KUKWE JA TÖTIKARA 48
Mäkwe ja ketamuko kwin känä
Ja ketamuko kwin ye tä kä mike bäri juto nibätä aune kukwe tare näire tä ni dimike. Akwa ja ngübadrebiti, ñobätä ñan aune ni jökrä ye ñan ja ketamuko kwin nieta Bibliakwe. Aisete, ¿ño mä raba ja ketamuko kwin känene? Kukwe ngwantarita jatäri nebätä ja tötike.
1. ¿Ja ketamuko ye tä ni töi mike ño?
Ruäre tä ni töi mike kwin aune ruäre ngwane blo, ni ño ben nita ja kete ye erere nita kite ja ngwen. Ye nemen bare ja ketata gwärere o redes sociales yebiti. Bibliata niere: “Nire tä näin nitre töbätä ben ye rabai töbätä, akwa nire tä ja kete nitre ñaka töbätä ben [nitre ñan Jehová tarekä ben] ye kräke kukwe tare tä” (Proverbios 13:20). Ja ketamuko tä Jehová mike täte aune tarere ye raba mä dimike kukwe kwin den nuaindre jai aune ja kete jankunu Jehovabe. Akwa mäta ja kete kwin ni ñaka konkrekasionte ben ngwane, raba mä töi mike kämikekä Jehovabätä. Ye medenbätä, nikwe ñan ja ketamuko känändre okwä kware nieta Bibliakwe. Ja ketamuko nikwe tä Jehová tarere ngwane, kukwe kwin tä nemen bare ni kräke. Ye erere ngwane, kukwe niebare ne ni raba mike täte: “Munkwe ja moto mika nuäre […] amne, munkwe ja mika bäri dite” (1 Tesalonicenses 5:11).
2. ¿Mäta ja kete ni ño ben ye Jehová ñan töibikaire?
Jehová ñan ja ketamuko känene okwä kware. Ñodre, “niarata ja kete bäri kwin nitre kukwe metre nuainkä yebe” (Proverbios 3:32). Nitre ñan Jehová tarere ben ni tadre ja kete ngwane, ¿ja rabadre ruin ño Jehovai raba ruin mäi? ¡Ulire ñan ererea! (mäkwe ñäkä Santiago 4:4 yebätä). Ne madakäre, nikwe ñaka ja ketai ni blo ben, ni rökräi bäri Jehová ken aune nitre niara tarekä ken ngwane, kä rabai jutobätä aune ja ketai kwe nibe (Salmo 15:1-4).
JA TÖTIKE BÄRI NGUSETA
Ja ketamuko kwin känändre ye ñobätä ütiäte aune ño mä raba ja ketamuko kwin känene ye ani mike gare jai.
3. Mä ñan ja ketamuko känä okwä kware
Ja ketamuko blo ye abokän ñaka Ngöbö tarere aune ñan Ngöbö kukwei mike ütiäte jai. VIDEO mikadre ñarärä, biti kukwe ne kädriedre jabe:
¿Ñokänti ni raba ja kete ni blo ben aune ñan gain jabätä?
Ñäkädre 1 Corintios 15:33 yebätä aune kukwe ne kädriedre jabe:
Mä kräke, ¿ni ño abokän ja ketamuko käme? ¿Ñobätä?
Ñäkädre Salmo 119:63 yebätä aune kukwe ne kädriedre jabe:
¿Dreta mike gare mäi ni iti ye ja ketamuko kwin?
Manzana käme ye raba manzana mada juen ngwarbe. Aune, ¿ja ketamuko käme ye raba mä töi mike ño?
4. Ni ñan ja erebe nibe akwa ja keta raba kwin ben
Bibliata blite David aune Jonatán yebätä, niaratre nünanbare kira juta Israel yete. Niaratre biti kä ñan nämäne ja näre, nämäne nüne jene, akwa ja ketani kwin kwetre. Ñäkädre 1 Samuel 18:1 yebätä aune kukwe ne kädriedre jabe:
Kä tädre ja näre nibiti, ni nünandre ja erebe, ¿ye ñobätä ribe ñan jai ja ketakäre?
Ñäkädre Romanos 1:11, 12 yebätä aune kukwe ne kädriedre jabe:
Ja ketamuko Jehová tarekä, ¿ye tä ja mike dite ño kwärikwäri?
Ño ja ketamuko kwani monso bati ie ye mike ñärärä. VIDEO mikadre ñärärä, biti kukwe ne kädriedre jabe:
¿Ja ketamuko nämäne Akilkwe kwelate ye ñobätä nämäne rün kwe ngwen töbike?
Kenanbe, ¿ñobätä Akil tö nämä ja ketai nitre yebe?
Ja ñan rabadre ruin kaibe ie yekäre, ¿dre nuainbare kwe?
5. ¿Ño ja ketamuko kwin raba nemen nikwe?
Ño ja ketamuko kwin raba kwen mäi aune ño mä raba ja ngwen ja ketamuko kwin erere ye mike gare jai. VIDEO mikadre ñärärä.
Ñäkädre Proverbios 18:24; 27:17 yebätä aune kukwe ne kädriedre jabe:
¿Ja ketamuko kwin ye tä ja dimike ño kwärikwäri?
Proverbios tä ja ketamuko kwin niere, ¿ye erere tärä mäkwe? Ñakare ngwane, ¿mä raba dre nuainne ne kwe rabadre mäkwe?
Ñäkädre Filipenses 2:4 yebätä aune kukwe ne kädriedre jabe:
Ja ketamuko kwin rabadre mäkwe yekäre, mä abokän ja ketamuko kwin mä rabadre bämike käne. ¿Ño raba nemen bare mäi?
Ja ketamuko kwin rabadre mäkwe yekäre, mä rabadre ja ngwen ja ketamuko kwin.
NITRE RUÄRE TÄ KUKWE NE NIERE: “Ni jökrä ben ja ketadre ye ñaka käme”.
¿Mäkwe dre niedre?
¿DRE NIBI GARE MÄI?
Nita ja ketamuko kwin känene ngwane, kukwe kwin tä nemen bare ni kräke aune nita kä mike juto Jehovabätä.
Ngwankäreta törö
¿Ni ja ketai ni ño ben ye ñobätä ütiäte Jehová kräke?
¿Ni ño ben ñan ja ketadre?
Ni kwin yebe, ¿ño mä raba ja kete bäri kwin?
KUKWE MIKE GARE BÄRI JAI
Ja ketamuko metre ye raba ni dimike ño kukwe tare näire ye mike gare jai.
“Kä jämi krüte ye känenkri ja ketadre kwin kwärikwäri” (Ni Mikaka Mokre, noviembre 2019)
Ja ketadre kwin yekäre kukwe ruäre nuaindre ye mike gare jai.
¿Dre rabadre gare mäi ja ketamuko internete yebätä?
Ñobätä ni iti käkwe ja ketamuko kwitani ye mike gare jai biografía “Ti tö nämäne ja rün tuai” yete.
“Biblia niaratre töi kwitani” (Ni Mikaka Mokre, 1 abril 2012)