Jehová töita krubäte nitre niara mikaka täte yebätä

1. Nitre ja tötikaka Jesukwe ye Jehová rabadre ngübarebiti ye, ¿ñobätä Jesukwe ribebare ie?

DEU Jesús murie ketadre ye känenkri nitre ja tötika kwe ye Jehovakwe kriemikadre aune ngübadre ye ribebare kwe rün kä kwinbiti ie (Juan 17:15, 20). Bäkänä käre Jehovata nitre ja tötikaka kwe ye kriemike aune ngübare. Akwa Satanakwe ja mikadi bäri nitre ja tötikaka Jesukwe ye rüere ye nämäne gare metre ie yebätä Jehovakwe dimikadre ye ribedi kwe jai.

2. Salmo 33:18-20 tä niere erere, ¿ñobätä kukwe tare ye ñaka kä jürä mikadre nibätä?

² Nitre gobrainta Satanakwe ye tä nitre kristiano metre ye mike ene ja kisete. Kukwe tare ye raba ni dikainkä aune ja ngwanta metre ye nuate raba. Kukwe ñaka nie kä jürä ngwankäre jabätä ye rabadi gare nie kukwe ja tötikara nekänti. Ñobätä ñan aune Jehová töita ni jökräbätä ye abokän ni itire itire yebätä dreta nemen bare ye gare kwin ie aune niarata juto dimikakäre. Nire nire tä Jehová jürä ngwen jabätä ye niarata miketari ñärärä ye kukwe ketebu Bibliabätä tä bämike nie yebätä nikwe ja tötikai (ñäkädre Salmo 33:18-20 yebätä).b

JATA NEMEN RUIN KAIBE NIE YE NGWANE

3. ¿Kukwe meden köböite ja raba nemen ruin kaibe nie?

³ Ja mräkätre kwati kukwe ja üairebiti ye ngätäite nita, akwa ruäre ngwane ja raba nemen ruin kaibe nie. Ñodre, monsotre bati tä kukwe mike täte yebätä raba kukwe mike gare kwelate o tä ja kwite konkrekasion madate ngwane, ja raba nemen ruin kaibe ie. Ruäre ngwane ja raba nemen ruin ulire nie o töbikakwe ñaka kwin yebe nita ja tuin ye ngwane kukwe mada ñan tä nemen nuaindre nie, yebätä jerekäbe nikwe ja tuadre kukwe yebe kaibe tä nemen ruin nie. Ni ñan töta nemen ja drie ni madai ñobätä ñan aune ni kukwei ñan rükadre gare ie ye jüräta nemen nibätä. Ni ñan ütiäte ni mada kräke ye ni raba kite nütüre. Kukwe ño erere akwa jata nemen ruin kaibe nie ye köböite ni raba kite töbike krubäte aune ja ñan raba ruin kriemikani nie. Ja rabadre ruin kore nie ye ie Jehová ñaka tö. ¿Ñobätä nita kukwe ye niere?

4. ¿‘Ti aibe neberaka jabätä’ ye ñobätä ni kukwei niekä Elías käkwe niebare?

⁴ Ani töbike Elías yebätä. Niara ni ja ngwanka metre akwa ngitiani köbö 40 te ñobätä ñan aune Jezabel ja töi mikani niara murie kete (1 Rey. 19:1-9). Bätäräbe namani jä mäkä krite kä käibe känti, yekänti niebare kwe: ‘Ti aibe neberaka jabätä’ (1 Rey. 19:10). Akwa ñaka kore ñobätä ñan aune Abdías käkwe nitre 100 näre ükani Jezabel ni ja ngwanka käme ye ngäniene (1 Rey. 18:7, 13). ¿Akwa ñobätä ja namani ruin kaibe Elías ie? Abdías nitre Ngöbö kukwei niekä ükani ye jökrä Jezabel käkwe murie ketani namani ruin ie. O kukwe namani bare nitre kukwe niekä Baalbätä kä Carmelo känti, ye bitikäre nitre ñaka ja mikani Jehovakri ye namani ruin ie yebätä ja namani ruin kaibe ie raba ruin nie. Kukwe madabe niara nämene ja tuin abokän niara nämäne ja tuin kukwe tare ben ye ñan nämäne nüke gare nitre madai aune nitre ñan nämene niara töbikaire namani nütüre raba ruin nie. Biblia ñaka kukwe mike gare jökrä niarabätä, akwa ja nämäne nemen ruin ño ie aune dimikadre ño ye nämäne gare kwin krubäte Jehovai ye gare metre nie.

5. ¿Elías ñan nämäne kaibe ye mikakäre gare ie Jehovakwe dre nuainbare?

⁵ Jehovakwe kukwe keta kabre nuainbare Elías dimikakäre. Ñodre, Eliakwe blitadre niebare kwe ie. Bobu jire ngwanintari kwe ie: “¿Mätä dre nuainne nete, Elías?” (1 Rey. 19:9, 13). Kukwe ngwanintari bobu kwe ie ye ngwane niarakwe kukwe nuabare kwin krubäte. Ye bitikäre kukwei kani ngäbiti kwe niara nämäne yete aune dite krubäte bämikakäre ie. Aune juta Israel yekänti nitre kwati mada nämene kukwe metre ye mike täte ye mikani gare kwe ie arato (1 Rey. 19:11, 12, 18). Eliakwe ja driebare Jehovai aune Jehovakwe kukwei kani ngäbiti, ye bitikäre ja namani ruin kwin krubäte ie raba ruin nie. Ne madakäre Jehovakwe sribi ütiäte mikani niara kisete: Niara rabadre Azael denkä reire Siria, Jehú diandrekä kwe reire kä Israel aune Eliseo diandrekä kwe ni Ngöbö kukwei niekä ye erere (1 Rey. 19:15, 16). Jehovakwe kukwe mikani nuaindre ie yebiti niarakwe töbikadretari käre kukwe kwin yebätä ye ie tö namani aune ja ketamuko kwin biani kwe ie, Eliseo. Jata nemen ruin kaibe nie aune nita Jehová di ribere jai ngwane, ¿ni raba dre nuainne?

6. ¿Jata nemen ruin kaibe mäi ngwane drebätä mä raba blite Jehovabe? (Salmo 62:8).

⁶ Jehovata ni nübaire ja driere ie orasion yebiti. Jata nemen ruin ño nie ye jutuen ie ñongwane erere niara tä juto biarebe ni kukwe nuakäre (1 Tes. 5:17). Niara tö ni niara mikaka täte ye kukwe nuai (Prov. 15:8). Jata nemen ruin kaibe nie ngwane, ¿ni raba dre niere Jehovai? Ni raba ja driere ie Elías nuainbare erere (ñäkädre Salmo 62:8 yebätä).c Dreta ni mike töbike ja ruin ño nie aune nikwe dre nuaindre ye nikwe niedre ie. Monso bati, mätä kwelate ngwane jata nemen ruin kaibe mäi aune kä jüräta nemen mäbätä blitakäre Jehovabätä ngwane, ¿mä raba dre nuainne? Jehovakwe mä mikadre dite aune mäkwe blitadre kwin mäta kukwe mike täte yebätä ye mäkwe ribe ie (Luc. 21:14, 15). Töbikakwe ñaka kwin ben mäta ja tuin ngwane, ¿mä raba dre nuainne? Jehovakwe mä dimikadre blite ni umbre kukwe ja üairebiti ben aune ni ye käkwe mä töi mikadre nüke gare jai ye mäkwe ribe ie. Nikwe ja driedre Jehovai ye köböire ni raba ja tuin jata nemen ruin kaibe nie yebe aune nita kukwe ribere ie orasionte ye tä mike nemen bare ño ni kräke ye nita juto biare mikakäre gare jai aune nitre mada tä ni dimike ye nita kain ngäbiti.

7. ¿Kukwe namani bare Mauriciobätä ye tä dre driere mäi?

⁷ Jehová tä sribi ütiäte bien nie. Nita ja di ngwen kukwe nuainne konkrekasionte aune kukwe driebätä ye tuin jökrä Jehovai aune tä mike ütiäte jai (Sal. 110:3). Nita käre kukwe driere ye tä ni dimike ja ruin kaibe nie ye ganainne. ¿Ñobätä? Ja mräkä iti Mauricio bätä dre namani bare ye ani mike gare jai.d Niara ja ngökani ñöte ye bitikäre ja ketamuko kwin iti kwe käkwe kämikaninkä Jehovabätä. Niara tä niere: “Ja ketamuko kwin tikwe kämikakaba Jehovabätä ngwane, tikwe ja dianinkä mento Jehová kräke ye käre tikwe mikai täte aune ti tädi ja mräkätre kukwe ja üairebiti ye ngätäite ya, ti rababa ngwentari jai. Ja nämä nemen ruin ño tie ye ni ñan iti ie raba nüke gare ye ti rababa nütüre. ¿Dre käkwe niara dimikani? Niara tä niere: “Tikwe kukwe drieba bäri ja mräkätre ben aune tikwe ñaka töbikaba ja nämä nemen ruin ño tie yebätä ye käkwe ti dimikaba”. Ti nämä kukwe driere ja mräkätre ben ye nämä kä mike juto tibätä aune ja ñan nämä nemen ruin kaibe tie. Ni ñan raba kukwe driere ju ju te ja mräkätre ben akwa yebiti ta kukwe ne tä nemen bare kore. Ni raba kä denkä jai kukwe driekäre tärä tika yebiti ja mräkätre ben ye raba ni dimike krubäte. ¿Dre mada Mauricio dimikani? Niara tä niere: “Tikwe ja töi mikaba sribire bäri konkrekasionte aune tikwe ja di ngwanba ja ükete kwin kukwe kädriekäre, ye köböire Jehová aune ja mräkätre nämä ti tarere ye rababa gare tie”.

KUKWE TARE TÄ NI ENDIKETE NGWANE

8. ¿Nita ja tuin kukwe tare ben ngwane ja raba nemen ruin ño nie?

⁸ Kä krüte ne näire nikwe ja tuadi kukwe tare ben ye gare ni jökrä ie (2 Tim. 3:1). Akwa kukwe tare ño ben aune ñongwane nikwe ja tuadi ben ye tä ni ngwen nikenkä. Ñodre, ngwian ñan raba nemen nie, bren tare tä nibätä ye mikata gare nie o ni mräkätre tä krüte nikän. Ye ngwane ni raba nemen nainte krubäte aune ja töibikaire kukwe yebätä. Kukwe tare tä kite nemen bare ja jiebiti o jökrä tä nemen bare batibe kore nibätä ngwane bäri ja raba nemen ruin kore nie. Akwa Jehovata käre ni ngübarebiti aune niara diebiti nikwe ja tuadi kukwe tare ben ye nikwe ngwandre törö jai.

9. ¿Kukwe tare meden meden ben Job käkwe ja tuani?

⁹ Kukwe namani bare Jobbätä ye ani mike ñärärä. Kä braibe te kukwe tare krubäte ben ja tuani kwe. Köböitibe jondron nire kwe, nitre sribikä kwe aune kukwe bäri tare, ye abokän monsotre kwe jökrä tu neketani kän ye namani gare ie (Job 1:13-19). Niara nämäne ja tuin kukwe tare nebe ye bätärabe bren tare krubäte namani niarabätä aune niara ña namani nüketari gare (Job 2:7). Job nämäne ja tuin kukwe tare ben yebätä niebare kwe: “Ja nire tikwe käi käme tibätä, ti ñan tö nünain mada” (Job 7:16).

10. Kukwe tare ben Job nämäne ja tuin ngwane, ¿Jehovakwe dimikani ño kä ngwankäre nüke jai? (Üai kena täräkwatabätä mikadre ñärärä).

¹⁰ Dre nämäne nemen bare Jobbätä ye nämäne gare kwin Jehovai. Jehová nämäne Job tarere yebätä niara nämäne dre ribere jai ye biani kwe ie Job kä ngwandre nüke jai kukwe tare yebätä aune ja ngwandre metre kwe ie yekäre. Jehová ara blitabare Job ben, niara töbätä krubäte aune jondron nire sribebare kwe ye tare kwe aune tä ngübarebiti kwin ye mikani gare kwe ie. Jondron nire krikri kädekaninte kwe (Job 38:1, 2; 39:9, 13, 19, 27; 40:15; 41:1, 2). Aune Jehovakwe kukwe mada nuainbare, Elihú juani kwe kukwe kwin niekäre Job ie aune töi mikakäre jäme. Nire nire tä Jehová mike täte ye kräke Jehovata kukwe kwin mike nemen bare, ye monso bati ne käkwe ngwaninta törö Job ie. Akwa arato Elihú rabadre mäträre Jobbätä ye ie Jehová tö namani. Ja tare yebiti, Elihukwe kukwe jökrä mikani gare merebe Job ie, ni abokän chi krubäte, Jehová jondron jökrä sribekä ye kräke ye Elihukwe ngwani törö Job ie (Job 37:14). Jehovakwe sribi ütiäte biani Job ie: niara rabadre ja ketamuko nimä kwe käkwe ja mikani ngite ye kräke orare (Job 42:8-10). Aune kä nengwane, ¿nita ja tuin kukwe tare ben ngwane Jehová tä ni dimike ño?

11. ¿Nita ja tuin kukwe tare ben ngwane Bibliata ni töi mike ño jäme?

¹¹ Jehová ñan tä blite nibe metre ta nuainbare Job ben kwe ye erere. Akwa tä blite nibe Biblia yebiti (Rom. 15:4). Tödekara bianta kwe nie ye tä ni dimike. Kukwe keteiti aune kukwe tare ye ñan raba Jehová “töi kwite abtä niara ñan raba ni tarere mda” mikata gare kwe nie Bibliabätä (Rom. 8:38, 39). Aune arato “nitre jökrä tä Jehová kärere ye ken Jehová tä” ye tä käbämike nie (Sal. 145:18). Jehovata niere nie arato, nire nire tä ja tuin kukwe tare ben aune tä tö ngwen ie ye ngwane niarakwe ja di biandi ie kä ngwankäre nüke jai kä jutobiti (1 Cor. 10:13; Sant. 1:2, 12, TNM). Kukwe tare ben nita ja tuin ngwane ye nikwe ketadre ja nire käre abokän jondron kwin käbämikata nie Jehovakwe yebe ngwane, kukwe tare ben nita ja tuen ye abokän jötrö aune gwäune näin ta ye rabadi gare nie (2 Cor. 4:16-18). Kukwe tare ye Jehovakwe diainkä jökrä käbämikata kwe nie ye abokän: Satana aune nitre ja ngwanka käme (Sal. 37:10). ¿Texto ruäre käkwe mä dimikai ja tuakäre kukwe tare ben ja känenkäre ye mäkwe mikanina gare jai ja töibiti?

12. Jehovata kukwe jökrä bien nie Biblia yebiti, ¿yebätä ni raba dre nuainne ja kitakäre bäri kwin?

¹² Jehovata ni dimike Kukwe kwe yebiti yebätä nikwe ja kitadre kwin yekäre, nikwe ñäkädre Bibliabätä aune töbikadretaribätä ye ie niara tö. Dreta nemen gare nie ye nikwe mikai nemen bare ngwane tödeka nikwe rabai bäri dite aune nikwe ja ketai bäri kwin Jehovabe. Aune ye käkwe ja di biain nie kä ngwankäre nüke jai. Ne madakäre, Kukwe Ngöbökwe ie nikwe tö ngwain ngwane Jehovakwe üai deme kwe ye biain nie. Üai yebiti “Ngöbö die kri bä nuäre” rabai nikwe ja tuakäre kukwe tare jökrä ben nikwe ja tuadi yebe (2 Cor. 4:7-10).

13. Mrö ja üaire bianta “ni klabore ja ngwanka metre aune töbikaka kwin käne” yekwe, ¿ye tä ni dimike ño kä ngwankäre nüke jai?

¹³ “Ni klabore ja ngwanka metre aune töbikaka kwin käne” yebiti Jehovata mrö ja üaire bien krubäte nie täräkwata, video, kansion ne kwe tödeka nikwe tädre dite aune ni tädre mokre kukwe ja üairebiti (Mat. 24:45). Mrö ja üaire tä kabre nikwe yebätä ni rabadre ja kite kwinbätä aune tä nüke kä debe näre te. Bitinkä meri testiko iti kä Estados Unidos käkwe debe biani krubäte mrö ja üaire keta kabre yebätä. Niara tä niere: “Kä 40 te tita sribire Jehová kräke tikwe ja tuanina kukwe tare keta kabre ben”. Ni dröbare iti karo ngwanka käkwe niara ruai murie ketani, rün bätä meye krütani bren tare ye kisete aune niara ara namanina bren bobura jire bren cáncer ye kisete. ¿Dre käkwe niara dimikani kä ngwen nüke jai? Niara tä mike gare: “Jehovata käre ti ngübare. Mrö ja üaire bianta ni klabore ja ngwanka metre aune töbikaka kwin käne yekwe, ye ti dimikanina. Yebätä tita debe bien krubäte. Yebätä Job erere ti raba niere: ‘¡Tikwe ja ngwain metre Ngöböi nememe ti krütai ye ngwane!’” (Job 27:5).

14. ¿Nita ja tuin kukwe tare ben ye ngwane ja mräkätre ja üairebiti yebiti Jehovata ni dimike ño? (1 Tesalonicenses 4:9).

¹⁴ Jehovata nitre niara mikaka täte ye tötike ja tarere aune ja töi mike jäme kukwe tare ye näire (2 Cor. 1:3, 4; ñäkädre 1 Tesalonicenses 4:9 yebätä). Etebantre aune ngwaitre ye abokän Elihú erere niaratre tö ni dimikabätä ja ngwankäre metre kukwe tare ye näire (Hech. 14:22). Meri testiko kädekata Diane, muko kwe nämäne bren tare krubäte ngwane, konkrekasion käkwe kukwe niebare ie dimikakäre aune dimikani ja ngwen dite jankunu kukwe ja üairebiti, ye tuani ja okwä jeñebiti kwe. Niara tä niere: “Kukwe tare ye näire ñan rababa nuäre nun kräke akwa Jehovata ni tarere ye kwrere nun nämä ye erere ja rababa ruin nunye. Nun nämä dre ribere jai yebätä konkrekasion käkwe nun dimikadre, nämä nun tuinbiti, nun kärere aune küde kite nun ngärä. Aune karo ngwandre ño ye ñan gare tie yebätä ja mräkätre nämä kukwe ükete ti ngwankäre gätäbätä aune kukwe driebätä, ti nämä niken ngwane”. Ja mräkätre tä ja tare ne kwrere bämike ye ngätäite ni tädre ye kwin krubäte, ¿ñan ererea?

JA TARE YEBITI JEHOVATA NI NGIBIARE YEBÄTÄ NITA DEBE BIEN

15. ¿Kukwe tare ben ni raba ja tuin ye ñokänti gare metre nie?

¹⁵ Ni jökrä tä ja tuin kukwe tare ben. Akwa nibira gare nie erere ni ñan rabadre ja tuin kaibe kukwe yebe. Ni rün ni tarekä erere, Jehovata ni ngibiarebiti. Niara tä ni ken aune ni dimikadre kwe ye nita kärere ie ye niara tä kukwe nuen aune tä ni dimike (Is. 43:2). Ni raba ja tuin kukwe tare ben ye gare metre nie ñan ñobätä aune nita dre dre ribere jai ye Jehovata bien nie: orasion, mrö kabre ja üairebiti aune ja mräkätre kwati ni tarekä.

16. ¿Jehovakwe ni ngibiadre jankunu yekäre nikwe dre nuaindre?

¹⁶ Ni rün ni ngibiabitikä tärä yebätä nita debe bien krubäte. Salmo 33:21 yete nieta: “Niara kä mikaka juto nun brukwäbätä”. ¿Jehovata ni ngibiarebiti yebätä nita debe bien ye ni raba bämike ño? Dre dre bianta kwe nie yebätä nikwe ja kitadre kwin. Jehovakwe ni ngibiadre jankunu yekäre ni ara käkwe kukwe nuaindre. Niara ta kukwe niere ye nikwe mikadre täte aune kukwe meden kwin kräke ye nikwe nuaindre. Nikwe ye erere nuaindi, ngwane niarakwe ni ngibiaibiti kärekäre (1 Ped. 3:12).