¿Ñobätä Jesús ye Ngöbö Monsoi nieta?

Biblia tä mike gare

Bä kabre te, Bibliabätä Jesús ye abokän “Ngöbö Monsoi” nieta (Juan 1:49). Ngöbö ye jondron jökrä sribekä aune ja nire bianka ye mikata gare “Ngöbö Monsoi” nieta ngwane, arato niarakwe Jesús dätebare tä nüke gare (Salmo 36:9; Revelación [Apocalipsis] 4:11). Ni kä tibienbätä ne tä nemen monso bäkäne ye ñan kwrere nemen bare Ngöböbätä drieta Bibliakwe.

Angeletre ye Ngöbö metre monsoi nieta Bibliabätä arato (Job 1:6). Ne madakäre Adán ni Brare kena ye nämäne Ngöbö Monsoi drieta Bibliakwe. (Lucas 3:38). Akwa Bibliabätä Ngöbö kräke monso kwe Jesús ye bäri ütiäte bä mikata ñobätä ñan aune dätebare käne kwe aune ja kise akwlebiti.

• ¿Jesús däredre kä tibienbätä ye känenkri nünanbare kwe kä kwinbiti?

• ¿Dre nuai nämäne Jesukwe kä kwinbiti jatadre kä tibienbätä ye känenkri?

¿Jesús däredre kä tibienbätä ye känenkri nünanbare kwe kä kwinbiti?

Jän. Jesús däredre ni ka tibienbätä erere ye känenkri niara nämäne üaire ka kwinbiti. Niara “kä kwinbätä jatani kä tibienbätä” mikani gare akwle kwe (Juan 6:38; 8:23).

Ngöbökwe Jesús dätebare käne. Bibliabätä, ne nieta Jesubätä:

• Niara abko ‘Ngöbö Odei mubai amne jändrän jökrä däte ngämi känenkri’ (Colosenses 1:15).

• Niara abko “jändrän namani bare Ngöböye kena ye jökrä kömikaka” (Revelación 3:14).

Profecía keteiti tä blite ni iti nünanka kä raire krubäte te, kä nikani mekera ja jiebiti ta ye Jesús mikani nemen bare (Miqueas 5:2; Mateo 2:4-6).

¿Dre nuai nämäne Jesukwe kä kwinbiti jatadre kä tibienbätä ye känenkri?

Kä kwinbiti sribi ütiäte nämäne niara kötärä. Jesukwe blitabare nebätä kukwe ne käräbare kwe Ngöböi ngwane, “ti nämane mikani ütiäte kri ma ben gwaire, ye kwrere makwe ti mikata ütiäte kri bobuta ma ben gwaire Tata” (Juan 17:5).

Rün dimikani kwe jondron sribekäre jökrä. Jesús sribibare Ngöbö ben ni sribikä kwin erere (Proverbios 8:30). Biblia tä ne niere Jesubätä: “Niara köböire Ngöbökwe jändrän jökrä käinta amne tementa dätebare” (Colosenses 1:16).

Ngöbökwe jondron jökrä nuainbare Jesús köböire, angeletre aune kä kwinta jökrä (Revelación 5:11). Ni arquitecto aune ni ju mikaka tätre sribire gwairebe ye bä mika raba ni arquitecto aune ni ju sribekä ye erere. Ni arquitecto tä ju bä mike nuainkäre aune ni ju mikaka tä ju mike ye erere.

Niara abokän Kukwe. Jesús jämi nüke kä tibienbätä ye känenkri Biblia tä niara kädeka “Kukwe” (Juan 1:1). Nebiti tä nüke gare Ngöbökwe kukwe mikani gare aune kukwe ja jie ngwankäre niebare ni üaire mada ie monso kwe yebiti.

Ruin nie arato, Jesukwe blitabare Ngöbö kräke nitre kä tibienbätä ben. Ye kwrere Jehovakwe kukwe biani Adán aune Eva ie kä bä nuäre Edén yekänti ngwane blitabare kwe Kukwe yebiti, ye abokän Jesús (Génesis 2:16, 17). Angel iti nitre israelita jie ngwiani kä ngwarbe nötare yekänti ye abokän Jesús ni raba niere aune kukwe kwe ye arabe mikadre täte jökrä raba ruen nunye arato (Éxodo 23:20-23).a