwitadre (Apoc. 2:5, 16; 3:3, 16). Jesukwe kukwe juani konkrekasion ie yete kukwe madabätä blitata arato. ¿Drebätä blitata?

MÄ TÄDRE JUTO JA TUAKÄRE KUKWE TARE BEN

12. ¿Kukwe mikani gare konkrekasion Esmirna aune Filadelfia ie yebätä dre nemen gare nie? (Apocalipsis 2:10).

¹² Kukwe mikani gare konkrekasion Esmirna aune Filadelfia ie yebätä ani blite. Nitre kristiano rabadre ja tuen kukwe tare ben ye ngwane ñaka rabadre kä jürä ngwen jabätä, ñobätä ñan aune Jehovakwe kukwe kwin mikadi nemen bare kräketre ye niebare Jesukwe ietre (ñäkädre Apocalipsis 2:10 yebätä; 3:10). ¿Kukwe mikani gare ye tä dre driere nie? Kukwe tare ben nikwe ja tuadi ye nikwe ngübadre aune ni tädre juto biarebe kä ngwankäre nüke jai (Mat. 24:9, 13; 2 Cor. 12:10). ¿Nikwe kukwe ne ngwandre törö jai ye ñobätä ütiäte krubäte?

13, 14. ¿Kukwe mikata gare Apocalipsis kapitulo 12 ye köböite dre nemen bare juta Ngöbökwe yebätä?

¹³ Tärä Apocalipsis tä niere erere köbö kri ni ji dokwä ngwankakwe, ye abokän ni näire, ye ngwane ni Ngöbö mikaka täte ye rüere ja mikadi. Gobran Ngöbökwe kömikani kä kwinbiti ye bätäräbe rü nakaninkä kä kwinbiti ye mikata gare kapitulo 12 yebätä. Miguel abokän Jesukristo mikani ütiäte aune nitre rükä kwe ye käkwe rübare Satana aune chokalitre yebe (Apoc. 12:7, 8). Kukwe namani bare nekänti Satana aune chokalitre ye ganainbare aune kitani kwintimo känti tä ni jökrä mike ja tare nike krubäte (Apoc. 12:9, 12). ¿Akwa kukwe namani bare ye tä dre mike nemen bare nitre kristiano yebätä?

¹⁴ Ye bitikäre, Satanakwe ja ngwani ño ye tärä Apocalipsis tä mike gare nie. Ñaka raba nemen kä kwinbiti yebätä nitre ji ngwanka dianinkä üai demebiti gobrankäre Jesús ben abokän tä kä tibienbätä ‘blitakäre Jesu kräke’, ye Satana tä mike ja ngie nuin (Apoc. 12:17; 2 Cor. 5:20; Efes. 6:19, 20). ¿Profecía ne namanina bare ño?

15. Nitre “testiko nibu” kädekateta Apocalipsis kapitulo 11 yebätä, ¿ye abokän nire aune dre nakaninkäbätä?

¹⁵ Nitre käme ja mikani Jehová rüere ye Satana käkwe töi mikani nitre dianinkä üai demebiti nämäne kukwe drie jie ngwen ye rüere ja mike. Ja mräkätre ruäre yekwe sribi ütiäte ütiäte nämäne kwetre juta Ngöbökwe te. Niaratre ye abokän nitre “testiko nibu”b murie ketai kädekateta tärä Apocalipsis yebätä (Apoc. 11:3, 7-11, TNM). Ja mräkätre ni kwä nämäne kukwe drie jie ngwen yebätä kukwe ngwarbe niebare aune kä 1918 yete kitani ngite kä kabre te. Nikwe töbikadretari kukwe nebätä ngwane, kukwe drie ye mikani krüte raba nemen ruin nie.

16. ¿Batibe kore dre namani bare kä 1919 aune yete ja käne Satana tä dre nuainne?

¹⁶ Kä näin braibe ta biti nitre “testiko nibu” ne rükaita nire mikata gare profecía tä tärä Apocalipsis kapitulo 11 yebätä. Niaratre kitani ngite ye käi jämi niken kwati ta ngwane batibe kore kukwe ye namani bare. Kä 1919 yete, nitre kristiano dianinkä üai demebiti nämäne ngite ye tikaninte aune ye bitikäre kukwe ngwarbe nie nämänebätä ye dianinkä arato. Ja mräkätre nekwe jötrö ngwarbe kukwe drie ye kömikaninta. Akwa Satana ñaka ja di ngwani nekä. Yete ja käne “ñö kri” ye kwrere tätre kukwe nuainne nitre Ngöbö mikaka täte ye rüere (Apoc. 12:15). Ye medenbätä, kä ngwan nüke aune tödeka ye ni jökrä tä ribere jai (Apoc. 13:10).

NIKWE JA DI NGWANDRE SRIBI MIKANI JEHOVAKWE NI KISETE YE NUINNE

17. Satana töita kwatibe ja mikabätä nitre Ngöbö mikaka täte rüere ye ngwane, ¿batibe kore juta Ngöbökwe dimikata ño?

¹⁷ Ñaka tädi ngübare ngwane batibe kore dimikai mikata gare tärä Apocalipsis 12 yebätä. Ñobätä ñan aune tä niere “ñö kri yaiba mökatakwe ye dobokwe ñakaba jökrä”, ñö ye abokän ja mikata rüere (Apoc. 12:16). Ye erere nemen bare. Satana tä kä ne gobraine nekänti nitre tä kukwe ükete ye ruäre käkwe juta Ngöbökwe dimikanina. Kukwe ükateta yekänti juta Ngöbökwe käkwe kukwe ganainbarera bä kabre, ye köböire kukwe ruäre nuainta töi jämebiti. ¿Kukwe ye köböire ja mräkätre ne tä dre nuainne? Tätre ja di ngwen sribi biani Jehovakwe ie ye nuainne kä jökrä ngwane (1 Cor. 16:9). ¿Dre dre mada nuaindre?

18. ¿Sribi meden ütiäte tä nuaindre nie kä krüte ne näire?

¹⁸ Kä krüte ye känenkri nitre ja tötikaka Jesukwe käkwe “kukwe kwin Gobran Ngöbökwe yebätä ye driedi kä jökräbiti tibien” niebare kwe (Mat. 24:14, TNM). Sribi ne rabadre bare ie yekäre ángel iti o ángel kwati tä dimikakäre. Ángel ne “näma Ngöbö kukwei kuin kärekäre ngwena niedre ni jökrä nünanka [...] kä temenbtä yeye. Ye mden kisete, ni kä jökräbti temen amne ni bätäkä ngwarbe amne ni kukwe bätäkä ngwarbe amne ni nünanka juta kwatirekwatire te abko kräke angele ye näma Ngöbö kukwei kuin ye ngwena” (Apoc. 14:6).

19. ¿Nitre tä Jehová tarere yekwe kukwe meden mada mikadre gare?

¹⁹ Nitre Ngöbö kukwei mikaka täte ye tä kukwe driere jankunu akwa ye ñan aibe tätre nuainne, ñakare aune tätre ángel kädekateta Apocalipsis kapitulo 8 nemen 10 ye dimike arato. Nitre ñaka tä Gobran Ngöbökwe ye kain ngäbiti yebätä kukwe tare rabadi bare jatäri mikata gare ángel nekwe. Nitre testiko tä kukwe mike gare ye ñü järe aune ñukwä jutra ye erere. Kukwe keta kabre tä ükaninte Satanakwe kä tibienbätä yebätä Ngöbökwe dre nuaindi ye mikata gare kukwe nebiti (Apoc. 8:7, 13). Kä kitera krüte ye mikadre gare nitre ie tätre ribere jai. Ye aibe köböire rabadre ja töi kwite ne kwe rabadrete kwäre köbö kri Jehovakwe ye näire (Sof. 2:2, 3). Kukwe mikata gare ne ñaka tä nemen kwin ni jökrä kräke yebätä nikwe ja ngwandre dite kukwe ne mikakäre gare. Ja tare nikadi kri ye näire kukwe ñäkäidi ye mikadi gare bäri tare (Apoc. 16:21).

KUKWE MIKATA GARE PROFECÍA NEBÄTÄ YE MÄKWE MIKA TÄTE

20. ¿Kukwe ja tötikara ketebu ja känenkäre yebätä dre rabadi gare nie?

²⁰ Profecía mikata gare tärä Apocalipsis yebätä ye nikwe mikadre täte ye ütiäte krubäte, ñobätä ñan aune nita “üai yete” ye abokän nita mike nemen bare arato yebätä (Apoc. 1:3). ¿Akwa ja mikata ni rüere ye ngwane ni raba dre nuainne kä ngwankäre nüke jai aune kukwe ye driekäre jankunu? Kukwe ketebu raba ni dimike. Kena, nitre ja mikaka Ngöbö rüere yebätä dre rakadikä mikata gare tärä Apocalipsis yebätä. Aune ketebu, nikwe ja ngwandi metre ngwane, kukwe kwin keta kabre rabadi nikwe. Kukwe ne rabadi gare nie kukwe ja tötikara ketebu ja känenkäre yebätä.