KUKWE JA TÖTIKARA 41
¿Raba jabe yebätä Biblia tä dre niere?
Blitadre raba jabe (sexo) yebätä ye gaidre nitre kwati kräke. Akwa, Biblia tä blite kukwe yebätä ngwane, tä kukwe mike gare metre ta aune bökän. Jehová ni sribekä aune kukwe meden kwin ni kräke gare ie yekri Biblia ye kite. Aisete Biblia tä kukwe niere, kukwe nebätä ye kwin ni dimikakäre. Ño ni raba kä mike juto Jehovabätä aune dre käkwe kä mikai juto kärekäre nibätä, ye tä driere nie.
1. ¿Raba jabe ye tuin ño Jehovai?
Raba jabe, ye regalo biani Jehovakwe. Akwa ni brare aune merire ja mäkäninte metre aibe rabadre jabe ie tö. Ni ja mäkäninte rabadre monso ngübare ye ñan aibe kräke regalo ne biani, ñakare aune yebiti ni ja mäkäninte tä ja tarere bökän kwärikwäri ye raba bämike jai. Ye medenbätä, Ngöbö kukwei tä niere: “Mä nämäne bati ngwane mä muko namani yebe mäkwe kä ngwan juto jabätä” (Proverbios 5:18, 19). Ni kristiano ja mäkäninte rabadre ja ngwen metre jai kwärikwäri ngübata Jehovakwe. Aisete ni kristiano ja mäkäninte ñaka rabadre jire ni madabe (adulterio) (mäkwe ñäkä Hebreos 13:4 yebätä).
2. ¿Ni nemen kämekäme jabe ye abokän dre gärätä?
Nitre “nemen kämekäme jabe [...], yekwe gobran Ngöbökwe ñaka rabai” drieta Bibliakwe (1 Corintios 6:9, 10, TNM). Nitre Biblia tikaka käkwe blitabare raba kämekäme jabe yebätä ngwane kukwe griegore pornéia yebiti blitabare kwetre. Pornéia ye abokän 1) nitre ñaka ja mäkäninte metre tä nemen jabe,a 2) ni brare o merire ja erebe nemen jabe 3) jondron nire mikata jabe. Ja di ngwanta ñan ja mike ngite kukwe nebätä ngwane kä mikata juto Jehovabätä aune kukwe kwin keta kabre tä nemen nikwe (1 Tesalonicenses 4:3).
JA TOTIKE BÄRI NGUSETA
Mä ñan rakadre raba kämekäme jabe yei yekäre mä raba dre nuainne aune mäkwe ja di ngwain ja ngwankäre mrebe ja töi, blita aune kukwe nuain yebiti ye köböire dre kwin rabai mäkwe, ye ani mike gare jai.
3. Raba kämekäme jabe ye ngänikaire ngitie
Ni ja ngwanka metre kädeka nämäne José käkwe ja di ngwani ja ngwankäre mrebe, raba kämekäme jabe yebätä. Ñäkädre Génesis 39:1-12 yebätä aune kukwe ne kädriedre jabe:
¿Ñobätä José ngitiani? (Bersikulo 9 mikadre ñärärä).
¿Kukwe kwin nuainbare Josekwe raba ruin mäi? ¿Ñobätä?
¿Monsotre bati raba ja ngwen ño José erere aune ngitie raba kämekäme jabe ngänikaire? VIDEO mikadre ñärärä.
Raba kämekäme jabe yebätä ni jökrä gitiadre ie Jehová tö. Ñäkädre 1 Corintios 6:18 yebätä aune kukwe ne kädriedre jabe:
¿Dre raba ni iti töi mike nemen kämekäme ni madabe?
¿Ño mä raba ngitie raba kämekäme jabe ngänikaire?
4. Mä nuateta ye mä raba ganainne
¿Dre köböite ñan raba nemen nuäre gitiakäre raba kämekäme jabe ye ngänikaire? VIDEO mikadre ñärärä, biti kukwe ne kädriedre jabe:
Ja eteba täni kukwe nuainne aune töi kwe ye raba niara mike ñaka ja ngwen metre muko kwe ie gari kwe ngwane, ¿dre nunie kwe?
Ruäre ngwane ni kristiano ja ngwanka metre ie arato tä nemen ja di ngwandre ne kwe töi tädre mrebe. ¿Mä raba dre nuainne ne kwe mä ñaka ja töi mikadre nemen kämekäme ni madabe? Ñäkädre Filipenses 4:8 yebätä aune kukwe ne kädriedre jabe:
¿Kukwe medenbätä ni rabadre ja töi mike?
Ñäkädre Bibliabätä aune sribidre bäri Jehová kräke ye köböire, ¿rabai bäri nuäre ni kräke gitiakäre ni nuateta yebätä raba ruin mäi? ¿Ñobätä?
5. Kukwe ükaninte Jehovakwe ye kwin ni kräke
Dre bäri kwin ni kräke ye gare Jehovai medenbätä ño ni raba ja ngwen mrebe ja töi, blita aune kukwe nuain yebiti ye tä niere nie. Nikwe nuaindi ngwane, dre kwin rabai nikwe ye tä niere nie arato. Ñäkädre Proverbios 7:7-27 yebätä aune VIDEO mikadre ñärärä, biti kukwe ne kädriedre jabe:
¿Ñokänti monso ne ja mikani kukwe tare te? (Proverbios 7:8, 9 mikadre ñärärä).
Proverbios 7:23, 26 tä niere erere raba kämekäme jabe ye tä kukwe tare mike bare. Ni täi mrebe raba kämekäme jabe yebätä ngwane, ¿kukwe kri meden ñaka rabai ni kisete?
¿Nita ja ngwen mrebe ye raba ni dimike ño nüne kä jutobiti kärekäre?
Ni brare aune merire ja erebe nemen jabe yebätä Biblia tä kukwe niere yebiti ja tare bämika ñaka nütüta nitre ruärekwe. Akwa Jehová Ngöbö ja tarekä ye tö ni jökrä tuai nüne kä jutobiti kärekäre. Aune kukwe kwin ye rabadre nikwe yekäre nikwe nünandre kukwe nieta kwe ye ererebätä. Ñäkädre 1 Corintios 6:9-11 yebätä aune kukwe ne kädriedre jabe:
¿Ni brare o meri ja erebe nemen jabe ye aibe käme Ngöbö okwä känti?
Ni nämene kukwe nuainne ye ni jökrä rabadre kwite kä ngwankäre juto Ngöböbätä. Ja di ngwandre kukwe blo ye tuenmetre, ¿ye kwin raba ruin mäi? Ñäkädre Salmo 19:8, 11 yebätä aune kukwe ne kädriedre jabe:
¿Jehovata kukwe nuainmana ye kwin raba ruin mäi? ¿Ñobätä mäta töbike kore?
Jehovakwe nitre kwati dimikanina ja kukwei mike täte aune raba mä dimike arato.
NITRE RUÄRE TÄ KUKWE NE NIERE: “Ni nibu ja tarere rabadre jabe ye ñan käme”.
¿Mä raba dre niere kukwe yebätä?
¿DRE NIBI GARE MÄI?
Raba jabe ye biani regalore Jehovakwe ni kä tibienbätä ie, akwa ni brare ja mäkäninte meri ben aibe rabadre nemen jabe ie Jehová tö.
Ngwankäreta törö
¿Kukwe meden nuainta abokän ie raba kämekäme jabe nieta?
¿Dre käkwe ni dimikai ne kwe ni ñaka rakadre raba kämekäme jabe yei?
¿Kukwe nieta Jehovakwe mikata täte ye köböire dre kwin tä nemen nikwe?
KUKWE MIKE GARE BÄRI JAI
Ni brare aune merire tö nünain jabe ngwane ñobätä rabadre ja mäkete ngübata Ngöbökwe ye mike gare jai.
“¿Ni brare aune merire ñan ja mäkäninte tä nüne jabe yebätä Biblia tä dre niere?” (Artículo jw.org)
Ñobätä kukwe nieta Bibliakwe ni ja erebe nemen jabe yebätä ye ñan tä mike gare ja brukwä mikadre ni ye kräke ye mike gare jai.
“¿Ni brare ja erebe o merire ja erebe nemen jabe ye käme?” (Artículo jw.org)
Biblia tä ni kriemike ño raba jabe yebätä ye mike gare jai.
“¿Kudreta kadabiti jabätä ye rabata jabe?” (Artículo jw.org)
¿Dre käkwe ni iti nämäne nemen ni ja erebe ben ye töi mikani ja töi kwite aune Jehová mike täte? Biografía “ti mikaba ütiäte jai” yete mike gare jai.
“Biblia niaratre töi kwitani” (Ni Mikaka Mokre, 1 abril 2011)
a Raba jabe ja ngräkri, küdreta jabätä kadabiti, ja nuata kisebiti o (penetración), ye jökrä tä ni nemen kämekäme jabe ye ngätäite.