KAPITULO 11
¿Ñobätä ja tare nikata krubäte?
1, 2. ¿Nitre kwati tä kukwe meden ngwentari jai?
MREN kri tä nen jate juta keteiti yekänti. Ni iti tä nitre tä iglesiate ye täke kürübiti, ye köböite ruäre tä juruaine aune mada abokän tä krüte. Meri iti tä krüte bren cáncer kisete aune monsotre nimä kwe tä nemen uli.
2 Kukwe tare ye kwrere tä nemen bare ngwane, ñobätä ja tare nikata krubäte aune ñobätä nitre brukwäta ja kräke ye nitre kwati tä ngwentari jai. ¿Mä tärä kukwe ye ngwentari jai arato ya?
3, 4. a) ¿Habacuc kukwe meden ngwanintari Jehovai? b) ¿Jehovakwe dre käbämikani ie?
3 Nitre ruäre Ngöbö mikaka täte metre käkwe kukwe ye erere ngwanintari jai nieta Bibliabätä. Ñodre, Habacuc ni Jehová kukwei niekä käkwe ngwanintari ie: “Kukwe käme nuainta, ¿ye ñobätä mätä ti mike tuin? ¿Nitre ngwanta ja tare nike ye ñobätä mätä tuenmetre nakainkä? ¿Ñobätä kä juanta ngwarbe aune ni mada nuainta tare ti okwäkänti? Nitre ñaka töita ja erebe aune tätre rüre jabe, ¿ye ñobätä tä nirien bäri?” (Habacuc 1:3).
4 Bibliabätä mikata gare, Jehovakwe kukwe ye ükaite käbämikani kwe Habacuc ie (Habacuc 2:2, 3). Jehovakwe ni tare krubäte. Biblia tä niere: “Ngöbö töita käre munbtä” (1 Pedro 5:7). Ñodre, nita ja tare nike ye tä nemen bäri tare Ngöböi (Isaías 55:8, 9). ¿Akwa se ñobätä ni kä jökräbiti tibien tä ja tare nike krubäte? Ani mike gare jai.
¿ÑOBÄTÄ NITA JA TARE NIKE KRUBÄTE?
5. a) ¿Nitre ji ngwanka iglesiate ye tä dre niere ja tare nikata yebätä? b) ¿Akwa Biblia tä dre niere?
5 Nitre sacerdote, nitre pastor aune nitre dirikä iglesiate tä niere, Ngöbö tö ni tuai ja tare nike yebätä nita ja tare nike. Kukweta nemen bare nibätä ye Ngöböta ükete biarebe ni kräke nie raba kwetre. Aune ñobätä nita ja tare nike ye ñaka raba nemen gare jire nie ye nie raba kwetre arato. Mada abokän tä niere, monso chi o ni mada tä krüte rabakäre Ngöböbe kä kwinbiti. Akwa ye ñaka metre. Jehová ñaka tä kukwe tare mike nemen bare jire. Biblia tä niere: “¡Ngöbö metre ye ñaka raba kukwe käme nuainne jire chi aune Ngöbö Bäri Dite Krubäte ye ñaka raba kukwe blo nuainne!” (Job 34:10).
6. ¿Ñobätä nitre kwati tä ngite kite Ngöböbiti ja tare nikata yebätä?
6 Ja tare nikata krubäte yebätä nitre kwati tä ngite kite Ngöböbiti, ñan ñobätä aune Ngöböta nitre kä tibienbätä gobraine ruin ietre. Akwa kapitulo 3 yekänti rababa gare nie, Satana ara tä nitre kä tibienbätä gobraine.
7, 8. ¿Ñobätä ja tare nikata krubäte kä jökräbiti tibien?
7 “Ni kä jökräbti temen tä [...] Satana ngututu ngoto täni” nieta Bibliabätä (1 Juan 5:19). Satana, ni käme krubäte tä nitre kä tibienbätä gobraine. Niara tä “ni ngökö kwati kä jökräbti temen” (Apocalipsis 12:9). Nitre kwati tä ja ngwen Satana erere. Ye kukwe kena köböite kukwe ngwarbe nieta krubäte, nitre brukwäta ja kräke aune ni mada nuainta tare krubäte kä jökräbiti tibien.
8 Ketebukäre abokän, Adán aune Eva ja mikani ngite Ngöbö rüere aune ngite ye namani monsotre kwetre ye jökräbätä. Ni kä tibienbätä ye jökrä ngite, yebätä tä ni mada ngwen ja tare nike. Aune ruäre ngwane töta nemen ja tuai bäri ütiäte ni madabätä. Aisete tätre rüre jabe, tätre niken rübätä aune tätre nitre mada nuainne tare rabakäre ütiäte (Eclesiastés 4:1; 8:9). Ketamäkäre, ruäre ngwane nita ja tare nike ñan ñobätä aune “kukwe ngüba ñaka jire ye tä nakainkä” (Eclesiastés 9:11). Ye tä mike gare, ni tädre kä ruäre känti ye ngwane, ni raba juruaine tare o kukwe tare raba nemen bare nibätä.
9. ¿Jehová tö ni tuai ja tare nike ya?
9 Jehová ñaka tä ni mike ja tare nike. Rü, kukwe blo aune ni mada nuainta tare ye ñaka niara köböite. Arato dobo krikri, murie krikri, kätä niken ñöte aune kukwe mada mada tare ye ñaka tä nemen bare niara köböite. Akwa mä raba ngwentari jai: “Jehová ye bäri dite krubäte, ¿se ñobätä ñaka kukwe tare ye ketebätä?”. Jehová ñaka tö ni tuai ja tare nike, ñan ñobätä ni tare krubäte kwe. Akwa ni täbe ja tare nike. Ñobätä tä ni tuenmetre ja tare nike ye nibike mike gare jai párrafo ja käne yebätä (1 Juan 4:8).
¿ÑOBÄTÄ NGÖBÖTA JA TARE NIKA TUENMETRE NAKAINKÄ?
10. ¿Satanakwe dre niebare Jehová rüere?
10 Jardín Edén yete Diablukwe Adán aune Eva ngökani. Jehová ñaka gobrane kwin niebare kwe. Ngöbö ñaka tö namani jondron kwin biain Adán aune Eva ie niebare kwe. Adán aune Eva rabadre Satana ye mike tuin jai gobran bäri kwin ie tö namani. Aune niaratre ñaka nämäne Ngöbö ribere jai ye Satana tö namani tuai mike era jai (Génesis 3:2-5; nota 27 mikadre ñärärä).
11. ¿Kukwe meden ngwantarita abokän nikwe mikadre gare jai?
11 Adán aune Eva ñaka Jehová mikani täte aune ja mikani kwetre niara rüere. Kukwe meden kwin aune meden käme ye niaratre raba den nuaindre akwle jai namani ruin ietre. Adán aune Eva ñaka nämäne kukwe kwin nuainne, ¿ye bämikakäre Jehovakwe dre nuaindre? Aune dre bäri kwin ni kräke ye gare Ngöbö aibe ie, ¿ye bämikadre ño kwe?
12, 13. a) ¿Ñobätä Jehovakwe ñaka Adán aune Eva ganinte bengwairebe? b) ¿Ñobätä Jehovata Satana tuenmetre gobrane aune nitre kä tibienbätä tuenmetre ja gobraine kaibe?
12 Kä tibien rabadre bä nuäre aune Adán bätä Eva monsoitre ye nünandre kä jökräbiti tibien ie Jehová tö namani. Satana tä ja di ngwen ne kwe Jehovakwe ñaka kukwe ye nuaindre, akwa Jehovakwe mikai nemen bare (Génesis 1:28; Isaías 55:10, 11). Yebätä, Jehovakwe ñaka Adán aune Eva ganinte bengwairebe, ñakare aune niaratre tuanimetre kwe monso ngübare. Ye köböire Adán aune Eva monsoitre ye törbadre nire tuai ja gobraine ye rabadre den jai.
13 Angeletre kwati krubäte okwäbiti Satanakwe kukwe niebare Jehová rüere (Job 38:7; Daniel 7:10). Aisete Jehovata kä mike niken ta ne kwe Satana kukwe niebare ye metre o ñakare ye bämikadre kwe. Arato kä kwati krubäte te, nitre gobrainta Satanakwe ye Jehovata tuenmetre gobran ükete ja gobrainkäre. Yebiti bämikadre kwetre raba ja gobraine kaibe o ñakare.
14. ¿Kä nikanina kwati krubäte ta yete dre nükanina gare nie?
14 Kä nikanina kwati krubäte ta yete, nitre kä tibienbätä tä ja gobraine kaibe, akwa ñaka gobrane kwin. Ye tä bämike kukwe niebare Satanakwe ye ngwarbe aune Ngöbö rabadre ni gobraine ye nita ribere jai. Jeremías ni Ngöbö kukwei niekä ie kukwe ye nükani gare kwin yebätä niebare kwe: “Gare kwin tie Jehová, ni kä nebätä ie ja jie ngwan ñaka gare. Ni kä nebätä ie ja jie ngwandre ño ye ñaka gare jire” (Jeremías 10:23).
¿ÑOBÄTÄ JEHOVATA KÄ MIKE NIKEN RAIRE TA?
15, 16. a) ¿Ñobätä Ngöböta kä kwati krubäte te ja tare nika tuenmetre nakainkä? b) Satana tä kukwe blo nuainne, ¿ye ñobätä Jehová jämi ükete?
15 ¿Ñobätä Ngöböta kä kwati krubäte te ja tare nika tuenmetre nakainkä? ¿Ñobätä niara ñaka kukwe käme ye ketebätä? Satana ñaka tä gobrane kwin ye bämikakäre kä rabadre niken kwati krubäte ta. Nitre kä tibienbätä käkwe gobran keta kabre ükaninante, akwa ñaka gobrane kwin. Ne madakäre, nitre ja tötikaka krikri ie kukwe keta kabre niena gare aune jondron bätäkä ngwarbe sribeta bäri, akwa kä nengwane kukwe ñaka kwin nuainta bäri, nünanta bäri bobre, kukwe blo nuainta bäri aune rüta bäri. Ni ñaka raba ja gobraine jire kaibe.
16 Ne madakäre, Satana tä kukwe blo nuainne ye Jehová jämi ükete. Nuaindre kwe akräke, tädre ja mike gobran Satanakwe yekri aune nitre raba nemen nütüre raba ja gobraine kwin kaibe. Akwa Ngöbö ñaka raba kukwe ye nuainne jire, ñan ñobätä aune kukwe ye ngwarbe aune niara ñaka ni ngökö (Hebreos 6:18).
17, 18. Satana köböite kukwe tare tä nemen bare, ¿ye Jehovakwe ükaite ño?
17 Satana aune nitre kä tibienbätä ja mikani Jehová rüere, ye köböite kukwe tare tä nemen bare. Akwa Jehová raba kukwe ye ükete, ñan ñobätä aune kukwe jökrä nuäre nuaindre kräke. Satana kukwe ngwarbe niebare Jehová rüere ye ñongwane rabai bämikani täte ye gare Jehovai. Ye bitikäre, Kä tibien kwitai bä nuäre kwe tö namani kena ie ye erere. Nitre tä “dobote ngwankäre törö jai” ye jökrä gaikröta (Juan 5:28, 29, TNM). Ni ñaka rabai bren aune ni ñaka krütai. Jehovakwe Jesús dianinkä “sribi diablukwe bätäkä ngwarbe juankäre ngwarbe”. Ye abokän Satana tä dre dre nuainne ye jökrä diainkä kwe meden gärätä (1 Juan 3:8). Akwa nengwane, Jehovata ni ngübare bätärekä yebätä nikwe debe biandre ie. Ye köböire ni raba Ngöbö mike gare jai aune ni raba ja töi mike nemen gobran kwe yekri o ñakare (ñäkädre 2 Pedro 3:9, 10 yebätä).a Aune nita ja tare nike ye ngwane, Jehovata ni dimike kä ngwen nüke jai (ñäkädre 1 Corintios 10:13 yebätä).
18 Jehová ñaka ni töi mike ja dibiti ja mike gobran kwe yekri. Ñakare aune, tä ni tuenmetre kukwe den nuaindre akwle jai. Ye kukwe ütiäte nuainbare kwe ni kräke. Ye dre gärätä ye ani mike gare jai.
MÄ RABA KUKWE DEN NUAINDRE AKWLE JAI, ¿YEBITI MÄKWE DRE NUAINDI?
19. a) ¿Kukwe meden ütiäte Jehovakwe nuainbare ni kräke? b) ¿Ñobätä nikwe debe biandre kukwe yebätä?
19 Jehovakwe ni sribebare ne kwe nikwe kukwe diandre nuaindre akwle jai. Ye kukwe ütiäte nuainbare kwe ni kräke abokän köböire nikwe dre nuaindi aune nikwe ja töi mikai Jehová mike täte o ñakare ye ni raba den nuaindre jai. Ni ñaka jondron nire ye erere, ñan ñobätä aune jondron nire ye sribebare ño ye ererebätä tä ja ngwen (Proverbios 30:24-28). Arato ni ñaka máquina ye erere, ñan ñobätä aune máquina sribebare dre nuainkäre ye aibe tä nuainne. Ni törbadre ja ngwain ño, nirebe nikwe ja ketai aune ni törbadre dre nuain ye ni raba den nuaindre akwle jai. Jehová tö kä tuai juto nibätä.
20, 21. ¿Kukwe meden bäri ütiäte mä raba den nuaindre jai kä nengwane?
20 Nikwe Jehová taredre ie tö (Mateo 22:37, 38, TNM). Monso tä rün kwe tarere tä niere ie ja brukwä tätebiti abokän käi nemen juto rünbätä ye erere Jehová töita. Ni tö Jehová mikai täte o ñakare ye niarata ni tuenmetre den nuaindre jai. Satana, Adán aune Eva ja töi mikani ja mike Jehová rüere. Jehovata mä tuenmetre kukwe den nuaindre akwle jai, ¿yebiti mä abokän käkwe dre nuaindi?
21 Jehová mikadre täte ye kukwe bäri ütiäte mä raba den nuaindre jai kä nengwane. Nitre kwati käkwe ja töi mikanina Jehová mike täte aune ñaka ja mike Satanakri (Proverbios 27:11). Ngöbökwe ja tare nika ye diainkä aune Kä tibien kwitai bä nuäre kwe ye nibira gare nie. ¿Mä raba dre nuainne nünankäre yete? Kukwe ye mikai gare kapitulo ja känenkäre yekänti.
a 2 Pedro 3:9, 10, (TNM): “Jehová ñaka ngrötöte kukwe käbämikata kwe ye mikakäre nemen bare, nitre ruäre tä nütüre ye erere, akwa niara tä mun ngübare bätärekä ñobätä ñan aune ñaka tö mun gaite jire iti; ñakare aune mun jökrä käkwe ja töi kwitadre ie niara tö. Akwa köbö Jehovakwe ye rükai ni gokä kwrere aune köbö yete kä kuinta näin ta ye ngö rabai krubäte, akwa jondron keta kabre täi ngire krubäte ngwane, juain ngwarbe aune kä tibien bätä kukwe nuainta kä tibienbätä ye mikai kä mrebiti”.