Nitre kwati ñaka niena näin iglesia kwetre yete ñobätä ñan aune nitre ñaka niaratre jie ngwen kwin kukwe ja üaire yebiti aune dimike. Akwa, ¿ñobätä mä rabadre niken nitre testiko Jehovakwe tä gätä nuainne yebätä? ¿Niaratre mä dimikai?

Nitre ja tarere aune töi kwin ni mada kräke ngätäite mä rabai. Siklo kena ye ngwane, nitre kristiano nämene ükaninte konkrekasion jene jene te aune nämene ja ükökrö keteitibe Ngöbö mikakäre täte, ja tötikakäre Bibliabätä aune ja dimikakäre kwärikwäri (Hebreos 10:24, 25). Niaratre nämene ja ükökrö ja mräkätre kukwebätä ja tarere yebe angwane, ja nämene ruin ietre ja ketamuko erametre ye ngätäite (2 Tesalonicenses 1:3; 3 Juan 14). Nunta ye erere nuainne aune kä nemen juto nunbätä arato.

Kukwe Bibliabätä ja jie ngwankäre mikadre täte köböire jondron kwin raba nemen nikwe. Kirabe nitre brare aune merire bätä monsotre kia nämene ja ükökrö ye erere arato nunta nuainne, nitre dirikä kwin ye kukwe nuakäre abokän kätä nun dimike kukwe Bibliabätä ja jie ngwankäre mikadre täte ño mantre jetebe ye mike nüke gare nunye (Deuteronomio 31:12; Nehemías 8:8). Kukwe ngwantarita aune nieta ye ngwane, nitre ja ükaninkrö ye jökrä raba blite aune kantare kantiko yebätä, ye köböire nitre itire itire tä tödeka kwetre ye mike gare (Hebreos 10:23).

Tödekata Ngöböi ye mika raba nemen dite. Apóstol Pablo käkwe kukwe ne tikabare konkrekasion keteiti niara näire ie: “Ti tö mun tuai [...] [ne kwe] ja die mikadre kwärikwäri [...]. Munta tödeke Jesukristobti amne tita tödeke bti arato, yebti nikwe ja die mikadre” (Romanos 1:11, 12). Nita blite ja mräkätre ben gätä nuainta yete ye tä tödeka nikwe mike dite aune tä ni töi mike kwatibe nüne ni kristiano erere.

¿Mä raba niken gätä mada nuaindi yebätä ne kwe rabadre gare akwle mäi? Nunkwe mä kai ngäbiti kä jutobiti. Gätä yekänti ngwian kärä ñaka.

• ¿Gätä nuain nämene kirabe ye erere nunta nuainne ño?

• ¿Nitre kristiano tä gätä nuainne ye köböire dre kwin tä nemen bare?

Nunkwe nändre kä dube känsenta yebiti o kä käme krubäte ben nunkwe ja tuadre, akwa nun testiko Jehovakwe tä jankunu näin gätäbätä. Kukwe tare ben nunta ja tuin aune nunta nainte sribibätä akwa, ¿ñobätä nunta ja di ngwen krubäte ja ükökrö gätäbätä ja mräkätre ben?

Ye köböire jondron kwin tä nemen nunkwe. Nikwe nändre gätäbätä yebätä apóstol Pablo blitabare ye ngwane niebare kwe: “Ari ja töibikaire kwärikwäri” (Hebreos 10:24, NGT). Ja töibikadre ye abokän “jondron keteitibätä töbikadre kwin käne gärätä”. Ye abokän apóstol Pablo tä nun nübaire ja mike gare kwin jai kwärikwäri ni madabe, aune ja töi mike ni madabätä. Ja mräkätre mada konkrekasionte tä nemen gare nunye ye ngwane, kukwe tare ben nunta ja tuin ye erere ben niaratre ruäre käkwe ja tuabarera tä nemen gare nunye aune ye raba nun dimike näin jankunu ja käne arato.

Tä nun dimike ja mäke kwin kärekäre. Gätä nuainta yete nun ñaka tä nitre gare jerekäbe nunye yebe, ñakare aune ja ketamuko kwin nunkwe yebe nunta. Ne madakäre, ruäre ngwane nunta ja ükökrö kä ngwankäre juto jabätä. ¿Nunta ja ükökrö kukwe ye erere nuainkäre ye tä nun dimike ño? Tä driere nunye nunkwe ja mikadre bäri ütiäte jai kwärikwäri, ye köböire bäri nunta ja tarere. Aune ja ketamuko nunkwe tä ja tuin kukwe tare ben ye ngwane, jötrö ngwarbe nunta niaratre dimike ñobätä ñan aune nunta ja mäke kwin bentre (Proverbios 17:17). Nunta ja mäke ni jökrä ben konkrekasionte angwane, nunta bämike nun töita “ja di mikabtä kwärikwäri” (1 Corintios 12:25, 26).

Nunta mä nübaire nitre tä Ngöbö töi nuainne ye känene ja ketamukore jai. Nitre testiko Jehovakwe ye ngätäite ja ketamuko ye erere kwain mäi. Mäkwe ñaka kukwe mada tuanmetre ja töi kwite ja ükakrökäre nunbe.

• ¿Ñobätä nun töta nemen ja ükaikrö ja mräkätre konkrekasionte yebe?

• ¿Ñongwane mä törba konkrekasion nunkwe mikai gare jai?

Nitre kristiano kena ye näire, metrere kanta nämene, orasion nuain nämene, aune ñäkä nämene Bibliabätä bätä kädrie nämene, aune jondron mada ñaka nuain nämene (1 Corintios 14:26). Gätä nuainta nunkwe yebätä mä jatai angwane, nuain nämene kirabe ye erere nuainta rabai gare mäi.

Kukwe ütiäte Bibliabätä drieta. Bämän tä krüte yebätä, konkrekasion jökrä tä ja ükökrö kukwe kädrieta ni jökrä kräke 30 minuto ye kukwe nuakäre. Biblia tä kukwe niere ye tä mate ño nibätä aune kä te nita nüne yebätä ye mikata gare kukwe kädrieta yete. Nitre ja ükaninkrö ye nübaita gwaire ñäke Bibliabätä. Ye bitikäre Ja Tötikata Ni Mikaka Mokre yebätä, nuainta ora krati, ye ngwane nitre ja ükaninkrö konkrekasionte ye nübaita ja tötike täräkwata Ni Mikaka Mokre ja tötikara yebätä. Ngöbö Kukwei tä mäträre nibätä ye nuain raba ño kukwe keta kabre känti ye mikata gare kwe. Konkrekasion 110.000 tä Kä jökräbiti tibien ye kwatire kwatire känti ja tötikata kukwe arabebätä.

Tä nun tötike dirikäre kwin. Nunta ja ükökrö deu bämän ötare yete ja tötikakäre, kädekata Nita Dirire aune Ja Ngwen Ño, abokän tä ñäkäninbiti ketamä. Kukwe ükaninte täräkwata Kukwe ja jie ngwankäre gätäte yebätä ye bianta nie sö kratire kratire te. Kukwe ñäkäninbiti kena ye kädekata Kukwe ütiäte Bibliabätä, kapitulo ruäre dianinkä ñäkäkäre ye kädrieta jabe. Kukwe ketebukäre kädekata Diridre bäri kwin yete ni kitata ni mada tötikakäre Bibliabätä. Ni ji ngwanka tä kukwe niere nitre kukwe kädriekä yei ye abokän tä nun jökrä dimike ñäke kwin täräbätä aune blite kwin (1 Timoteo 4:13). Kukwe mrä kädekata Nita ja ngwen ño, yete kukwe Bibliabätä ja jie ngwankäre kädrieta ni dimikakäre. Ruäre ngwane kukwe ngwantarita aune mikata gare abokän tä ­kukwe Bibliabätä mike gare bäri kwin nie.

Mä rikai gätä nuainta nunkwe yebätä angwane, ja tötikata kwin krubäte Bibliabätä ye käkwe mä töi mikai ñan krütare (Isaías 54:13).

• ¿Nitre testiko Jehovakwe tä gätä nuainne yete mä näin angwane dre dre rabai gare mäi?

• ¿Gätä nuainta nunkwe bämän kratire kratire ye medenbätä mä törba näin käne?

¿Nun testiko Jehovakwe tä niken gätäbätä ye ngwane nunta ja ngwäkite kwin ye mäkwe üai tuanina täräkwata nebätä? ¿Ñobätä nunta dän kwin kite jabätä aune ja ükete kwin?

Ngöbö ütiäte nun kräke yebätä. Erametre Ngöbö ye ñaka tä ja ngwen nain ni bä yei (1 Samuel 16:7). Akwa, nunta ja ükökrö niara mikakäre täte ye ngwane, nun töita kwati niara mikai ütiäte jai aune ja mräkätre arato. Ni rikadre ni kukwe ükatekä yekänti angwane, ni törbadre ja ngwäkitai kwin sribi tä kisete ütiäte ni kräke bämikakäre. Ye erere, nunta ja ükete kwin gätä kräke ye tä bämike Ngöbö Jehová ‘Kukwe Ükatekä ni jökrä kräke’, ye ütiäte krubäte nun kräke aune kä känti nunta niara mike täte ye arato (Génesis 18:25).

Kukwe ja jie ngwankäre Bibliabätä ütiäte nun kräke bämikakäre. Biblia tä niere nitre kristiano yei, rabadre “ja ük[e]te kuin era metre” (1 Timoteo 2:9, 10). Ja ngwäkitadre “kuin era metre” ye abokän dän ñaka kabre, aune ñaka nemen dime nibätä o ñaka oto chi kitadre jabätä gärätä. Ne madakäre, ‘töbikata kwin käne’ ye köböire ja ükateta bä nuäre, aune ñaka käme käme o jene. Kukwe nieta ni jie ngwankäre nekänti ni törbadre dän meden kitai jabätä ye tä gare nie. Ja ükateta kwin aune bä nuäre ye raba “kukwe dirita [...] Ngöbö ni Diantarikäbtä [...] [mike] bä nuäre”, aune niara käikitaikä ñaka kukwe niedi ye köböire (Tito 2:10; 1 Pedro 2:12). Nunta ja ngwäkite kwin gätä kräke ye tä nitre mada mike blite kwin juta Jehovakwe yebätä.

Ja ngwäkitadre kwin aune bä nuäre ye kräke dän kabre o kwin krubäte ye ribe ñaka. Ye medenbätä, ja ükateta ño ye käkwe ñaka mä dimika nekä nänkäre Ju ja Ükarakrö yekänti.

• ¿Nunta niken gätäte Ngöbö mikakäre täte ye ngwane ñobätä nunta ja ngwäkite kwin?

• ¿Nun töta nemen ja ükaite kwin ye ngwane kukwe meden ja jie ngwankäre tä nun dimike?

Mätä ja tötike Bibliabätä ni testiko Jehovakwe ben angwane, kukwe medenbätä mä ja tötikai ye kräke mätä ja tötike käne. Ye erere mä rabadre nuainne gätä ye kräke, ne kwe kukwe kwin rabadre mäkwe. Mäkwe kukwe ükaite jai nuainkäre angwane kukwe kwin rabai bäri mäkwe.

Ñongwane aune medente mäkwe ja tötikai yebätä mäkwe töbika. ¿Ora nuäi te mä raba ja töi mike bäri kwin ja tötika yebätä? ¿Dekä sribidre mäkwe ye känenkri, o kä raire te deu monsotre kia tärä niken kübien ye ngwane? Kä ñaka krubäte mäi angwane, mäkwe kä diainkä nuäi jai ja tötikakäre yebätä mäkwe töbika, aune mäkwe ñaka jondron mada tuanmetre ja töi kwite kukwe ye nuainkäre. Mäkwe kä kaibe känä jai aune jondron raba mä töi mike ñaka ja tötike ye mäkwe ötate, ñodre, radio, televisión aune teléfono. Mäkwe oradre ja tötika känenkri ye mä dimikai kukwe tä mä töi nike ye käi kwitekä jabiti aune ja töi mike Kukwe Ngöbökwe yebätä (Filipenses 4:6, 7).

Kukwe bäri ütiäte ye mäkwe täräi mikaka aune mäkwe ja töi mika blite. Kukwe meden kädriei ye mäkwe bämika ja töite. Título o kapitulo dianinkä ja tötikara ye mäkwe mika ñärärä, kukwe dianinkä ja tötikara ye mikata gare ño subtítulo jene jene yebiti ye mäkwe mika ñärärä, jondron üai mikani yebätä mäkwe töbika aune kukwe ngwantarita kukwe ngwankäre törö kätä kukwe bäri ütiäte mike gare ye mäkwe ñäkäbätä. Ye bitikäre, párrafo keteitire keteitire yebätä mäkwe ñäkä aune kukwe ngwantarita ye mikata gare ño ye mäkwe känä. Texto tä mikani akwa kukwe texto yebätä ñaka tä tikani ye mäkwe känä Bibliabätä aune texto ye tä kukwe dianinkä ja tötikara mike gare ño bäri kwin yebätä mäkwe töbika (Hechos 17:11). Kukwe ngwantarita mikata gare ño ye kwandre mäi angwane, kukwe meden bäri ütiäte raba kukwe ye ngwenta törö mäi ye mäkwe täräi mikaka. Ye köböire, gätä yete mä rabai kise ngökö kwin, mä törbadi nuain ye ngwane aune mä rabai kukwe niere jötrö aune ja kukwei jeñebiti.

Kukwe jene jene diankata bämän kratire kratire ja tötikara gätäte yebätä mäkwe ja tötikai angwane, kukwe mada mrä “ütiäte kri” Bibliabätä rabai gare bäri mäi (Mateo 13:51, 52, NGT).

• ¿Mä raba kukwe ükete ño jai ja tötikara gätä kräke?

• ¿Mä raba ja tötike ño blitakäre gätäte?

Kirabe sete nükebe kä nengwane, Jehová tö ni ja mräkäre tuai kä denkä jai rabakäre keteitibe ne kwe rabadre ja mike dite kukwe ja üaire yebiti aune ja tarere bäri (Deuteronomio 6:6, 7). Ye medenbätä, nun testiko Jehovakwe tä kä denkä jai bämän kratire kratire Ngöbö mikakäre täte gwairebe nun mräkäbe, abokän känti ni itire itire tä kukwe meden ribere jai ye ererebätä kukwe ja üaire kädrieta. Nitre nüne kaibe tä kä denkä jai Ngöbö mikakäre täte ye ngwane, raba ja tötike kwin kukwe Bibliabätä diankata kwe jai ja tötikakäre yebätä.

Kä ye kwin krubäte rökrakäre bäri Jehová ken. “Krötö [...] Ngöbö ken munkwe amne Ngöbökwe krötadi [...] mun ken arato.” (Santiago 4:8.) Jehová töi ño aune dre nuainbarera kwe nieta Bibliabätä ye tä nemen gare nunye angwane, niara tä nemen gare bäri kwin nunye. Ja tötika ni mräkäbe ye nuainkäre nuäre, mä rabadre ñäke ja dibiti Bibliabätä, kukwe ükaninte Nita Dirire aune Ja Ngwen Ño ye kräke ye erere mä rabadre nuainne. Ni itire itire raba ñäke kukwe Bibliabätä dianinkä yebätä; ye bitikäre kukwe meden rükadre gare ye ni jökrä rabadre niere.

Kä ye kwin krubäte ja ketakäre bäri kwin ni ja mräkäre yei. Nitre brare aune merire, nitre rüne aune monsotre, tä ja tötike Bibliabätä gwairebe ye ngwane tä ja kete bäri kwin. Kä diankata jai yete kä rabadre juto aune ja rabadre ruin kwin yei ni jökrä töta nemen. Kukwe ütiäte dianinkä Ni Mikaka Mokre aune ¡Despertad! yebätä o internet käi nunkwe jw.org/jw-ngb yete nitre rüne törbadre ja tötikai angwane, kä kwäbe monsotre kwetre yebiti ye ererebätä rabadre nuainne; o kukwe meden ben monsoitre tä ja tuin kwelate aune ükate raba ño ye niaratre törbadre kädriei arato. JW Broadcasting ye mun raba mike ñärärä gwairebe, ye bitikäre mun raba kädriere jabe. Kantiko kantai gätäte yebätä raba ja kite aune mrä raba jondron kwetadre ye mike arato.

Nita köbö denkä jai bämän kratire kratire Jehová mikakäre täte gwairebe ye köböire Biblia raba nemen tuin kwin ni mräkätre jökrä yei, aune nita ja di ngwen yebätä Jehovakwe jondron kwin mikai nemen bare ni kräke (Salmo 1:1-3).

• ¿Ñobätä nunta kä denkä jai Ngöbö mikakäre täte nun mräkätre yebe?

• ¿Nitre rüne rabadre dre nuainne ne kwe kä diankata Ngöbö mikakäre täte ye rabadre kwin mräkätre jökrä kräke?

¿Kätä juto nitre ne ngwärebätä ye tuin mäi? Nitre ye ja ükakrökä gätä kri nuainta nunkwe yebätä. Nitre Ngöbö mikaka täte kirabe käkwe ja ükadrekrö bämä kä kwatire kwatire te ribebare ietre, ye erere gätä kri nuainta ye ngwane kätä nemen juto nunbätä ja ükakrökäre nitre kwati ben (Deuteronomio 16:16). Kä kwatire kwatire te nunta gätä kri ketamä nuainne: gätä kri circuito ye nuainta köböiti, bobu kä kwatire kwatire, aune gätä kri regional ye nuainta köbömä. ¿Gätä ye tä nun dimike ño?

Tä nun töi mike ja mäke bäri ja mräkätre kukwebätä ben. Nitre Israel nämene Jehová käikitekä ‘nitre kwati ja ükaninkrö ye ngätäite’ angwane, kä nämene nemen juto niaratre yebätä, ye erere köbö ütiäte ruäre te nunta ja ükökrö keteitibe ja mräkätre ben Ngöbö mikakäre täte ye käita nemen juto nunbätä arato (Salmo 26:12; 111:1). Köbö ye ngwane kätä nemen kwin krubäte nunye ja ketakäre nitre Testiko konkrekasion madate aune juta mada känti yebe. Ñänä ruäre nunta mröre keteitibe gätä kri nuainta yekänti, ye köböire kätä nemen kwin ja dimikakäre kwärikwäri kukwe ja üaire yebiti nunye (Hechos 2:42). Kä yekänti ja tare erametre kätä “ja mräkätre” kä jökräbiti tibien mike keteitibe (1 Pedro 2:17).

Tä nun mike nirien kukwe ja üaire yebiti. Kukwe Bibliabätä drie nämene ye nitre Israel ie nämene nüke gare angwane, kukwe kwin nämene nemen kwetre (Nehemías 8:8, 12). Kukwe kädrieta gätä kri yete ye nemen ütiäte krubäte nun kräke arato. Kukwe jene jene kädrieta ye jökrä diankata Bibliabätä. Kukwe kädrieta kwin krubäte aune kukwe bämikata yebiti Ngöbö mikadre täte ño nunkwe ye drieta nuen. Ye erere arato, kä nengwane ja mikadre kristiano ye ñaka nuäre, ye abokän nitre mada käkwe ja tuabarera kukwe tare ben tä mike gare, ye nunta kukwe nuin angwane tä nun dimike krubäte. Gätä kri regional yete kukwe bämikata känti nitre kirabe nämene ja ngwäkite ño ye erere ja ngwäkitata, ye tä kukwe namani bare kädrieta Bibliabätä mike nüke gare bäri kwin aune tä kukwe kwin krubäte ja töi kräke driere nunye. Aune gätä kri nuainta ye jökrä känti nitre tä ja denkä mento Ngöbö mikakäre täte ye ngökata ñöte.

• ¿Ñobätä gätä kri nuainta ye tä kä mike juto krubäte nunbätä?

• ¿Mä rikadre gätä kri nuainta nunkwe yebätä angwane dre kwin raba nemen mäkwe?

Jesús krütadre ye känenkri, mikani gare kwe: “Kukwe kuin [...], ne abko rabadi diribare kä jökräbti temen Ngöböta sribire ño ni ngätäite mikakäre gare angwane, batibe kä mrä jatadi nüke” (Mateo 24:14). ¿Kukwe driedi kä jökräbiti tibien ye abokän nuaindi ño? Jesús nämene Kä tibienbätä angwane nuainbare kwe ye erere nuaindi arato (Lucas 8:1).

Nunta nitre tuinbiti ju kwe yete. Jesukwe driebare nitre ja tötikaka niarabe yei kukwe kwin ye mikadre gare kwetre ju ju te (Mateo 10:11-13; Hechos 5:42; 20:20). Nitre kukwe driekä kena ye kräke kukwe ükaninte ne kwe rabadre kukwe driere kä dianinkä kukwe driekäre ye erere känti (Mateo 10:5, 6; 2 Corintios 10:13). Ye erere arato, kukwe drieta nunkwe kä nengwane ye tä ükaninte kwin, aune konkrekasion kwatire kwatire tä kukwe driere kä dianinkä kräketre ye erere känti. Ye köböire nunta kukwe driere “ni jökräye” nuain manabare Jesukwe erere (Hechos 10:42).

Nitre tä nüne medente ye jökrä känti nunta ja di ngwen niken. Nitre nämene kwati yekänti Jesukwe kukwe driebare, yebiti kukwe kwin bämikani kwe ni kräke, ñodre, mren kräbäre o ñö okwä ken (Marcos 4:1; Juan 4:5-15). Ye erere nunta blite Biblia yebätä kä jökrä känti nitre ben: ji ngrabare, jondron rürübäinta yekänti, parque yekänti o teléfono yebiti. Arato nunta tödeka nunkwe mike gare nitre nünanka nun bäre yei, sribi muko, monsotre mada nänkä kwelate nunbe aune nun mräkätre yei. Ye köböire nitre kwati krubäte kä jökräbiti tibien tä ‘kukwe kwin ja nire kräke’ ye kukwe nuin (Salmo 96:2).

Kukwe Gobran Ngöbökwe yebätä aune dre tä ja känenkäre ni kräke ye mä törba mikai gare nirei yebätä mäkwe töbika. Kukwe kwin ie mätä tö ngwen ye mäkwe ñaka ngüba ja aibe kräke. Nire kwan kena mäi yei mäkwe mika gare.

• ¿“Kukwe kuin” meden abokän nikwe mikadre gare?

• ¿Jesús ye erere nun testiko Jehovakwe tä kukwe driere ño?

Kukwe prekursor ye abokän ni ji ngwanka ni mada käne ye kwrere. Ye erere, Jesús namani prekursor, ñobätä ñan aune juani Kä tibienbätä kukwe ja nire kräke ye driere aune ji ja nire kräke ye mike nitre käne (Mateo 20:28). Kä nengwane nunta nuainne ye erere aune nunta kä denkä bäri jai nitre tötikakäre (Mateo 28:19, 20). Nitre ruäre ye kätä sribi prekursor nieta nunkwe ye nuainne.

Ni kukwe driekä köbö täte. Nun jökrä testiko Jehovakwe tä kukwe kwin ye mike gare. Akwa, nitre ruäre tä kukwe ükete jai ja mikakäre prekursor regular aune tätre sribi ye nuainne 70 ora sö kratire kratire te. Nitre kwati ye tä sribire köbö ötarebe sribi prekursor ye nuainkäre. Nitre mada abokän diankata sribikäre prekursor especial nitre kukwe driekä ribeta yekänti; nitre ye tä kukwe driere 130 ora o biti bäri sö kratire kratire te. Nitre sribikä prekursor ye tä nüne jondron braibebiti aune jondron ribeta kwetre jai ye Jehovakwe biain ietre yei tätre tö ngwen (Mateo 6:31-33; 1 Timoteo 6:6-8). Nire nire kräke ñaka nemen nuäre ja mikakäre prekursor regular o especial ye abokän tätre ja mike prekursor ausiliar, niaratre tä kukwe driere 30 o 50 ora sö kratire kratire te.

Ni prekursor tä Ngöbö aune ni mada tarere. Nitre kwati tä kukwe tare te kukwe ja üaire yebiti nüke gare nie Jesús ye erere (Marcos 6:34). Akwa kukwe gare nie ye raba kukwe kwin mike nemen bare niaratre kräke kä nengwane, abokän köböire niaratre raba tö ngwen jondron kwin tä ja känenkäre yei. Ni sribikä prekursor tä ni mada tarere yebätä tä kä denkä jai aune die kwe yebiti tä nitre mada dimike kukwe ja üaire yebiti (Mateo 22:39; 1 Tesalonicenses 2:8). Kukwe ye tä tödeka niaratre yekwe mike dite arato aune tä mike ja mäke bäri kwin Ngöböbe, abokän köböire kätä juto krubäte bätätre (Hechos 20:35).

• ¿Ni prekursor ye abokän dre gärätä?

• ¿Dre tä niaratre ruäre töi mike kukwe driere köbö täte?

Mekerabe nükebe kä nengwane nitre Testiko Jehovakwe ye nüke gare kwin tätre nitre tötike sribi Ngöbökwe nuainkäre yebätä. Nitre tä Gobran Ngöbökwe kukwei driere köbö täte ye kräketre Kwela jene jene ütiäte krubäte nuainta ne kwe niaratre rabadre sribi ye ‘nuainne kuin jökrä’ (2 Timoteo 4:5).

Kwela Nitre Sribikä Prekursor kräke. Nitre prekursor regular tä sribi prekursor kömike ye bitikäre kä kwati tä kite krüte ye ngwane, nübaita kwelate ja tötikakäre köbö ti te ye abokän nuainta Ju ja Ükarakrö bäri känime yete. Kwela ye nuainta nitre prekursor dimikakäre nökrö bäri Jehová ken, sribi Ngöbökwe ye nuainkäre bäri kwin, sribi prekursor ye nuainkäre jankunu.

Kwela Nitre Gobran Ngöbökwe Kukwei Driekä kräke. Kwela nuainta sö krobu te ne sribeta nitre prekursor tätre sribire kwin ye tötikakäre bäri kwin, nitre ye tätre ja töimike juto biare ja käi tuametrekäre aune niken sribire nitre ribeta ye erere känti. Ye erere, niaratre tätre niere “¡Tita nete, mäkwe ti juan!” Jesús ni kukwe driekä bäri kri käkwe sribi Ngöbökwe nuainbare Kä tibienbätä ye erere (Isaías 6:8; Juan 7:29). Nikwe ju nikwe tuanemetre aune ni rikadre kä madakänti ye kräke ruäre ngwane nünandre bäri jondron braibebiti. Nitre tätre nüne, kä aune mrö ye ñaka ja erebe nita nüne yekänti erere. Ruäre ngwane ja kitadre blitakäre kukwe madabiti. Kwela ne tä nitre brare aune merire jämi ja mäkete, aune nitre gure kä niena 23 nemen 65 ye dimike ja töimike Ngöbö erere. Niaratre käkwe ye ribedi jai juain yekänti, aune ye köböire rabai sribire bäri kwin Jehová kräke bätä juta kwe ye kräke.

Kwela Galaad Watchtower Ja Tötikakäre Bibliabätä. Kukwe hebreore Galaad ye abokän “Jä ükaninkrö kukwe mikakäre gare” meden gärätä. Kwela Galaad kömikani kä 1943 ye ngwane, nitre bäri 8.000 biti ta graduabarera, ye juanina sribire misionero ye erere kukwe driekäre “kä jökräbti temen”, ye köböire kukwe kwin namanina bare (Hechos 13:47). Nitre graduabare kena ye nükani Perú angwane, konkrekasion ñaka nämene jire chi; kä nengwane nibira bäri 1.000 biti ta. Nitre misionero nükani Japón angwane, nitre testiko ñaka nämene ni jätä jire juta yete. Nengwane nitre niena bäri 200.000 biti ta. Nitre tötikata sö krärike Galaad yete tötikata nguseta kukwe Ngöbökwe yebätä. Nitre tätre sribire prekursor especial erere, misionero, sukursal yete, o nitre circuito tuabitikä ye nübaita kwela nete tötikakäre krubäte ne kwe sribi Ngöbökwe ye nuaindre kwin aune bäri ja dibiti kä jökräbiti.

• ¿Kwela Nitre Sribikä Prekursor kräke ye nuainta drekäre?

• ¿Kwela Nitre Gobran Ngöbökwe kukwei driekä kräke ye nuainta nire nire kräke?