Juta Ngöbökwe ye ngätäite nitre sacerdote ñaka jire abokän ie ngwian bianta sribi nuainta kwetre ye ütiäre. Ñakare aune, nuain nämene konkrekasion kristiana kena yete erere, nitre ie kukwe gare diankata ‘konkrekasion Ngöbökwe ngübarebiti’ (Hechos 20:28). Nitre umbre ji ngwanka yei kukwe ja üaire gare krubäte abokän tä konkrekasion jie ngwen aune ngübarebiti, “munkwe niaratre ngibia ja moto kuinbti, Ngöbö tö ie ye kwrere. [...] Erere arato, munkwe ñan niaratre ngibia ngwian ganainkäre jae, akwa munkwe kä ngwian nuäre jabtä niaratre ngibiakäre” (1 Pedro 5:1-3). ¿Niaratre tä dre nuainne ni kräke?

Tätre nun ngübarebiti aune nun kriemike. Nitre umbre ji ngwanka ye tä konkrekasion jie ngwen aune tätre ngübarebiti kukwe ja üaire yebiti. Ngöbökwe nitre mikaka täte mikani ngübadrebiti niaratre ie ye gare kwin ietre, ye medenbätä ñaka mike sribire ja dibiti, ñakare aune tä dimike nüne kwin aune kä jutobiti (2 Corintios 1:24). Ni obeja ngübaka ye tä ja di ngwen krubäte obeja kwe kratire kratire ngübakäre, ye erere nitre umbre ji ngwanka ye töita krubäte nitre obeja Ngöbökwe ye itire itire mikakäre gare jai (Proverbios 27:23).

Tätre nun tötike Ngöbö kukwei nuainkäre. Nitre umbre ji ngwanka, ye tä gätä nuainta konkrekasionte ye jie ngwen bämän kratire kratire, tödeka nunkwe mikakäre dite (Hechos 15:32). Nitre brare ne tätre sribire ja töi jeñebiti, tätre kukwe drieta ye jie ngwen arato, tätre kukwe driere nunbe aune tätre nun tötike sribi keta kabre Ngöbökwe nuainkäre.

Tätre kukwe niere nun itire itire dimikakäre. Nitre umbre ji ngwanka ye tätre nun tuinbiti gwi aune tätre blite nunbe Ju ja Ükarakrö yete, nun itire itire dimikakäre kukwe ja üaire yebiti. Biblia yebiti tätre nun dimike aune nun töi mike jäme (Santiago 5:14, 15).

Nitre umbre ji ngwanka ye kisete sribita konkrekasionte, akwa niaratre jökrä bäsi tätre sribire ja kräke aune tätre mräkätre ngübare. Ja mräkätre ne tätre sribire krubäte yebätä nunta mike ütiäte jai (1 Tesalonicenses 5:12, 13).

• ¿Nitre umbre ji ngwanka konkrekasionte ye tä sribi meden nuainne?

• ¿Niaratre kätä ja töi mike ño nun itire itire yebätä?

Nitre ketebu kätä sribi konkrekasionte ye nuainne nieta Bibliakwe: “ni Ngöbökwe jie ngwianka amne nitre ni mda mda die mikaka” (Filipenses 1:1). Konkrekasion kwatire kwatire yete ja mräkätre ne erere tä kwati. ¿Nitre sribikä konkrekasionte tä dre dre kwin nuainne nun kräke?

Tätre nitre umbre ji ngwanka dimike. Nitre sribikä konkrekasionte ye nitre dite ja üaire, tö ngwan raba ietre aune tä juto biare sribikäre, ruäre tä bati aune mada abokän niena umbre. Sribi aune kukwe ükateta kwetre nuaindre konkrekasionte, sribi ye ütiäte arato akwa tätre nuainne käre. Ye köböire nitre umbre ji ngwanka yei kätä nemente sribita kisete, nitre tötikadre aune ngübadrebiti ye nuainkäre.

Sribi ütiäte nuainta kwetre. Nitre sribikä konkrekasionte ye ruäre tä nitre nüke gätäbätä ye käi ükete aune kain ngäbiti. Mada abokän tä sribire jondron ni kukwe mikara kri yebätä, tärä döräire, sribire ngwian yebätä aune tä kä denkä kukwe driekäre ja mräkätre konkrekasionte yei. Ye erere arato, tätre ja mräkätre dimike Ju ja Ükarakrö ye ükatekäre kwin aune nitre umbre ji ngwanka konkrekasionte tä kukwe niere nuaindre ietre ye ererebätä tätre ja mräkätre niena umbre ye dimike. Sribi jene jene mikata kisete, akwa tätre nuainne kä jutobiti ye köböire nitre jökrä tä mike ütiäte jai (1 Timoteo 3:13).

Tätre dite kukwe ja üairebiti ye tätre bämike kwin krubäte. Nitre sribikä konkrekasionte ye tätre töi kwin kukwe ja üaire yebiti ye medenbätä diankata sribikäre. Tätre kukwe kädriere plataforma yekänti ye tä tödeka nunkwe mike dite; niaratre tä kukwe driere käre ye tä nun töi mike kukwe driere kä jutobiti, aune tätre sribire gwairebe ye tä nun mike nüne keteitibe aune kä jutobiti (Efesios 4:16). Ja känenkäre, niaratre raba nemen ni umbrere konkrekasionte arato.

• ¿Nitre sribikä konkrekasionte tä dre dre nuainne?

• ¿Nitre sribikä konkrekasionte tä dre nuainne ne kwe konkrekasion tädre kwin?

Kukwe Kristiano Tikani Griekore yekänti Bernabé aune apóstol Pablo kädekateta bä kabre. Niaratre ye nämene nitre tuinbiti, nämene konkrekasion kirabe ye tuinbiti. ¿Dre nämene niaratre töi mike sribi ye nuainne? Töi nämene ja mräkätre yebätä kukwe ja üaire yebiti. Ja mräkätre nämene ño kukwe ja üaire yebiti mikakäre gare jai Pablo ja töi mikani tuinbitita. Kilómetro kwati te niarakwe nändre ja mräkätre dimikakäre akwa yebätä niara ñaka nämene töbike (Hechos 15:36). Kukwe ye arabe tä nitre konkrekasion tuabitikä kä nengwane ye töi mike sribi ye nuainne.

Tätre nüke nun dimike. Nitre circuito tuabitikä itire itire ye tä konkrekasion gre tuinbiti aune bämän krati tä ja mräkätre tuinbiti konkrekasionte bobu kä kwatire kwatire te. Ja mräkätre ne tä gure angwane niara bätä muko kwe yei kukwe gare ye raba ni dimike krubäte. Niaratre tä ja di ngwen monsotre bati aune ja mräkätre niena umbre ye jökrä mikakäre gare jai, aune töita juto biare kukwe driekäre nunbe bätä nitre ja tötikaka Bibliabätä nunbe ye tuinbiti. Nitre konkrekasion tuabitikä ne tä nitre umbre ji ngwanka yebe ja mräkätre tuinbiti; ne madakäre gätä nuainta konkrekasionte aune gätä krikri yete tätre kukwe kwin krubäte kädriere nun dimikakäre (Hechos 15:35).

Töita nun jökräbätä. Nitre circuito tuabitikä ye töita krubäte konkrekasion ketare ketare yebätä kukwe ja üaire yebiti. Niaratre tä ja ükökrö nitre umbre ji ngwanka aune nitre sribikä konkrekasionte yebe kukwe meden kwin namanina bare ye kädriekäre aune kukwe ütiäte niekäre mäträkäre bätätre ne kwe raba sribire bäri kwin. Tätre nitre sribikä prekursor ye dimike kukwe driere bäri kwin aune nitre mada dimike bäri, bätä nitre tä krire ja ükökrö nunbe tä nirien kukwe ja üairebiti nemen gare ietre ye käi nemen jutobätä. Ja mräkätre itire itire ne tä sribire krubäte aune tätre “sribire gwaire [...] [nun] die mikakäre” (2 Corintios 8:23). Niaratre tä tödeke Ngöböi aune mike täte ye erere nikwe nuaindre (Hebreos 13:7).

• ¿Nitre circuito tuabitikä ye tä ñokäre konkrekasion tuinbiti?

• ¿Niaratre tä nun tuinbiti ye ngwane mäkwe dre nuaindre ne kwe rabadre mä dimike?

Kukwe tare tä nemen bare ye ngwane, nun testiko Jehovakwe tä ja töi mike jötrö ngwarbe jondron ribeta nemen jai ja mräkätre yekwe ye biankäre ietre. Kukwe nuainta ye tä bämike nunta ja tarere erametre (Juan 13:34, 35; 1 Juan 3:17, 18). ¿Dre drebiti nunta niaratre dimike?

Nunta jondron bien ietre. Ja mräkätre nünanka Judea namani mrö nike krubäte ye ngwane, nitre kristiano kä Antioquía yekänti käkwe ngwian juani kräketre dimikakäre (Hechos 11:27-30). Ye erere arato, ja mräkätre nunkwe juta ruäre känti tä tare nike krubäte ye tä nemen gare nuen angwane, nunta jondron juen konkrekasion nunkwe yebiti niaratre dimikakäre (2 Corintios 8:13-15).

Nunta dimike metre jondron ruärebiti. Nitre umbre ji ngwanka tä nemen kukwe tare namani bare yekänti angwane, tä ja mräkätre itire itire konkrekasionte ye känene aune niaratre tädre kwin ye mikata gare kwin kwetre jai. Ja mräkätre tä ja tuin kukwe tare ben dimikakäre nitre braibe diankata ye kätä kukwe ükete, ne kwe jondron kwetadre, ñö aune dän, kräkä aune ju bianta ja mräkätre ja tare nikaka yei. Nitre Testiko kwati ie sribi gare tä niken ja töi jeñebiti nitre dimikakäre ju o Ju ja Ükarakrö ükatekäreta. Nunta sribire gwaire köböire sribidre ño niena gare nuen, ye tä nun dimike nänkäre jötrö ngwarbe ja mräkätre tä ja di ribere ye dimikakäre. Nunta “metrere [...] ja märäkä tä tödeke Ngöböbiti” dimike, akwa ruäre ngwane nunta nitre mada, kukwe mada mikaka täte ye dimike arato (Gálatas 6:10, NGT).

Nunta dimike kukwe ja üaire yebiti aune nunta töi mike jäme. Nitrebätä kukwe tare tä nemen bare ye töta ja töi mikamana jäme. Kä ye ngwane, Jehová, “Ngöbö [...] tä kä miketa nuäre nibtä” ye kätä ja di bien ietre (2 Corintios 1:3, 4). Ye medenbätä, nitre tä ja tare nike yei nunta kukwe kwin käbämikata Bibliakwe ye mike gare, ye tä mike gare metre gwäune Gobran Ngöbökwe käkwe kukwe tare kätä nitre mike ja tare nike ye mikai krüte (Apocalipsis 21:4).

• Kukwe tare tä nemen bare ye ngwane, ¿ñobätä nun Testiko tä jötrö ngwarbe ni mada dimike?

• ¿Nitre tä nemente nire ye nunta dimike ño kukwe ja üaire yebiti?

Jesús krütadre ye känenkri, blitabare kwe kaibe nitre apóstol nibokä ben: Pedro, Santiago, Juan aune Andrés. Niara rükaita ye dre käkwe bämikai mikani gare kwe ye bitikäre, kukwe ütiäte krubäte ngwanintari kwe: “¿Nire sribikä kwin metre angwane tö tärä, ye meden dre ni Ji dokwäte, käkwe mikadrete ja täte krare nitre sribi muko kwe yebiti, abokän kwe mrö biandre kwet[re]?” (Mateo 24:3, 45, NGT; Marcos 13:3, 4). Kukwe nebiti, Jesús, ni Ji dokwäte kri käkwe mikani gare niarakwe nitre braibe kädekai mrö ja üaire biankäre jankunu nitre nänkä niara jiebiti yei kä krüte te. ¿Ye abokän nire nire?

Nitre ye braibe nänkä erametre Jesús jiebiti abokän dianinkä. Nitre Braibe Konkrekasion Jökrä Ngübabitikä Testiko Jehovakwe ye tä sribire ‘nitre klabore’ ye kwrere. Tä mrö ja üaire bien kä debe näre te nitre Jehová mikaka täte yei. Nitre braibe ye aibe tä ‘mrö ja üaire bien kä debe näre te’ nie (Lucas 12:42).

Tä ju Ngöbökwe ngübarebiti (1 Timoteo 3:15). Jesukwe nitre braibe yei sribi kri krubäte biani, ye abokän nitre Jehová mikaka täte kä tibienbätä ngübadrebiti kwetre, arato kädekani jondron jökrä kwe ye ngübabitikäre, kukwe drie ye jie ngwankäre aune dirikäre nie konkrekasion yebiti. Ye medenbätä, jondron ribeta nikwe ye erere rabadre nikwe gäre ‘nitre sribikä täte metre’ tä mrö ja üaire bien nie, ye nuainta kwetre tärä kukwe driekäre nie yebiti aune kukwe kädrieta gätäte aune gätä kri näire yebiti.

‘Nitre’ ye sribikä täte metre ñobätä ñan aune kukwe metre Bibliabätä aibe drieta kwetre aune kukwe kwin driedre mikani kisete ye tätre nuainne, aune niaratre ye töbätä ñobätä ñan aune tätre töbike kwin jondron Kristokwe Kä tibienbätä ye ngübabitikäre (Hechos 10:42). Niaratre tä sribire ye köböire Jehová tä jondron kwin mike nemen bare kräketre, tä ni Testiko mike nirien bäri aune tä mrö ja üaire bien krubäte (Isaías 60:22; 65:13).

• ¿Nire dianinkä Jesukwe ne kwe rabadre mrö ja üaire bien nitre ja tötikaka niarabe yei?

• ¿‘Nitre’ ye sribikä täte metre aune töbätä ye tä bämike ño?

Siklo kena ye ngwane, nitre braibe “Jesu kukwei ngwianka [...] amne nitre ni jie ngwianka nämane Jerusalén” ükaninte sribikäre gwairebe, aune konkrekasion nitre kristiano dianinkä nänkäre kä kwinbiti yekwe ye jökrä käbiti nämene kukwe ütiäte ükete nuaindre (Hechos 15:2). Kukwe ükatekäre gwairebe, nämene kukwe Bibliabätä känene kwin aune nämene ja tuenmetre jie ngwandre üai deme Ngöbökwe yei (Hechos 15:25). Nitre braibe ji ngwanka kä nengwane, abokän nunta kädeke Nitre Braibe konkrekasion jökrä Ngübabitikä tätre nuainne ye erere arato.

Nitre yebiti Ngöböta ja töi mike nemen bare. Nitre Braibe konkrekasion jökrä Ngübabitikä ye nitre dianinkä nänkäre kä kwinbiti, niaratre kräke Kukwe Ngöbökwe ye ütiäte krubäte aune kukwe ükadrete ño aune kukwe ja üaire driedre ño ye gare krubäte ietre. Ja mräkätre kä jökräbiti tä dre dre ribere jai kukwe ja üaire yebiti, yebätä ja tötikakäre tätre gätä nuainne bämän kratire kratire. Nuain nämene siklo kena ye erere, tätre tärä tike o nitre konkrekasion tuabitikä aune ja mräkätre yebiti tätre ni tötike kukwe Bibliabätä yebiti. Ye köböire tätre juta Ngöbökwe töi mike kukwe keteitibebätä aune mike sribi nuainne keteitibe (Hechos 16:4, 5). Ye erere arato, niaratre tä mrö ja üaire sribere, kukwe Gobran Ngöbökwe yebätä drieta ye tätre jie ngwen aune tätre ja mräkätre kädeke nitre mada Ngöbö mikaka täte jie ngwankäre.

Ngöbö üai tä kukwe mike gare ietre ye ererebätä tätre nuainne. Nitre Braibe konkrekasion jökrä Ngübabitikä ye tätre ni Gobranka Kri kä jökräbiti, Jehová ye känene ja jie ngwankäre, aune tätre ja jie ngwamana arato, Jesús, konkrekasion Jie Ngwanka yei (1 Corintios 11:3; Efesios 5:23). Nitre sribikä bentre yei ja ñaka ruin gobran ye erere juta Ngöbökwe yebiti. Nitre kristiano mada dianinkä nänkäre kä kwinbiti ye erere, “tätre näin kordero [Jesús] ye jiebiti näin medente ye kärera” (Apocalipsis 14:4). Nitre Braibe konkrekasion jökrä Ngübabitikä tä debe bien krubäte nita orasion nuainne kräketre yebätä.

• ¿Nire nire nämene ükaninte ji ngwankäre siklo kena yete?

• ¿Nitre Braibe konkrekasion jökrä Ngübabitikä ye tä ño Ngöbö kukwei känene ja jie ngwankäre?

Betel ye abokän “Ju Ngöbökwe” gärätä kukwe hebreore yebiti (Génesis 28:17, 19, JK). Ju nun testiko Jehovakwe kwe tä kä jökräbiti tibien kädekata ne erere ye kwin krubäte aune ju yekänti kukwe drie ye dimikata aune jie ngwanta. Nitre Braibe konkrekasion jökrä Ngübabitikä tä obisina bäri kri juta Nueva York (Estados Unidos) yekänti, aune kä yekänti sukursal juta keta kabre känti tä sribire ye ngübabitita. Nitre sribikä ju yekänti abokän kädekata ni ja mräkäre sribikä Betel. Ni ja mräkäre metre ye erere niaratre tä, mröre, nüne, sribire aune ja tötike gwairebe Bibliabätä (Salmo 133:1).

Kä ütiäte krubäte känti niaratre tä sribire ja di tätebiti. Nitre brare aune merire ie kukwe ja üaire gare krubäte tä sribire Betel yekänti, aune niaratre tä sribire köbö täte Jehová töi mikakäre nemen bare aune sribi Gobran Ngöbökwe ye nuainkäre bäri (Mateo 6:33). Nitre ye ñaka sribire ngwian ganainkäre, akwa kwarto aune mrö bianta ietre nünankäre, aune ngwian bianta chi ietre dimikakäre ne kwe dre ribeta kwetre jai ye erere kökadre kwetre ja kräke. Nitre itire itire ye ie sribi biani nuaindre: ruäre tätre sribire obisina te, mrö riata o mröta ye käikänti; mada abokän tä sribire imprenta yebätä o tärä sribeta yekänti; aune nitre mada abokän tä kwarto ükete, kä dän bätätekäre yekänti, aune ju ye ükete, bätä sribi mada keta kabre nuainta kwetre.

Kä sribi nuainkäre krubäte abokän känti kukwe Gobran Ngöbökwe yebätä drieta ye dimikata. Betel kwatire kwatire ye tä metrere kukwe Bibliabätä ye mike gare nitre kwati bäri ie. Täräkwata ne tä ükaninte kukwe ye erere nuainkäre. Nitre Braibe konkrekasion jökrä Ngübabitikä käkwe nitre kukwe tikaka täräkwata yebätä jie ngwani, ye bitikäre juani nitre kwati krubäte kä jökräbiti tibien kukwe kwitaka yei computadora yete, imprenta sribire jötrö ngwarbe yete sribebare juta keta kabre känti aune juani konkrekasion 110.000 biti bäri ye kräke. Sribi jene jene ye nuainta angwane: kukwe kwin driedre ye sribi bäri nuaindre jötrö ngwarbe ye ni ja mräkäre sribikä Betel ye kätä dimike (Marcos 13:10).

• ¿Nire nire tä sribire Betel aune dre dre bianta ietre dimikakäre?

• ¿Sribi nuainta Betel jene jene yete ye tä sribi meden nuaindre bäri jötrö dimike?

Ja mräkätre sribikä Betel tä sribire obisina jene jene yekänti kukwe drieta juta keteiti o juta keta kabre känti ye dimikakäre; ñodre tätre kukwe kwite, täräkwata o tärä sribeta imprenta yete yekänti tätre sribire, aune tätre sribire tärä ükakröta ye käi känti o tätre kukwe grabare aune video sribere, bätä jondron mada nuainne arato.

Nitre sukursal jie ngwanka kätä sribi nuainta ye ngübarebiti. Nitre Braibe konkrekasion jökrä Ngübabitikä ye tä nitre umbre konkrekasion jie ngwanka ie kukwe gare ye denkä nimä o bäri sribi sukursal yete ye jie ngwankäre. Dre nuainta aune kukwe meden meden raba nemen bare ye niaratre tä mike gare Nitre Braibe konkrekasion jökrä Ngübabitikä yei, ye köböire kukwe meden meden kädrie raba tärä mada sribedi yebätä aune gätä aune gätä krikri nuaindi yete ye tä nemen gare Nitre Braibe konkrekasion jökrä Ngübabitikä yei. Nitre Braibe konkrekasion jökrä Ngübabitikä ye kätä nane nane nitre juen sukursal tuinbiti aune kukwe mike gare nitre Sukursal Jie ngwanka yei ne kwe rabadre sribita kisete ye nuainne bäri kwin (Proverbios 11:14). Central Mundial tä Ni Juen sukursal tuinbiti angwane, tä gätä nuainne kukwe ütiäte kädriekäre, ye nuainta kwe nitre tä nüne sukursal ken ye dimikakäre.

Konkrekasion jökrä dimikata. Sukursal yekänti konkrekasion ükateta. Nitre prekursor, misionero aune nitre circuito tuabitikä tä sribi nuainne ye jie ngwanta arato. Gätä kri ye köböi ükateta, kukwe ükateta Ju ja Ükarakrö ye sribekäre aune tärä juanta konkrekasion jene jene ye kräke. Sribi jökrä nuainta sukursalte ye köböire kukwe drieta kwin (1 Corintios 14:33, 40).

• ¿Nitre Sukursal Jie ngwanka ye kätä Nitre Braibe konkrekasion jökrä Ngübabitikä ye dimike ño?

• ¿Sribi meden meden nuainta sukursal yete?

Täräkwata sribeta kukwe 750 jene jenebiti “Ngöbö kukwei kuin” ye driekäre “ni kä jökräbti temen amne ni bätäkä ngwarbe amne ni kukwe bätäkä ngwarbe amne ni nünanka juta kwatirekwatire te” yei (Apocalipsis 14:6). ¿Sribi ere krubäte ye nunta nuainne ño? Nitre kukwe tikaka aune nitre kukwe kwitaka tä sribire ja di ngöibiti, nitre ye jökrä testiko Jehovakwe kä jökräbiti tibien diebiti sribi ye nuainta.

Kukwe tikata kena kukwe inglere yebiti. Nitre Braibe Kukwe Tikaka tä sribire obisina bäri kri känti, ye jie ngwanta Nitre Braibe konkrekasion jökrä Ngübabitikä yekwe. Nitre Braibe Kukwe Tikaka ye tä sribi ükete nuaindre nitre tä sribire kukwe tikabätä obisina bäri kri te ye kräke aune nitre mada kukwe tikaka tä sribire sukursal ruäre te ye kräke arato. Ja mräkätre nünanka juta jene jene känti ben sribita gwairebe, ye köböire kukwe meden tä nitre juta jene jene te mike töbike ye ererebätä kukwe diankata aune tä nemen kwin nitre kä jökräbiti tibien kräke.

Kukwe ye juanta nitre kukwe kwitaka yei. Kukwe ye tikata aune sribemananta angwane, juanta computadora yete kä jökräbiti tibien nitre kukwe kwitaka yei, niaratre tä kukwe ye kwite biti tätre tuinte aune tätre ükete biti juanta imprenta yekänti. Nitre kukwe kwitaka tä ja di ngwen kukwe “metre erere känene” tikadre ne kwe kukwe tikani inglere ye arabe kwitadre kwetre ja kukwei jeñe yebiti (Eclesiastés 12:10).

Computadora tä sribire bäri jötrö. Computadora ñaka raba sribire ni kukwe tikaka o ni kukwe kwitaka metre ye erere. Akwa, diccionario, programa nitre kukwei keta kabre ükatekäre aune tärä keta kabre tä mikani computadora yete kukwe känänkäre yebiti sribi ye nuain raba bäri jötrö. Nitre testiko Jehovakwe programa sribebare keteiti kädekata Sistema Electrónico de Edición Plurilingüe (siglas inglere, MEPS) ye köböire kukwe tika raba, nitre kukwei keta kabrebiti kukwe kwitani ye mika raba yete jondron üai yebe gwairebe aune kukwe tikani ye ükate raba juandre imprenta yekänti.

Nitre braibe blite kukwe ruärebiti, ¿akwa ñobätä nunta ja di ngwen krubäte sribi ye nuainkäre? Ñobätä ñan aune Jehová “tö ni jökrä diaintari amne, kukwe era metre [...] rabadre gare ni jökräye” (1 Timoteo 2:3, 4).

• ¿Dre dre nuainta kukwe tikakäre?

• ¿Ñobätä nunta kukwe keta kabrebiti kukwe kwite?

Kä kwatire kwatire, nun testiko Jehovakwe tä Biblia aune tärä mada mada sribere krubäte aune nunta döräire ye ngwane nun ñaka ngwian kärere ütiäre; nunta Ju ja Ükarakrö aune sukursal sribere aune nunta ükete kwin käre; nitre kwati krubäte sribikä Betel aune misionero ye kräke nunta ngwian kitekä, aune ja mräkätre tä tare nike kukwe tare kisete ye ngwane nunta jondron juen kräketre dimikakäre. ¿Ngwian ñobiti jondron jökrä ne ütiä bianta?

Nun ñaka ngwian ükökrö aune kärere ni madai. Kukwe drieta ye kräke ngwian kitaka krubäte, akwa nun ñaka ngwian kärere nitre ie. Kä nikanina 100 krati ta ye biti bäri, täräkwata Ni Mikaka Mokre sribebare ketebukäre ye käkwe mikani gare Jehová tä nun dimike yei nunta tö ngwen. Ye bitikäre täräkwata ye käkwe mikani gare: “[Nitre nänkä kukwebätä nunbe] ye ñaka ngwian käräi jire aune ñaka ja di käräi kwetre nitre madai”. Ye erere tä nemen bare (Mateo 10:8).

Ngwian bianta ja töi jeñebiti yebiti ütiä bianta. Nunta nitre tötike Bibliabätä ye nitre kwati tä mike ütiäte jai aune niaratre tä ngwian bien ja töi jeñebiti yebiti tätre nun dimike. Nun Testiko kätä kä denkä jai arato, nun die aune jondron nunkwe yebiti nunta sribi Ngöbökwe ye nuainne Kä jökräbiti tibien (1 Crónicas 29:9). Ju ja Ükarakrö yete aune gätä kri nuainta yekänti kaja kia tä mikani ne kwe nire törbadre ngwian biain ja töi jeñebiti ye rabadre kite kaja yete o raba bien Internet käi jw.org yebiti. Ruäre ngwane nitre nüne bobre kätä ngwian bien, nitre ye meri bobre kän brare krütani kwrere abokän Jesukwe käikitaninkä, ñobätä ñan aune ngwian mününe ñaka ütiäte kitani kubu kwe arka templote yete (Lucas 21:1-4). Ni jökrä raba ngwian denkä chi käre biandre ja töi jeñebiti “nütüdre ño ja brukwäte [ye] erere” (1 Corintios 16:2; 2 Corintios 9:7, NGT).

Nitre tö Jehová mikai ütiäte jai jondron kwetre yebiti, ye töi mikai jankunu kwe kukwe ye nuainne, ne kwe niaratre rabadre sribi Gobran Ngöbökwe dimike aune ye köböire Jehová tö dre dre nuain ye erere rabai bare ye gare kwin nunye (Proverbios 3:9).

• ¿Kukwe medenbiti nitre nänkä kukwebätä nunbe ye ñaka ja erebe nitre nänkä iglesia madate yebe?

• ¿Ngwian bianta ja töi jeñebiti yebiti sribita ño?

Ju yete Ngöbö mikata täte metre. Ju yekänti kukwe ükateta kukwe kwin driekäre (Mateo 24:14). Ju ja Ükarakrö ye sribe ñaka ja erebe aune ñaka ja närebe, akwa ju ye jökrä sribe ñaka ju mada bätäkä ngwarbe ye kwrere; ju ye ruäre känti konkrekasion jene jene tä ja ükökrö. Kä bitin nikanina ta yete nunkwe Ju ja Ükarakrö ye sribebare kwati krubäte (kwärike näre mantre jetebe) konkrekasion tä nirien ye ererebätä sribeta. ¿Dre köböire ye tä nemen bare nunye? (Mateo 19:26.)

Ngwian bianta ja töi jeñebiti ye köböire sribeta. Ngwian ükakröta ye juanta sukursal yekänti ne kwe konkrekasion meden tä ju ja ükarakrö ribere jai o Ju ja Ükarakrö tärä kwetre abokän tö ükaite ye kräke sukursal tä ngwian ye juen.

Nitre kwati sribikä ja töi jeñebiti tä Ju ja Ükarakrö ye sribere akwa ütiä bian ñaka ietre. Juta keta kabre känti Nitre braibe Ju ja Ükarakrö sribekä ye tärä ükaninte. Nitre braibe Ju ja Ükarakrö sribekä ja töi jeñebiti ye tä niken konkrekasion jene jene känti juta kwetre ye erere känti. Niaratre tä niken mente konkrekasion kä yekänti dimike Ju ja Ükarakrö kwetre ye sribekäre. Juta mada abokän känti nitre testiko ie sribi gare kwin kädekata Ju ja Ükarakrö sribekäre o ükatekäre kä ruäre dianinkä sribikäre ietre ye erere känti. Nitre kä madakänti ie sribi gare kwin tä nüke sribire ja töi jeñebiti kä yekänti, akwa nitre sribikä kwati nünanka yete ye käkwe ja ükaikrö Ju ja Ükarakrö sribeta yete. Jehová die aune nitre niara mikaka täte kätä ja töi jeñebiti ja di ngwen ye köböire ju ye tä nemen bare (Salmo 127:1; Colosenses 3:23).

• ¿Dre köböire nunta Ju ja Ükarakrö ye sribere kä jökräbiti tibien?

Ju ja Ükarakrö nitre Testiko Jehovakwe ie ye jökräbätä Ngöbö kä deme ye tä mikani, ye medenbätä ni rabadre ükete aune ngübare kwin. Ye sribi ütiäte, yebiti Ngöbö mikata täte arato, yebätä ni jökrä raba sribi ye nuainne.

Ja töi jeñebiti nikwe ja mikadre ju ye ükete kwin gätä krütadre ye bitikäre. Gätä nuainta batire batire ye bitikäre, nitre konkrekasionte tä ja töi jeñebiti ja mike ju ye ükatekäre kwin; bati bämän kratire kratire tätre ükete bäri kwin. Ni umbre ji ngwanka o ni sribikä konkrekasionte tä kukwe ükete sribi ye nuainkäre, tätre sribi keta kabre ükete nuaindre, kä sökaka, kä burei denkä, täkärä ükete, kä narakrö bätete, jondron kwata kitekä aune sotobo jubäre ye tikekä. Bati kä kwatire kwatire te kukwe ükateta ju ye ükatekäre jökrä köböiti. Sribi ruäre biandre nuaindre monsotre kia ie ye kwin krubäte, ñobätä ñan aune ye köböire rabai Ju ja Ükarakrö mike ütiäte jai (Eclesiastés 5:1).

Ju ükadrete ye ngwane nikwe ja di ngwandre sribire arato. Kä kwatire kwatire te Ju ja Ükarakrö ye tuateta kwin terita aune jubäre ne kwe dre nuaindre ükatekäre kwin o jondron meden kwita raba ye mikakäre gare jai aune ye köböire ja känenkäre ñaka ngwian kitadrekä ngwarbe krubäte (2 Crónicas 24:13; 34:10). Ju ja Ükarakrö ye tä ükaninte kwin angwane, ye kä kwin krubäte Ngöbö nikwe mikakäre täte. Nikwe ja mikai ükatekäre arato angwane, ju ye ütiäte ni kräke aune Jehová tare nikwe ye nikwe bämikai (Salmo 122:1). Ne madakäre, nitre nünanka Ju ja Ükarakrö bäre tibien ye käkwe kukwe kwin niedi nibätä (2 Corintios 6:3).

• ¿Ñobätä ni ñaka raba kä gätä nuainkäre ye tuenmetre käme?

• ¿Sribi meden meden nuainta ne kwe Ju ja Ükarakrö tädre ükaninte kwin?

¿Mä törba kukwe Bibliabätä mikai gare bäri jai? Bersikulo ruäre o nitre kirabe, kä o kukwe namani bare kädrieta Bibliabätä, ¿ye mä törba mikai gare bäri jai? ¿Kukwe tä mä kisete yebätä kukwe Ngöbökwe raba mä dimike ye mä tärä ngwentari jai? Mäkwe jän niedi angwane, mä raba niken tärä sribebare tä ükaninkrö Ju ja Ükarakrö yete ye mike ñärärä.

Tärä sribebare tä ükaninkrö yebätä kukwe kwin känä raba. Nitre testiko Jehovakwe käkwe tärä sribibare mä kukweibiti ye ñaka jökrä mäkwe, akwa tärä sribebare bitin jatäri ye jökrä bäsi tä ükaninkrö Ju ja Ükarakrö yete. Biblia keta kabre raba kwen mäi, diccionario kwin krubäte aune tärä mada mada kukwe känänkäre raba kwen mäi arato. Gätä känenkri o gätä krütadre ye bitikäre, mä raba niken töi jämebiti ja tötikebätä. Computadora tädre yete angwane, programa Watchtower Library ye raba kwen mäi computadora yete, abokän te tärä keta kabre tä mikani aune känä raba nuäre, ye köböire kukwe o bersikulo medenbätä mäkwe kukwe känändre ye raba kwen jötrö mäi.

Ye kwin krubäte nitre tä kukwe kädriere Nita Dirire aune Ja Ngwen Ño yete. Mä niena kukwe kädriere kwela yete angwane, kukwe kädriei mäkwe ye kräke mä raba ja tötike tärä sribebare tä ükaninkrö yebätä. Nita Dirire aune Ja Ngwen Ño jie ngwanka, ye kätä tärä ye ngübarebiti, tärä mrä mrä ye tädre mikani yete arato aune tädre ükaninte kwin ye niara rabadre mike gare kwin jai. Kukwe känändre ño mäkwe yebätä niara o ni dirikä mäi ye käkwe mä dimikai. Mäkwe ngwan törö jai, tärä tä ükaninkrö Ju ja Ükarakrö yete ye ñaka jänrikadre jire mentokwäre; ne madakäre, tuadrete deme aune ñaka täräi mikadrekä.

Biblia tä niere “kukwe erametre Ngöbökwe” ye rabadre gare niekäre, ni rabadre ja töi mike kwatibe känene “jondron ütiäte tä ükani” känänta ye kwrere (Proverbios 2:1-5). Tärä tä ükaninkrö Ju ja Ükarakrö yete ye kwin krubäte kukwe ye känänkäre.

• ¿Dre dre tä ükaninkrö Ju ja Ükarakrö yete abokänbiti kukwe känä raba?

• ¿Ja tötikakäre kwin tärä tä ükaninkrö Ju ja Ükarakrö yete yebiti nire raba mä dimike?

Jesukwe niebare nitre ja tötikaka kwe yei: “Mun rabadre ñotra trä ye kwrere ni mda mda okwäbti amne, munkwe jändrän kuinkuin nuendre kore ni mda mda okwäbti, ye köböire abko jatadi mun Rün kä käinbti ye käikitekä siba” (Mateo 5:16). Ye nuainkäre nunta jondron mrä mrä sribeta yebiti sribire, ñodre Internet. Nun testiko Jehovakwe tä kukwe meden meden mike täte aune sribi meden meden nuainne ye mikata gare metrere Internet käi jw.org/jw-ngb yekänti. ¿Tä dre mike gare?

Kukwe ngwantarita käre ye mikata gare kwe Biblia yebiti. Nitre kä nebätä käkwe kukwe ruäre ütiäte krubäte ngwantaribarera mikata gare ye kwain mäi. Kukwe keta ti ngwantarita ye mikata gare täräkwata ¿Mä törba kukwe metre ye mikai gare jai? yebätä, abokän sribebarera bäri kukwe 600 yebiti ta. Arato kukwe 130 biti ta bäri Traducción del Nuevo Mundo ye kwain mäi; tärä kabre ja tötikakäre Bibliabätä, ñodre tärä ¿Dre drieta erametre Bibliakwe?, aune täräkwata Ni Mikaka Mokre aune ¡Despertad! sribebare bitinkä jatäri ye raba kwen mäi. Täräkwata keta kabre nebätä ñäkä raba o kukwe nua raba internet yete, o grababare ye dianka raba jai MP3, PDF o EPUB yekänti. Mä törba angwane mä raba copia denkä jai ja kukwe jeñebiti mikakäre tuare nitre tö kukwe Gobran Ngöbökwe yebätä mikai gare jai yei. Nitre blite kisebiti jene jene ye kräke tärä grababare video yete ye raba kwen mäi kukwe keta kabrebiti, aune kukwe Bibliabätä grababare kukwe nuadre, dramas dianinkä Biblia yebätä aune musika ngö bä nuäre krubäte abokän mä raba kukwe nuin kä tädre ngwarbe mäi ye ngwane.

Kukwe metre nitre testiko Jehovakwe yebätä. Nunta sribi Ngöbökwe nuainne kä jökräbiti tibien, ye köböire dre tä nemen bare aune kukwe tä nakainkä abokän tä mate nitre testiko Jehovakwe yebätä, aune nunta sribire ño ni mada kräke ye mikata gare Internet käi nunkwe yekänti aune mikata tuare videoclips yete arato. Ne madakäre, gätä kri meden nuaindi ye mikata gare yete aune blita raba ño sukursal ben ye nieta arato.

Jondron ye köböire nunta kukwe metre ñotra kwrere ye mike trä ngitiekä kä mente krubäte känti, ne kwe nitre kä jökräbiti tibien ie, kukwe ye rabadre gare nememe Antártida. Nunta orare ne kwe jötrö ngwarbe “kukwe Ji dokwäte kri [Jehová, NM] kwe, käkwe neadre käbiti tibien” niara käikitakakäre (2 Tesalonicenses 3:1, NGT).

• ¿Internet käi nunkwe jw.org/jw-ngb ye tä nitre dimike ño kukwe metre Bibliabätä mike gare jai?

• ¿Mä törba dre känäin Internet käi nunkwe yete?