KUKWE JA TÖTIKARA 47
¿Mä niena juto ja ngökakäre ñöte?
Mätä ja tötike Bibliabätä ye köböire kukwe keta kabre niena gare Jehovabätä mäi. Ne madakäre mäkwe kukwe ruäre kwitani kukwe nemen gare mäi ye mikakäre täte. Akwa nane kukwe tärä mä ketebätä abokän köböite mä ñan ja denkä mento aune ja ngökö ñöte. Kukwe ruäre köböite ñan tä nemen nuäre ja ngökakäre ñöte aune dre nuain raba ganainkäre ye kukwe ja tötikara ne tä mike gare.
1. ¿Kukwe rabadre gare nuäi mäi Bibliabätä ja ngökakäre ñöte?
Ja ngökakäre ñöte “kukwe era metre” ye rabadre gare mäi (1 Timoteo 2:4). Ne ñan tä mike gare mä jämi ja ngökö ñöte ye känenkri kukwe ngwantarita Bibliabätä ye jökrä rabadrera gare mäi. Ñodre, ni kristiano mekerabe kukwebätä yei täbe ja kitadre jankunu (Colosenses 1:9, 10). Akwa, kukwe drieta Bibliakwe ye ruäre rükadrera gare kwin mäi. Kukwe metre Bibliabätä gare nuäi mäi ye nitre umbre ji ngwanka mä dimikai mike gare jai.
2. ¿Ja ngöka ñöte känenkri mä dre dre nuaindre?
Mä jämi ja ngökö ñöte ye känenkri “ja töi kwite aune näinta Ngöbö kokwäre” nieta Bibliakwe (mäkwe ñäkä Hechos 3:19 yebätä). ¿Ye dre gärätä? Ye abokän mä ja mikani ngite yebätä ja ruin ulire krubäte mäi abokänbätä mäta ngite kitamana ta jabiti Jehovai. Aune kukwe blo ye mä ñan kain ngäbiti jire aune Ngöbö töi ño ye erere mä töita kwatibe nüne meden gärätä. Ne madakäre, mätä nemen konkrekasionte siba näin käre gätäbätä aune kukwe driere publicador no bautizado erere.
3. ¿Ñobätä kä jürä ye ñaka rabadre mä ketebätä ja ngökä ñote yebätä?
Nitre ruäre nane ja mikadi ngite aune ja kukwei kitaninkä kwe Jehovai ye ñan mikai bare kwetre tä nemen ruin ietre, ye jüräta nemen bätätre. Bäkänä, nitre brare aune merire ja ngwanka metre ie naninte kädrieta Bibliakwe ye erere rainte mäi. Akwa ni rabadre kukwe jökrä nuainne metre ye ñan ngübata Jehovakwe, ye mäkwe ngwan törö jai (mäkwe ñäkä Salmo 103:13, 14 yebätä). Mä raba dre nuainne ye erere mä ja di ngwain nuainne ngwane, kä rabai juto Jehovabätä aune mä dimikai kwe. Niarata niere, kukwe ñaka jire raba ni denkä ja tare Ngöbökwebätä (mäkwe ñäkä Romanos 8:38, 39 yebätä).
JA TÖTIKE BÄRI NGUSETA
Kukwe ketebu raba mä dimike ja ngökö ñöte kukwe ñobiti ta ye ani mike gare jai: Jehová mikadre gare kwin jai aune tuadremetre ja dimike.
4. Jehová mikadre gare kwin jai
¿Mä jämi ja ngökö ñöte känenkri Jehová rabadre gare nuäi mäi? Niara rabadre gare kwin mäi ye rabadre mä töi mike tarere aune mike täte. Ni ja tötikaka kä jökräbiti tibien käkwe kukwe ye nuainbarera ño, mikakäre gare jai VIDEO mikadre ñärärä, biti kukwe ne kädriedre jabe:
Video tä niere erere, ¿dre käkwe nitre ja tötikaka dimikani rabakäre juto ja ngökakäre ñöte?
Ñäkädre Romanos 12:2 yebätä aune kukwe ne kädriedre jabe:
¿Kukwe drieta Bibliakwe ye ruäre ñan nuäre kädre ngäbiti mä kräke?¿Ni testiko Jehovakwe tä kukwe metre driere ruin mäi?
Ye ñan nemen era mä kräke ngwane, ¿mä raba dre nuainne?
5. Mä raba kukwe jökrä ganainne
Nita ja denkä mento Jehová kräke aune ja ngökö ñöte ngwane ni jökrä tä ja tuin kukwe kri ben, ye mikakäre gare keteiti jai. VIDEO mikadre ñärärä, biti kukwe ne kädriedre jabe:
¿Kukwe meden nämäne Narangerel ketebätä abokän tuanimetre kwe sribikäre Jehová kräke?
¿Nämäne Jehová tarere ye käkwe dimikani ño kukwe nämäne ketebätä ye ganainne?
Ñäkädre Proverbios 29:25; 2 Timoteo 1:7 yebätä aune kukwe ne kädriedre jabe:
¿Medente ja dita kwen nie kukweta nemen ni jiete ye ganainkäre?
6. Jehovakwe mä dimikai yei tö ngwen kwatibe
Mäkwe dre nuaindre ie Jehová tö, ye niarakwe mä dimikai mike nemen bare VIDEO mikadre ñärärä, biti kukwe ne kädriedre jabe:
¿Ñobätä ni ja tötikaka ie ja ñan namani törö ja ngökakäre ñöte?
¿Dre käkwe niara dimikani tö ngwen bäri Jehovai?
Ñäkädre Isaías 41:10, 13 yebätä aune kukwe ne kädriedre jabe:
Mä ja dianinkä mento Jehová kräke känti mä ja kukwei kitaninkä ye rabai bare mäi, ¿ye ñobätä tädre gare metre mäi?
7. Mä tare Jehovakwe yebätä debe bien ie
Mä tare krubäte Jehovakwe yebätä mäkwe töbikai bäri ngwane, ye käkwe mä töi mikai bäri debe bien ie aune bäri mä tö rabai sribidi kräke kärekäre. Ñäkädre Salmo 40:5 yebätä aune kukwe ne kädriedre jabe:
¿Regalo biani Jehovakwe mäi ye meden bäri ütiäte mä kräke?
Jeremías ni Ngöbö kukwei niekä ye nämäne Jehová aune kukwe kwe ye tarere aune nämäne Ngöbö kä ngwen jabätä ye nämäne ütiäte krubäte kräke. Niarakwe niebare “mä kukwei ye käkwe kä mikani juto aune nuäre ti brukwäbätä, tita mä kä ngwen jabätä, oh, Jehová” (Jeremías 15:16). Kukwe ngwantarita ne mike gare.
¿Nita ja mike testiko Jehovakwe ye ñobätä ütiäte krubäte ni kräke?
¿Mä tö ja ngökai ñöte ja mikakäre testiko Jehovakwe?
¿Kukwe tärä keteiti abokänbätä mä ñan raba ja ngökö ñöte?
¿Mä raba dre nuainne ne kwe mä ja ngökadre ñöte?
NITRE RUÄRE TÄ KUKWE NE NIERE: “Tikwe ja mikadre ngite ye jürä tibätä aune kukwe ngübata ni testiko ja ngökani ñöte ie ye erere ñan raba nemen bare tie ruin tie”.
¿Ja ruin kore mäi?
¿DRE NIBI GARE MÄI?
Kukweta mä ketebätä köböite mä ñan ja ngökö ñöte ye mä raba ganainne Jehová diebiti.
Ngwankäreta törö
¿Kukwe rabadre gare nuäi Bibliabätä mäi ne kwe mäkwe ja ngökadre ñöte?
¿Mä jämi ja ngökö ñöte känenkri mä rabadre dre dre nuainne?
¿Ñobätä kä jürä ye ñaka rabadre mä ketebätä ja ngökä ñote yebätä?
KUKWE MIKE GARE BÄRI JAI
Dre käkwe mä töi mikadre ja ngökö ñöte ye mike gare jai.
“¿Mä nibira juto ja ngökakäre ñöte?” (Ni Mikaka Mokre, marzo 2020)
Kukwe ruäre tä mä ketebätä yebe mä raba ja tuin ño ye mike gare jai.
“¿Makwe ti ngökadre ñöte nete abko rabadre ño?” (Ni Mikaka Mokre, marzo 2019)
Ja ngökakäre ñöte ni iti kukwe ñan nuäre ganainbare ye mike ñärärä.
‘¿Ñöbätä mäta kä tuenmetre niken raire ta ja ngökakäre ñöte?’ (1:10)
Ataa käkwe ja ngökadre ñöte o ñakare ye kenanbe ñan namani gare ie, akwa dre käkwe töi mikani kukwe ütiäte krubäte ye den nuaindre jai ye mike gare jai.