Ja gare kwin mäi ye köböire mä raba ja tuin kukwe ñokwä yebe
MONSOTRE KRÄKE
9. Mä abokän nire rabadre gare
¿YE NUAINDRE ÑO?
Mä kä ño aune mä bä ño ye ñan ai tä mike gare mä abokän nire, ñakare aune mätä ja ngwen ño, mätä dre mike täte, dre tuin kwin mäi aune dre tuin käme mäi yebiti mä abokän nire tä nemen gare meden gärätä.
¿NUAINDRE YE ÑOBÄTÄ ÜTIÄTE?
Mätä ja ngwen metre ye tuin kwin mäi ngwane, kukwe mikata täte mäkwe ye mäkwe nuaindi jankunu aune mäkwe ñaka monsotre mada tuainmetre ja töi kwite.
“Nitre kwati abokän muñeca ye kwrere, dän meden kitadre jabätä kwetre ye niaratre ñaka ai tä nuainne” (Adrian).
“Kukwe kwin nuaindre yekri tita ja mike, akwa ñaka nuäre ti kräke. Nire abokän ja ketamuko metre tikwe ye gare tie, ñobätä ñan aune tä ja ngwen ño aune tita ja ngwen ño bentre yebiti gare tie” (Carolina).
BIBLIA TÄ KUKWE NE DRIERE: “Ñaka ja töi kwitamana nitre kä nebätä yei, ñakare aune mun rabadre ja töi ükete kwin” (Romanos 12:2, TNM).
¿MÄ RABA DRE NUAINNE?
Nengwane mätä ja ngwen ño aune mä tö ja ngwain ño ja känenkäre yebätä mäkwe töbika. Dre nuain gare kwin mäi aune dre ñaka nuäre mä kräke bätä mätä dre mike täte yebätä mäkwe töbika. Ye rabadre gare mäi yekäre mäkwe kukwe ne ngwantari jai.
Kukwe nuain gare kwin mäi: “¿Sribi meden nuain gare kwin tie? ¿Ja gobrain gare tie? ¿Tita nüke kä rairebiti? ¿Ti sribikä balente o ja ngwanka mantiame? ¿Dre nuain gare bäri kwin tie?”.
NE NUAIN RABA: Kukwe meden kwin nuainta mäkwe ñaka nemen gare mäi ngwane, mäkwe ngwantari mä rün aune mä meye ie o ja ketamuko mäkwe ie.
BIBLIA TÄ KUKWE NE DRIERE: “Ni itire itire tä sribi nuene ño, ye mika ñäräre kuin kwe, yebtä blita au kwe jakrä [...] akwa ni mda mda tä sribi nuene ño, yebtä ñan ñäkä kwe” (Gálatas 6:4).
Kukwe ñan nuäre mä kräke: “¿Kukwe medenbätä ti rabadre ja ngwen bäri kwin? ¿Ñongwane ti töta nemen bäri kukwe blo ye nuainbätä? ¿Kukwe meden känti ti rabadre ja gobraine bäri?”.
BIBLIA TÄ KUKWE NE DRIERE: “Ngite ñakare nibiti nieta nikwe ngwane, nita ja ngökö akwle” (1 Juan 1:8, NGT).
Kukwe mikata täte mäkwe: “¿Kukwe meden ie tita ja jie ngwamana aune ñobätä? ¿Ngöbö tärä ye era ti kräke? ¿Dre tä mike gare tie Ngöbö tärä? ¿Kukwe meden ñaka tuin debe tie aune ñobätä? ¿Dre rabai bare ja känenkäre ruin tie?”.
BIBLIA TÄ KUKWE NE DRIERE: “Töbika kwin ja käne ye käkwe mä ngübaibiti, kukwe nüke gare mäi ye käkwe mä kriemikai” (Proverbios 2:11).