Kukwe kena sección 11

Kukwe Kristiano Tikani Griegore yebiti kukwe ne mika bike gare jai sección nekänti. Ni ja mräkäre bobre ngwiain ñaka krubäte ye gwirete Jesús därebare, niaratre nämene nüne kä keteiti te aune Jesús sribibare rün yebe, rün ye nämene sribire kri yebätä. Jesús ye abokän rabadre ni kä tibienbätä ye mikakäre Kwäre, ñobätä ñan aune Jehovakwe dianinkä rabakäre Reire Gobran kwe yete kä kwinbätä. Monsotre tärä mäkwe angwane, mäkwe niaratre dimika mike nüke gare jai Jehovakwe töbikabare kwin nire rabai Jesús mräkäre ye diankakäre ne kwe Jesús däredre nitre ja mräkäre töi kwin ye ngätäite. Herodes tö namani Jesús murie ketai ye ngwane Jehovakwe kriemikani ye mäkwe mika gare ietre. Jehová töita ño ye kukwe mada ñaka raba ketebätä jire. Jehovakwe Juan dianinkä ne kwe rabadre ji ükete Jesús käne ye mäkwe drie ietre. Jehová töbätä krubäte ye Jesús nämene tarere aune Ngöbö nämene niara jie ngwen yei tö ngwani kwe aune ñaka tö ngwani akwle kwe jai nämene chi ye ngwane ye mä raba mike gare niaratre ie.