KUKWE JA TÖTIKARA 38
Ja nire biani regalore nie yebätä debe biandre
Ja nire biani nie ye köböire kukwe keta kabre kwin ni raba käi ngwen juto jabätä. Kukwe tare ben nita ja tuin akwa yebiti ta kukwe keta kabre tä kä nebätä ye ni raba käi ngwen juto jankunu jabätä. Jehovakwe ja nire biani nie yebätä nita debe bien ie, ¿ye ni raba bämike ño? ¿Kukwe meden bäri ütiätebätä nikwe debe biandre?
1. ¿Ñobätä nikwe ja nire mikadre ütiäte jai?
Ni rabadre ja nire mike ütiäte jai ñobätä ñan aune Jehová ni Rün ni tarekä käkwe biani nie. Niara ye “ja nire bianka” ñobätä ñan aune jondron jökrä nire ye sribebare kwe (Salmo 36:9). Niara “ara kätä ja nire, ja murie, angwane jondron jökrä bien nie kä tibienbätä” (Hechos 17:25, 28, Ngöbö Täräe [NGT], tärä okwä ükaninte). Aisete, nita dre ribere jai nünankäre ye Jehovata bien nie. Niara ye ara köböire, nita nüne kä jutobiti (mäkwe ñäkä Hechos 14:17 yebätä).
2. ¿Jehovakwe ja nire biani nie yebätä nita debe bien ye ni raba bämike ño?
Köbö te mä meye namani murore yete ja käne Jehovakwe ja töi mikani mäbätä. Üai deme köböire ni Jehová mikaka täte iti käkwe niebare orasionte: “Ti jatani krire nikwite ye mäkwe tuani” (Salmo 139:16). Ja nire mäkwe ye ütiäte krubäte Jehová kräke (mäkwe ñäkä Mateo 10:29-31 yebätä). Ni iti tä ni mada murie kete o tä ja krärä kete akwle ngwane, tä nemen tare krubäte Jehovai (Éxodo 20:13).a Arato kukwe ngwarbebätä nikwe ja nire jakwe o ja nire ni madakwe mikadre kukwe tare te ye rabadre tare krubäte ie. Nita ja nire jakwe aune ja nire ni madakwe ngübarebiti ngwane, Jehovakwe ja nire biani nie ye ütiäte krubäte ni kräke nita bämike.
JA TOTIKE BÄRI NGUSETA
Ja nire biani nie yebätä nita debe bien ye ni raba bämike kukwe ruärebiti ye ani mike gare bäri jai.
3. Mä ja ngüba ne kwe mä tädre räre
Ni kristiano ja dianinkä Jehová kräke tä ja nire tätebiti sribire Jehová kräke. Ye abokän jondron nire deme kukwata Jehovai, ye kwrere ja nire bianta ie ni raba niere, ye medenbätä ja nire ye ngübadre kwin. Ñäkädre Romanos 12:1, 2 yebätä aune kukwe ne kädriere jabe:
¿Ñobätä mä rabadre ja ngübarebiti ne kwe mä tädre räre?
¿Mä raba nuainne ño?
4. Ja ngübabiti ne kwe mä o ni mada ñan juruaindre
Kukwe ño abokän raba ni nuainne tare ye nikwe ñaka nuaindre nieta Bibliakwe. Ño ja ngüba raba kwin ye mikakäre gare jai, VIDEO mikadre ñärärä:
Ñäkädre Proverbios 22:3 yebätä aune blitadre, ño ja ngüba raba kwin...
... gwi.
... sribi känti.
... jadaka känti.
... nita karo ngwen o nita näin karote ngwane.
5. Monso jämi därere ye ñan murie ketadre
Monso jämi därere ye känenkri dre dre tä nemen barebätä ye jökrä ütiäte Jehová kräke ye Davidkwe mikani gare. Ñäkädre Salmo 139:13-17 yebätä aune kukwe ne kädriedre jabe:
¿Monso jämi därere ye känenkri niena tuin ni nire ye kwrere Jehovai? O ¿tä därere ye ngwane batibe tuin ni nire ye kwrere ie?
Jehovakwe kukwe biani nitre Israel ie ye nämäne meritre murore aune monsotre jämi därere ye kriemike. Ñäkädre Éxodo 21:22, 23 yebätä aune kukwe ne kädriedre jabe:
¿Monso jämi därere mürie keta nämäne akwa ñan nuain nämene niera yebätä ja nämäne nemen ruin ño Jehovai?
Monso jämi därere, ye mürie ketata niera ngwane, ¿tä mate ño Jehovabätä?b
Ngöbö töita kore kukwe nebätä, ¿se raba tuin ño mäi?
Meri kräkre ja nire ye ütiäte akwa monso jämi därere känenkri mürie ketadre ye bäri kwin raba nütüre. Ñäkädre Isaías 41:10 yebätä aune kukwe ne kädriedre jabe:
Ngäbäkre jämi därere ye meyekwe mürie ketadre ribere ja dibiti ie ngwane, ¿nirei ja di kärädre kwe? Aune, ¿ñobätä?
NITRE RUÄRE TÄ KUKWE NE NIERE: “Tö ngäbäkre tuai därere o tö krärä ketai ye tä gare ie. Ye ñan kukwe ni madakwe”.
¿Ja nire meri murorekwe aune ja nire ngäbäkre jämi därere yekwe ye ütiäte ja erebe Jehová kräke ye dreta mike gare metre mäi?
¿DRE NIBI GARE MÄI?
Ja nire ye Jehovakwe biani regalore nie. Aisete Jehovakwe ja nire biani nie aune ja nire biani ni madai ye nikwe taredre, mikadre ütiäte jai aune kriemikadre ye drieta Bibliakwe nie.
Ngwankäreta törö
¿Jehovata ja nire nikwe tarere ye ñokänti gare nie?
Nierare ni iti tä ni mada murie kete o tä ja krärä kete akwle ngwane, ¿ja ta nemen ruin ño Jehovai?
¿Ja nire biani mäi yebätä ja ruin ño mäi?
KUKWE MIKE GARE BÄRI JAI
¿Nita debe bien ja nirebätä ye ni raba bämike ño Jehovai?
¿Meri ie kukwe metre jämi gare käkwe ngäbäkre jämi därere kwe mürie ketani ye Ngöbö raba ngite dentabiti?
“¿Biblia tä dre niere monso jämi därere mürie ketata yebätä?” (Artículo jw.org)
Kä ngwanta juto jabätä aune ja nire nikwe yebätä Ngöbö töita ño ye mike gare jai.
“¿Ja näkwita känti ja nuain raba tare ye nuaindre siba?” (Ni Mikaka Ngwäte, 8 octubre 2000)
Ni iti töita ja mürie ketabätä ngwane, ¿dre raba nemen bare? Biblia raba dimike ño ye mike gare jai.
“¿Ni ñan tö nünain yebätä ni tö ja murie ketai ngwane Biblia raba ni dimike?” (Artículo jw.org)
a Ni brukwä nötaninte yebätä Jehová töita krubäte (Salmo 34:18). Ñobätä ni iti tö ja kämikabätä ye gare kwin ie aune nire ie ja ruin kore ye niara tö dimikabätä. Kukwe kwin ja jie ngwankäre mikata gare artículo “¿Ni ñan tö nünain yebätä ni tö ja murie ketai ngwane Biblia raba ni dimike?”, tä sección “Kukwe mike gare bäri jai” kukwe ja tötikara nebätä yebätä mäkwe ñäkä.
b Ni ie kukwe metre jämi gare känenkri ja töi mikani kwe monso jämi därere mürie kete ye ie ja ñan rabadre ruin ngite jankunu ñobätä ñan aune Jehová töita ngite juanbätä tabiti. Sección “Kukwe mike gare bäri jai” känti artículo “¿Biblia tä dre niere monso jämi därere mürie ketadre yebätä?”, tä kukwe ja tötikara nebätä yekänti kukwe raba kwen bäri mäi kukwe nebätä.