¿Nitre testiko Jehovakwe nibe gare mäi? Nun ruäre tärä nüne mä ken, sribire mäbe o näin kwelate mäbe; ruäre ngwane nunkwe blitabarera mäbe Bibliabätä. Akwa, ¿nun abokän ño erametre, aune ñobätä nunta blite ni madabe kukwe mikata täte nunkwe yebätä?

Nun abokän ja erebe ni mada yebe. Nun ngätäite nitre brare aune merire kä jökräbiti tä aune ñaka sribi ja erebe nuainne. Nun ruäre nämene kukwe mada mike täte, nun ruäre abokän ñaka nämene Ngöbö mike täte; akwa, nun jämi nemen testiko Jehovakwe ye känenkri nun nämä kä denkä jai ja tötikakäre kukwe drieta Bibliakwe yebätä (Hechos 17:11). Kukwe rükaba gare nunye ye nunkwe ka ngäbitiba, aune ja töi jeñebiti nunkwe ja töi mikaba: Ngöbö Jehová mike täte.

Nunta ja tötike kwin Bibliabätä. Nitre mada ye erere nunta ja tuin kukwe tare ben aune nunta ja mike ngite arato; akwa nunta ja di ngwen kukwe Bibliabätä ja jie ngwankäre mike täte mantre jetebe, ye köböire nunta nüne bäri kwin (Salmo 128:1, 2). Ye medenbätä, kukwe kwin Bibliabätä namani gare nunye ye nunta kädriere nitre madabe.

Kukwe Ngöbökwe ye ererebätä nunta nüne. Kukwe drieta Bibliakwe ne tä nun töi mike jondron kwin nuainne. Ne madakäre, tä nun töi mike ni mada mike tuin ütiäte jai aune kukwe metre niere bätä ja töi mike kwin ni mada kräke. Tä nun dimike nüne aune jondron kwin nuainne nitre mada okwäkänti, aune tä ni ja mräkäre mike nüne keteitibe aune töi mike ja ngwen kwin. Gare metre nunye “ni jökrä ütiäte ja kwrere Ngöbökrä”. Ye medenbätä, juta mada kä jökräbiti tibien yekänti ja tuin nunye ni ja mräkäre kwrere aune nunta nitre mike tuin ja erebe jai aune ñaka ja mrite kukwe gobrankwe yebe. Nun ja erebe nitre mada yebe, akwa nun aibe tä keteitibe juta Ngöbökwe yete (Hechos 4:13; 10:34, 35).

• ¿Nun testiko Jehovakwe tä ja tuin kukwe medenbe nitre mada ye erere?

• ¿Biblia tä kukwe meden meden kwin driere nunye?

Nitre kwati tä nütüre nitre testiko Jehovakwe ye abokän ükaninte bitinkä. Akwa, kä nikanina 2.700 biti bäri ta yete, nitre Ngöbö itibe metre mikaka täte ye kädekani “testiko” niarakwe (Isaías 43:10-12). Kä 1931 ye känenkri nun kädeka nämene nitre Ja Tötikaka Bibliabätä. ¿Ñobätä nunta ja kädeke mada testiko Jehovakwe?

Nire abokän Ngöbö nunkwe ye nunta mike gare. Täräkwata kirabe yekänti kukwe ruäre Bibliabätä tikabare kisebiti, yete Ngöbö kä Jehová ye tä mikani mil kwati krubäte. Biblia kwati krubäte kwitani yebätä Ngöbö kä ye dianinkä aune täte Däkien o Ngöbö mikani. Akwa, Ngöbö metre käkwe mikani gare Moisés ie niara kä Jehová aune niebare kwe: ‘Ti kä ye abokän kärekäre’ (Éxodo 3:15). Kukwe yebiti mikani gare kwe niara ñaka ja erebe ngöbö mada mada ngwarbe yebe. Ngöbö kä deme yebiti nun kädekata ye abokän ütiäte nun kräke.

Sribi nuainta nunkwe yebätä nun kädekata ye erere. Abel ni kukwe kwin nuainkä ye bitikäre, nitre kwati käkwe mikani gare nämene tödeke Jehovai. Siklo nikani kwati ta ye ngwane “ni kwati käkwe tödeka[bare] era metre Ngöböbti”, ñodre, Noé, Abrahán, Sara, Moisés aune David (Hebreos 11:4–12:1). Ni kätä ja mike kukwe metre niekäre ni mada ñaka ja mike ngite kräke gobran ngwärekri, ye erere nunta ja töi mike kwatibe kukwe metre mike gare Ngöbö nunkwe yebätä.

Nunta ja ngwen Jesús erere. Biblia tä Jesús kädeke ni “kukwe era erere niekä” (Apocalipsis 3:14). Niara käkwe niebare arato, nämene Rün kä ye mike gare aune nämene “kukwe era erere niere” Ngöböbätä (Juan 17:26; 18:37). Ye medenbätä, nitre nänkä erametre Jesús jiebiti rabadre ja kädeke Jehová kä yebiti aune mike gare. Nun testiko Jehovakwe tä ja di ngwen kukwe ye nuainne.

• Nun nämene ja kädeke nitre Ja Tötikaka Bibliabätä, ¿akwa ñobätä nunkwe ja kädekani mada testiko Jehovakwe?

• ¿Nitre testiko Jehovakwe ye tä ñongwane Kä tibienbätä?

• ¿Nire abokän testiko bäri kri Jehovakwe?

Biblia käkwe mikani gare, Kristo murie ketadi ye bitikäre, nitre kukwe ngwarbe driekä rabadi nitre kristiano kena ngätäite aune jatai kukwe metre Bibliabätä ye kwite jene (Hechos 20:29, 30). Kä nikani ta ye ngwane kukwe niebare ye erere namani bare: kukwe metre driebare Jesukwe ye nitre kukwe ngwarbe driekä käkwe mritani kukwe ngwarbe yebe, aune ye köböite nitre jatani ja bämike ni kristiano ye kwrere (2 Timoteo 4:3, 4). Akwa, kukwe drieta Bibliakwe ye nüke gare metre nunye, ¿ye ñokänti gare kwin nunye?

Jehovakwe kukwe metre mikadre gare ye käi nükani. Ngöbökwe mikani gare kä krüte ye ngwane “kukwe metre ye ririai bäri” (Daniel 12:4). Kä 1870 ye ngwane, nitre braibe tö namani kukwe metre mikai gare jai, yei nükani gare iglesia kwati ñaka nämene kukwe Bibliabätä erere driere. Ye käkwe niaratre töi mikani kukwe drie nämene metrere Bibliakwe ye känene, aune Jehovakwe niaratre dimikani kukwe ja üaire ye mike gare jai.

Nitre ja tötikaka bökän käkwe ja tötikabare kwin Bibliabätä. Nitre Ja Tötikaka Bibliabätä, nünanka ni känenkri, käkwe ja tötikabare ye erere ni täbe nuainne kä nengwane: kukwe kwatire kwatire ye ererebätä ja tötikabare kwetre. Texto ruäre Bibliabätä ñan nämene nüke gare kwin ietre ye ngwane, nämene texto mada känene kukwe ye mikakäre gare kwin jai. Kukwe Bibliabätä nämene nüke gare kwin ietre ye ngwane nämene tike. Ye köböire, nämene Biblia ye tuenmetre kukwe ye mike nüke gare bäri kwin jai, ñodre, nämene kukwe metre mike gare Ngöbö kä, Gobran kwe, töita ño ni aune Kä tibien kräke, bätä nitre krütani ye tä ño aune nitre gaikröta yebätä. Niaratre käkwe ja di ngwani kukwe känene, ye käkwe mikani kwäre kukwe keta kabre ngwarbe mika nämene täte aune nuain nämene yebätä (Juan 8:31, 32).

Kukwe metre mikadre gare kä jökräbiti ye käi nükanina, nükani gare ietre kä 1879 yete. Kä ye ngwane niaratre jatani täräkwata: Ni Mikaka Mokre. Tä Gobran Jehovakwe mike gare ye sribere, täräkwata ye abokän nun täbe sribere kä nengwane. Nunta kukwe metre Bibliabätä driere kä nengwane nitre madai juta 240 yete, kukwe 750 jene jenebiti bäri. ¡Kukwe metre Ngöbökwe ye mikata gare bäri kä nengwane!

• ¿Kristo murie ketani ye bitikäre dre namani bare kukwe metre drie nämene Bibliakwe yebätä?

• ¿Ñokänti nunkwe kukwe metre Bibliabätä mikaninta gare?

Kä kwati krubäte te nun testiko Jehovakwe nämene Biblia jene jene imprimire, kukwe drierebiti, aune bien ni madai. Akwa Biblia ye sribedre kukwe nuärebiti ne kwe “kukwe era metre [...] [rükadre] gare ni jökräye” ye namani gare nunye, Ngöbö tö ye erere ie ni jökrä kräke (1 Timoteo 2:3, 4). Ye medenbätä, kä 1950 ye ngwane, nun jatani Biblia Traducción del Nuevo Mundo inglere ye sribere kiakia, nitre kä nengwane tä blite ye kukweibiti. Biblia ye kwitabarera kwin metre aune nüke gare kwin kukwe jene jene 130 biti bäri.

Biblia kwitadre kukwe nuärebiti aune rükadre gare kwin ye ribe nämene. Kätä niken ta angwane kukwe medenbiti blitata ye ñaka nieta ja erebe, aune Biblia kwati krubäte kwitani jene jene yebätä kukwebiti blita nämene kirabe ye tä tikani aune ñaka nuäre rükadre gare. Ne madakäre, Ngöbö kukwei tikabare kirabe ye kwani täräkwata ruärebätä, ye köböire dre nie nämene kukwe hebreo, arameo aune griekore ye nüke gare kwin.

Biblia käkwe kukwe Ngöbökwe mikadre gare metre ribe nämene. Biblia nämene kwitani ño kena ye erere nitre kukwe kwitaka käkwe ja töi mikadre kwite; niaratre ñaka rabadre kukwe Ngöbökwe ye kwite jene. Akwa, Biblia jene jene yebätä Ngöbö kä Jehová ye ñaka mikani.

Biblia abokänbätä Ngöbö kä tädre tikani ye ribe nämene (2 Samuel 23:2). Jehová kä nämene tikani bäsi mil kükü tärä kirabe yebätä ye erere mikani Biblia Traducción del Nuevo Mundo yebätä, mikata gare ngösöri ye erere (Salmo 83:18). Kukwe kwatire kwatire tä Bibliabätä ye känänbare kwin ye köböire ñäkätä kä jutobiti Biblia yebätä, tä Ngöbö töi mike nüke gare kwin yebätä. Biblia Traducción del Nuevo Mundo tärä mä kukweibiti o ñakare, akwa nunta mä nübaire ñäke mantre jetebe Jehová Kukwei yebätä (Josué 1:8; Salmo 1:2, 3).

• ¿Biblia kwitadre kukwe madabiti ribe nämene ye ñobätä namani tuin kwin nunye?

• Nire nire tö Ngöbö töita ño mikai gare jai, ¿ye rabadre dre nuainne mantre jetebe?