Kukwe nieta Bibliabätä ye metrere tä blite Gobran Ngöbökwe yebätä. Jehová töi nämäne ño kena kä tibien kräke ye erere mikai nemen bare kwe gobran yebiti. ¿Gobran ye abokän dre gärätä? ¿Niena gobrane ye ñokänti gare nie? ¿Dre nuainbarera kwe? ¿Aune dre nuain ja känenkäre kwe? Kukwe ngwantarita ne mikai gare kukwe ja tötikara ne känti aune kukwe ja tötikara ketebu ja käne yebätä.

1. ¿Gobran Ngöbökwe ye abokän dre gärätä aune nire dianinkä gobrankäre yete?

Jehovakwe gobran ye ükaninte. Jesuta Reire gobran yete aune tä gobrane kä kwinbiti (Mateo 4:17; Juan 18:36). Bibliata niere: “Niara rabadi gobrane kärekäre” (Lucas 1:32, 33). Rabadi gobrane Gobran Ngöbökwe yete, aisete gobrandi kwe ni jökräbiti.

2. ¿Nire nire gobrandi Jesube?

Jesús ñan gobrandi kaibe. “Ni jene jene, kukwei jene jene, juta jene jene te käkwe gobrandi ben” (Apocalipsis 5:9, 10). ¿Ni nibe käkwe gobrandi Jesube? Jesús nükani kä tibienbätä yete ja käne, nitre millón kwati ja töi mikanina ja tötike Jesube. Akwa, nitre 144,000 aibe näin kä kwinbiti gobrankäre Jesube (mäkwe ñäkä Apocalipsis 14:1-4 yebätä). Aune nitre kristiano mada rabadi nüne Gobran Ngöbökwe yete kä tibienbätä (Salmo 37:29).

3. ¿Ñobätä Gobran Ngöbökwe bäri kwin gobrantre kä tibienbätä kräke?

Gobrantre ruäre töta nemen kwin nuaindi, akwa die ñaka tä nemen kukwe käbämikata kwe ye mikakäre bare. Kätä niken ta ngwane mada tä nemen täte akwa töi ja aibebätä aune ñaka ni mada dimike. Akwa Jesús gobranka Gobran Ngöbökwe yete ye ñaka diainkä jire. Ngöbökwe gobran ükaninte ye “ñaka gaite jire chi” (Daniel 2:44). Jesukwe gobrandi kä jökräbiti aune ni jökrä mikai tuin ja erebe kwe jai. Jesús ye ni tarekä, ja mäkäkä kwin nibe, ja ngwanka metre. Ye erere ni rabadre ni mada tarere, ja mäke kwin, ja ngwen metre ye driei kwe (mäkwe ñäkä Isaías 11:9 yebätä).

4. Gobran dite käkwe gobrandi kä tibienbätä

Jesús ye dite aune töbätä gobranka bäri kwin gobrantre kä nebätä kräke. Ñäkädre Mateo 28:18 yebätä aune kukwe ne kädriedre jabe:

• ¿Ñobätä Jesús ye gobranka bäri kri gobran kä nebätä kräke?

Gobrantre kä nebätä tä gobrane kä ruäre aibebiti, akwa käta nüke ngwane ñaka nemena gobrane, ¿ye erere rabai bare Gobran Ngöbökwebätä? Ñäkädre Daniel 7:14 yebätä aune kukwe ne kädriedre jabe:

• ¿Gobran Ngöbökwe ñaka gaite ye ñobätä kwin?

• ¿Gobrandi kä jökräbiti tibien kwe ye köböire dre kwin rabai bare?

5. Gobran kä nebätä diandrekä

¿Ñobätä Gobran Ngöbökwe rabadre gobran kä nebätä täte ribeta? VIDEO mikadre ñärärä, biti kukwe ne kädriedre jabe:

VIDEO: ¿Dre abokän Gobran Ngöbökwe? (oto chi) (1:41)

• ¿Gobran kä nebätä käkwe kukwe meden nuainbarera?

Ñäkädre Eclesiastés 8:9 yebätä aune kukwe ne kädriedre jabe:

• ¿Gobran Ngöbökwe rabadre gobran kä nebätä täte raba ruin mäi? ¿Ñobätä?

6. Gobrantre Gobran Ngöbökwe yete ie ni töi nüke gare

Jesús Rei nikwe, namani ni erere aune nünanbare kwe kä tibienbätä aisete ni raba “ruentari tare ie” (Hebreos 4:15). Jehovakwe nitre merire aune brare ja ngwanka metre 144,000 dianinkä rabakäre gobrane Jesube. Nitre ne abokän “jene jene, kukwei jene jene, juta jene jene te” (Apocalipsis 5:9).

• Nita ja tuin kukwe ño ben ye gare kwin Jesús ie aune nitre gobranka ben ie, ¿ye tä mä dimike? ¿Ñobätä mätä niere?

7. Gobran Ngöbökwe lei ükaninte ye bäri kwin lei kä nebätä kräke

Gobrantre tä lei sribere nitre gobrainta kwe kriemikakäre aune dimikakäre. Ye erere arato, Gobran Ngöbökwe kwe lei tärä arato aune nitre gobran yete ye rabadre mike täte. Ñäkädre 1 Corintios 6:9-11 yebätä aune kukwe ne kädriedre jabe:

• ¿Ngöbökwe kukwe ükaninte ye nitre jökrä rabai mike täte ngwane kä rabai ño rabai ruin mäi?a

• ¿Nitre Gobran Ngöbökwe te rabadre kukwe ükaninte Jehovakwe mike täte ye kwin ruin mäi? ¿Ñobätä mätä niere?

• ¿Nitre ñaka lei Ngöbökwe mike täte ye raba ja töi kwite ye ñokänti gare nie? (Bersikulo 11 mikadre ñärärä).

¿DRE NIBI GARE MÄI?

Gobran Ngöbökwe ye metre tä kä kwinbiti aune gobrandi kä jökräbiti kwe.

Ngwankäreta törö

• ¿Nire nire gobrandi Gobran Ngöbökwe te?

• ¿Ñobätä Gobran Ngöbökwe ye bäri kwin gobrantre kä tibienbätä kräke?

• ¿Nitre Gobran Ngöbökwe te käkwe dre nuaindre ngübata Jehovakwe?

KUKWE MIKE GARE BÄRI JAI

Gobran Ngöbökwe tädi medente driebare Jesukwe yebätä ñäke.

“¿Gobran Ngöbökwe ye ta ni brukwäte?” (Artículo jw.org)

¿Ñobätä ni testiko Jehovakwe tä ja ngwen bäri metre Gobran Ngöbökwe ie gobran kä nebätä kräke?

Gobran Ngöbökwe aibe kiri (1:44)

Jehovakwe nitre 144,000 dianinkä gobrankäre Jesube yebätä Biblia tä dre niere ye mike gare jai.

“¿Nire nire näin kä kwinbiti?” (Artículo jw.org)

¿Ngöbö aibe raba kukwe ükete kä jökräbiti ye ñokänti namani era meri iti kräke?

“Kukwe blo ye ükaite rababa gare tie” (Ni Mikaka Ngwäte, noviembre 2011)

1914 ja käne Gobran Ngöbökwe namani gobrane kä kwinbätä. Yete ja käne kä krüte gobran kä nebätä kräke kömikani. ¿Ñokänti ye gare nie? Kukwe rakaikä mikani gare Bibliakwe, kukweta nakainkä käbiti tibien aune nitre tä ja ngwen ño 1914 ja käne ye rabai gare nie.

1. ¿Dre rakaikä mikani gare Bibliakwe?

Tärä Bibliabätä, Daniel käkwe mikanina gare Gobran Ngöbökwe rabai gobrane kä keta kükü näin ta ye bitikäre (Daniel 4:16, 17). Siklo kwati nikani ta ye bitikäre kä ye arabe Jesukwe kädekani, nitre ñakare israelitare kräke köbö kitani aune kä ye jämi krüte driebare kwe (Lucas 21:24). Rabai gare niere erere, kä keta kükü ye krütani 1914.

2. ¿1914 ja käne dre nemen bare käbiti tibien aune nitre tä ja ngwen ño?

Nitre ja tötikaka Jesukwe ngwanintari ie: “¿Dre bä rabai mä jataita känenkri aune kä ja ken känenkri?” (Mateo 24:3, Ngöbö Täräe [NGT], tärä okwä ükaninte). Niara rabaira reire Gobran Ngöbökwe yete ngwane, kukwe keta kabre jatai nakainkä käbiti tibien niebare kwe ietre. Ñodre, rü rabai nakainkä, mrö nika rabai, aune dobo krikri rabai mate (mäkwe ñäkä Mateo 24:7 yebätä). Bibliakwe mikani gare arato, kä krüte näire nitre rabai ja ngwen blo ye köböite ñan rabai nuäre nünankäre (2 Timoteo 3:1-5). 1914 ja käne nitre tä ja ngwen ye erere aune kukwe nakainkä bäri.

3. ¿Gobran Ngöbökwe namani ngwane ñobätä kukwe bäri käme jatani nemen bare käbiti tibien?

Jesús namani Reire Gobran Ngöbökwe yete, ye bätäräbe rü nakaninkä kä kwinbiti, niarakwe rübare Satana aune chokalitre rüere. Satana nianinte aune Biblia tä niere “kitaba kwintubu kä tibienbätä aune angeletre kwe ye kitaba kwintubu ben” (Apocalipsis 12:9, 10, 12, TNM). Satana tä rubun krubäte ñobätä ñan aune gate köböra. Yebätä tä ni kä jökräbiti tibien ngwen ja tare nike krubäte. Ye arabätä kukwe käme nemen bare kä jökräbiti tibien, akwa Gobran Ngöbökwe käkwe kukwe jökrä käme ne mikai krüte.

JA TÖTIKE BÄRI NGUSETA

4. Profecia Bibliabätä nüke ni ngwena 1914

VIDEO: 1914 ja käne gobran Ngöbökwe tä gobrane (5:02)

Ngöbökwe rei Babilonia Nabucodonosor mikani köböre kukwe rakaikä mikakäre gare ie. Köböbare aune dre gärätä ye Danielkwe mikani gare, ye abokän profecías tä blite gobran Nabucodonosorkwe aune Gobran Ngöbökwe yebätä (ñäkädre Daniel 4:17 yebätä).a

Ñäkädre Daniel 4:20-26 yebätä. Aune recuadro yebiti kukwe ngwantarita jatäri ne mikadre gare.

• A) ¿Dre tuani köböre Nabucodonosorkwe? (Bersikulo 20 aune 21 mikadre ñärärä).

• B) ¿Kri yebätä dre rabai bare? (Bersikulo 23 mikadre ñärärä).

• C) ¿Kä keta kükü krütadre ye bitikäre dre namani rakadrekä? (Bersikulo 26 mikadre ñärärä).

Kri tuani köböre aune Gobran Ngöbökwe

PROFECÍA (Daniel 4:20-36)

Gobran

A) Kri dati nemen diore kwin

Gobran dianinkä gräbiti

B) “Kri tikekä” aune kä tuenmetre niken keta kükü ta

Gobran ükaninteta

C) “Mä rabaita gobrane”

Namani bare kena:

• D) ¿Kri ye nämäne nire bämike? (Bersikulo 22 mikadre ñärärä).

• E) ¿Ñongwane ñaka namanina gobrane jankunu? (Ñäkädre Daniel 4:29-33 yebätä).

• F) ¿“Kä” keta kükü ye bitikäre dre namani barebätä? (Ñäkädre Daniel 4:34-36 yebätä).

NAMANI BARE KENA

Gobran

D) Nabucodonosor rei Babilonia

Gobran dianinkä gräbiti

E) Kä 606 K.k.b kä nikwitaninkä Nabucodonosor dokwäbiti aune kä kwä kükü te ñaka gobranbare kwe

Gobran ükaninteta

F) Kä namaninta metre Nabucodonosor dokwäbiti aune namaninta gobrane bobukäre

Namani bare ketebukäre:

• G) ¿Kri nämäne nire nire bämike? (Ñäkädre 1 Crónicas 29:23 yebätä).

• H) ¿Ñongwane ñaka namanina gobrane? ¿Jesús nämäne kä tibienbätä ngwane, niaratre ñaka nämäne gobrane ye ñokänti gare nie? (Ñäkädre Lucas 21:24 yebätä).

• I) ¿Gobran ne ükaninteta mendente aune ñongwane?

NAMANI BARE KETEBUKÄRE

Gobran

G) Reitre israelita nämäne gobrane Ngöbö käbiti

Gobran dianinkä gräbiti

H) Kä 607 K.k.Jerusalén ganinte; yete ja käne reitre israelita ñaka gobranbare kä 2,520 año te

Gobran ükaninteta

I) 1914 Jesús namani Reire Gobran Ngöbökwe te kä kwinbätä

5. 1914 ja käne kä jatani jene

VIDEO mikadre ñärärä.

VIDEO: 1914 ja käne kä jatani jene (1:10)

Jesús rabai gobrane ngwane kä jatai ño ye mikani gare kwe. Ñäkädre Lucas 21:9-11 yebätä aune kukwe ne kädriere jabe:

• Kukwe nieta nete ne, ¿meden namanina bare mä okwäbiti o meden kädrie tärä mä olote?

Kä krüte näire nitre rabai ja ngwen ño ye apóstol Pablo käkwe mikani gare. Ñäkädre 2 Timoteo 3:1-5 yebätä aune kukwe ne kädriedre jabe:

• Nitre rabai ja ngwen ño nieta nete, ¿ye erere nitre tä ja ngwen tuin mäi?

6. Gobran Ngöbökwe niena gobrane gare nie ye rabadre ni töi mike kukwe nuainne

Ñäkädre Mateo 24:3, 14 yebätä aune kukwe ne kädriere jabe:

• ¿Sribi meden nuainta abokän tä mike gare Gobran Ngöbökwe niena gobrane?

• ¿Mä raba sribire ño siba?

Gobran Ngöbökwe niena gobrane aune kä nebera braibe ne kwe gobrandre kwe kä jökräbiti. Ñäkädre Hebreos 10:24, 25 yebätä aune kukwe ne kädriedre jabe:

• Kä kitra ja ken tuin nie aisete, ¿ni rabadre dre nuainne?

¿DRE NIBI GARE MÄI?

Profecía Bibliabätä aune kukweta nemen bare käbiti tibien ye tä mike gare Gobran Ngöbökwe niena gobrane. Nita kukwe driere Gobran Ngöbökwe yebätä aune näin gätäbätä yebiti nita bämike kukwe ye metre ni kräke.

Ngwankäreta törö

• Kä keta kükübätä tärä Danielkwe blitabare ye krütani ngwane, ¿dre namani bare?

• ¿Dreta mike gare metre mäi Gobran Ngöbökwe jatani gobrane 1914?

• ¿Gobran Ngöbökwe niena gobrane ye era mä kräke mä raba bämike ño?

KUKWE MIKE GARE BÄRI JAI

1914 ja käne kä jatani jene ye nitre ja tötikaka krikri tä niere yebätä ñäke.

“Ja ngwan jatani bäri käme” (Ni Mikaka Ngwäte, abril 2007)

Profecía Mateo 24:14 ye käkwe ni iti töi mikani ño ye mike gare jai.

“Bolameta ye käi näma juto tibätä” (Ni Mikaka Mokre, núm. 3 2017)

¿Profecía tä Daniel kapitulo 4 ye tä blite Gobran Ngöbökwe yebätä ye ñokä nti gare nie?

“¿Ñongwane Gobran Ngöbökwe jatani gobrane? (Kukwe kena)” (Ni Mikaka Mokre, 1 octubre 2014)

¿Dre tä mike gare “kä” keta kükü nieta Daniel kapitulo 4 ye krütani 1914?

“¿Ñongwane Gobran Ngöbökwe jatani gobrane? (Kukwe ketebu)” (Ni Mikaka Mokre, 1 noviembre 2014)

Gobran Ngöbökwe niena gobrane aune köböra kukwe ükete kä tibienbätä. Kukwe kwin nuaindi gobran yekwe aune mä raba ngübare ngäbiti kä jutobiti ye ani mike gare jai.

1. ¿Kukwe ükadrete aune kä jäme rabadreta kä tibienbätä yekäre Gobran Ngöbökwe dre nuaindi?

Rü kri Armagedón yete, Jesús Rei Gobran Ngöbökwe te käkwe nitre aune gobrantre kä tibienbätä kukwe blo nuainkä ye gaite (Apocalipsis 16:14, 16, TNM). Kä ye näire Bibliabätä kukwe käbämikata ne rabai bare: “Kä nebera braibe aune nitre käme ye ñaka rabaira” (Salmo 37:10). Gobran yebiti Jesukwe kukwe ükaite aune kä jäme rabai kä jökräbiti (mäkwe ñäkä Isaías 11:4 yebätä).

2. Ngöbö töi mikai nemen bare kä jökräbiti ngwane, ¿nitre rabai ja ngwen ño?

Gobran Ngöbökwe yete, “nitre kukwe metre nuainkä yekwe kä tibien rabai aune nünain kärekäre te kwetre” (Salmo 37:29). ¡Nitre rabai Jehová tarere, ja tarere kwärikwäri, ja ngwen kwin ngwane nüna rabai ño ye bämike ja töite! Ni ñaka rabai nemen bren aune nünain kärekäre.

3. Nitre ja ngwanka blo ye gaite, ¿bitikäre dre rabai bare Gobran Ngöbökwe ie?

Nitre ja ngwanka käme gaite ye bitikäre Jesukwe gobrandi kä 1,000 te. Kä ye ngwane, Jesús aune nitre 144,000 gobranka käkwe ni kä tibienbätä dimikai nemen kwäre ngite yebätä aune nementa metre ja ngrabarebiti. Kä 1,000 krati ye jataira krüte ngwane, kä tibien kwitaira bä nuäre aune nitre jökrä rabai nüne kä jutobiti, ñobätä ñan aune rabaitre Jehová kukwe mike täte. Ye bitikäre Jesús gobran ye biainta Rün kwe Jehová ie, aune Ngöbö kä rabai deme ñan nuainbare jire erere (Mateo 6:9, 10). Jehová juta kwe kriemikaka aune gobranka kwin rabai gare metre. Biti Jehovakwe, Satana, chokalitre aune nitre reketaka kiri ye gaite (Apocalipsis 20:7-10). Gobran Ngöbökwe kukwe ükaite kwin ye rabai kärekäre.

JA TÖTIKE BÄRI NGUSETA

4. Gobran Ngöbökwe gobrantre kä tibienbätä gaite

“Käre ni känebätä tä ni mada gobraine mikakäre ja tare nike” (Eclesiastés 8:9). Kukwe jökrä blo nuainta ye Jehovakwe ükaite Gobran jakwe yebiti.

Ñäkädre Daniel 2:44 aune 2 Tesalonicenses 1:6-8 yebätä aune kukwe ne kädriere jabe:

• Jehová aune monso kwe Jesús, ¿käkwe dre nuaindi gobrantre kä nebätä aune nitre dimikaka yebätä?

• Kukwe niena gare Jehová aune Jesubätä mäi, ¿ye ñobätä tä mike gare mäi kukwe ükaite metre kwe aune ñan ni ruäre aibe kräke?

5. Jesús gobranka bäri kwin

Jesús tädi gobrane Gobran Ngöbökwe te ngwane, kukwe keta kabre kwin nuaindi kwe ni kä tibienbätä kräke. Jesús tö ni dimikai krubäte aune Ngöbökwe ja die biani ie nuainkäre ye mikakäre gare jai VIDEO mikadre ñärärä.

VIDEO: Dre rabai bare gobran Ngöbökwe yebiti ye Jesús bämikani (1:13)

Jesús nämäne kä tibienbätä ngwane kukwe keta kabre nuainbare kwe, ye erere Gobran Ngöbökwe käkwe nuaindi ye bämikani kwe. Kukwe käbämikata tä jatäri, ¿ne meden mä tö tuai nemen bare? Kukwe käbämikata tä textobätä ye jökräbätä ñäkädre.

6. Ja känenkäre Gobran Ngöbökwe köböire kukwe kwin rabai nikwe

VIDEO: Jondron kwin tä ja känenkäre ni kräke (4:38)

Ñäkädre Salmo 145:16 yebätä aune kukwe ne kädriere jabe:

• Ni nire aune jondron nire jökrä “tö dre dre ie” ye erere Jehovakwe biain ie, ¿yebätä ja ruin ño mäi?

¿DRE NIBI GARE MÄI?

Gobran Ngöbökwe köböire kä tibien kwitai bä nuäre aune nitre töi kwin aibe rabai Jehová mike täte kärekäre.

Ngwankäreta törö

• ¿Gobran Ngöbökwe käkwe dre nuaindi ne kwe Jehová kä rabadre deme?

• Kukwe käbämikata Bibliabätä ye Gobran Ngöbökwe käkwe mikai nemen bare, ¿ye ñobätä gare metre nie?

• Gobran Ngöbökwe kukwe nuaindi, ¿ye meden mä tö tuai nemen bare?

KUKWE MIKE GARE BÄRI JAI

Dre abokän Armagedón ye mike gare jai.

“¿Dre abokän Armagedón?” (Artículo jw.org)

“Ja tare nikai kri krubäte” ye ngwane dre rabai bare yebätä mike gare jai (Mateo 24:21).

“Ja tare nikai kri krubäte ye abokän dre” (Artículo jw.org)

Kukwe rabai bare Gobran Ngöbökwe ie, ¿yete ni ja mräkäre tä kä ngwen juto jabätä ye raba bämike ño ja töite?

Mäta kä bä nuäre te ye bämike ja töite (1:50)

Kukwe nämäne activista político ngwen töbike ye ükaite ye ñokänti namani gare ie ye mike gare jai biografía “Kukwe keta kabre nämä ti töi nike” yete.

“Biblia niaratre töi kwitani” (Ni Mikaka Mokre, 1 enero 2012)