¿Ngöböta fiesta jökrä kain ngäbiti?

Nikwe nünandre kä jutobiti aune ruäre ngwane fiesta sribedre kä ngwankäre juto jabätä ie Jehová tö. Akwa, ¿fiesta aune kä ngwanta juto jabätä ye jökrä tuin kwin Ngöböi? Ngöbö tare nikwe aune ja ruin ño ie ye ütiäte ni kräke, ¿ye ni raba bämike ño?

1. ¿Fiesta keta kabre nuainta ye ñobätä Ngöbö ñan kai ngäbiti?

Fiesta keta kabre ye Biblia ñan nuainmana o kite kukwe ngwarbe yekri rabai gare mäi ye raba mä töi mike ñan krütare. Fiesta ye ruäre kite kukwe ngwarbe mikata täte yekri abokän känti ja mäkätä chokabe o nitre töi mikata ni üai ñan krüte jire ye mike täte. Ne madakäre, kukwe ruäre nuainta ye kite supersticiones o suerte yekri (Isaías 65:11). Ye medenbätä “Jondron käme kämebätä, mun ñansi kise mika” nieta Jehovakwe ye ñan ni töi mike niä (2 Corintios 6:17).a

2. ¿Fiesta nuainta nitre mikakäre ütiäte jai yebätä Jehová töita ño?

Nitre tä tö ngwen ni kä nebätä ie ye erere nikwe ñaka ja ngwandre nieta Jehovakwe nie, ñobätä ñan aune ye kö okwä (mäkwe ñäkä Jeremías 17:5 yebätä). Fiesta ruäre nuainta gobran o nitre käkwe kukwe kwin nuainbare (héroes) ye käi ngwankäre juto jabätä. Fiesta mada känti símbolo patrio o independencia ye käi ngwanta juto jabätä (1 Juan 5:21). Arato fiesta mada nuainta känti nitre töi mikata política yebätä o kukwe nuainne gwairebe. Nikwe nitre o organización ñaka tä Ngöbö töi nuainmana ye mikadre bäri ütiäte jai ngwane, ¿ja rabadre ruin ño Ngöböi raba ruin mäi?

3. ¿Kukwe meden nuainta abokän tä fiesta mike käme?

“Dö” ña ere, fiestate kukwe käme nuainta aune fiesta nuainta dö ñakäre ye käme nieta Bibliabätä (1 Pedro 4:3). Fiesta ruäre känti kätä nikwitekä nitrebiti aune tätre ja ngwen käme. Ni tö ja ketai jankunu Jehovabe ngwane, nikwe kä mikadrekä kukwe kämekäme jökrä nuainta yebätä.

JA TÖTIKE BÄRI NGUSETA

4. Fiesta känti Jehová mika ñan ütiäte jai yebätä mä ñan rika

Ñäkädre Efesios 5:10 yebätä aune kukwe ne kädriedre jabe:

• Nikwe fiesta keteiti nuaindi siba o ñakare yekäre, ¿nikwe dre mikadre gare käne jai?

• ¿Fiesta meden nuainta mä käite?

• ¿Fiesta nuainta ye tuin kwin Jehovai raba ruin mäi?

Ñodre, ¿Ngöbö töita ño cumpleaño yebätä ye mä tärä ngwentari jai? Ni Ngöbö mikaka täte kwani cumpleañobätä ye Biblia ñan niere jire, akwa cumpleaño ketebu nuainbare nitre ñan Ngöbö mikaka tätekwe yebrä nieta Bibliakwe. Ñäkädre Génesis 40:20-22; Mateo 14:6-10 yebätä aune kukwe ne kädriedre jabe:

• ¿Kukwe meden känti cumpleaño ketebu ne ja erebe?

• Mäkwe ñäri kukwe nebätä ne bitikäre, ¿Jehová töita ño cumpleaño yebätä raba ruin mäi?

Yebiti ta, mä raba nemen ngwentari jai “¿ti cumpleaño nuaindre o ti kwandre fiesta keteitibätä abokän tuin käme Biblia ie ye ütiäte Jehová kräke?”. Ñäkädre Éxodo 32:1-8 yebätä aune VIDEO mikadre ñärärä, biti kukwe ne kädriedre jabe:

VIDEO: Fiesta tuin käme Ngöböi (5:07)

• ¿Kukwe meden ka ngäbitita Ngöbökwe ye ñobätä nikwe mikadre gare kwin jai?

• ¿Ni raba nuainne ño?

¿Fiesta kwin Ngöbö kräke ye ñokänti raba nemen gare nie?

• ¿Ñan kite kukwe drieta Bibliakwe yekri? Mikakäre gare jai, medente kömikani ye mäkwe känä.

• ¿Tä nitre, organización aune símbolo patrio ye mike ütiäte krubäte jai? Kukwe jökräbiti ta nita Jehová mike bäri ütiäte jai aune niarakwe kukwe blo kä nebätä ye jökrä ükaite ie nita tö ngwen.

• ¿Kukwe nuainta yete yebiti ñaka kukwe Bibliabätä mikata täte? Ni tädre mrebe kukwe jökräbätä.

5. Mäkwe ja di ngwan ne kwe kukwe mikata täte mäkwe ye mikadre ütiäte jai

VIDEO: Kukwe mikata täte ye mikadre gare töi kwinbiti (2:01)

Ñäkädre Mateo 7:12 yebätä aune kukwe ne kädriedre jabe:

• Mäkwe ñaka fiesta ne nuaindre mäkwe niedre mä mräkä ie, ¿nieta bersikulo nekänti?

• ¿Mä ñan fiesta ruäre käi ngwain juto jabätä mä mräkäbe, akwa niaratre ütiäte mä kräke aune tare mäkwe ye mä raba bämike ño ietre?

6. Kä tädre juto nibätä ie Jehová tö

Nita kä ngwen juto jabätä ni mräkätrebe aune ja ketamuko nikwe ben ye tuin kwin krubäte Jehovai. Ñäkädre Eclesiastés 8:15 yebätä aune kukwe ne kädriedre jabe:

• ¿Nikwe nünandre kä jutobiti ie Jehová tö ye bersikulo ne tä bämike ño?

Ni Jehová mikaka täte käkwe kä ngwandre juto jabätä aune tädre keteitibe ie Jehová tö. Kukwe ne nemen bare ño gätä kri internacional yete, mikakäre gare jai VIDEO mikadre ñärärä.

VIDEO: ¿Gätä kri internacional te ja ka ngäbitita ño? (5:40)

Ñäkädre Gálatas 6:10 yebätä aune kukwe ne kädriedre jabe:

• ¿Kukwe kwin nuainkäre ni mada kräke fiesta ruäre nuaindre ye ribeta?

• ¿Mäta regalo bien ja töi jeñebiti ye bäri tä kä mike juto mäbätä? O ¿regalo tä nemen biandre mäi ni madai fiestate ye bäri tä kä mike juto mäbätä?

• Ni testiko kwati ruäre ngwane, tä fiesta sribere monsotre kwe kräke aune tä regalo bien ietre. Monso tärä mäkwe ngwane, ¿mä raba dre kwin nuainne kräketre?

¿DRE NIBI GARE MÄI?

Nikwe kä ngwandre juto jabätä ni mräkätre aune ja ketamuko nikwe ben ie Jehová tö, akwa fiesta tuin käme niara ie yebätä ni ñan rikadre ie niara tö.

Ngwankäreta törö

• ¿Fiesta keteiti käi ngwanta juto jabätä ye Jehovata kai ngäbiti ye mikakäre gare jai kukwe meden ngwandretari jai?

• ¿Kukwe dianta nuaindre jai fiesta yebätä ye ni raba ni mräkätre aune ja ketamuko nikwe dimike ño mike nüke gare jai?

• ¿Nikwe kä ngwandre juto jabätä aune nünandre kä jutobiti ie Jehová tö ye ñokänti gare nie?

KUKWE MIKE GARE BÄRI JAI

Fiesta ruäre ni kristiano ñan käi ngwen juto jabätä ye mike gare jai.

“¿Ñobätä ni testiko Jehovakwe ñaka fiesta ruäre käi ngwen juto jabätä?” (Artículo jw.org)

Cumpleaño ye Ngöbö ñaka kai ngäbiti ye kukwe ketabokä tä mike gare metre ye mike gare jai.

“¿Ñobätä ni testiko Jehovakwe ñaka cumpleaño nuainne?” (Artículo jw.org)

Fiesta ngwarbe käi ngwanta juto jabätä, ye monsotre kia tä Jehová tarere ñan kain ngäbiti ño ye mike ñärärä.

Mä ütiäte krubäte Jehová kräke (11:35)

Ni kristiano millón kwati krubäte ñan navidad käi ngwen juto jabätä, ¿akwa kätä juto bätätre?

“Jondron bäri kwin kwani ietre” (Ni Mikaka Mokre, 1 diciembre 2012)