¿NE GARE MÄI?

¿Templo Jerusalén ganinte kä 70 ye bitikäre ükaninteta?

JESÚS blitabare templo yebätä angwane niebare känenkri kwe “jä ketani jabti jabti se juandi jökrä temen”; aune Tito, nitre rükä Romano jie ngwanka käkwe Jerusalén ganinte kä 70 yete, ye ngwane kukwe ye namani bare (Mat. 24:2). Siklo nikani ta, ye bitikäre emperador Juliano tö namani templo ye ükaiteta.

Juliano ye Constantino el Grande nurä; Juliano ye namani mrä emperador Roma yete aune ñaka nämene Ngöbö mike täte. Niara tötikani kukwe “kristiano” yebiti, akwa kädekani emperador kä 361 ye ngwane mikani gare kwe nitre mada okwäbiti kukwe kristiano aune kukwe ngwarbe drie nämene ye niara ñaka nämene kain ngäbiti aune jatani kukwe mada kain ngäbiti. Ye medenbätä, tärä kukwe namani bare kirabe kädriekä tä niara kädeke “ni ja mikaka kukwe kwe rüere”.

Juliano nämene ja rüere kukwe kristiano drie nämene yebe; ñobätä ñan aune kä nämene kwä ti niarabiti angwane nitre ja bianka kristiano tuani kwe rün aune mräkätre mada kwe murie kete. Nitre kukwe tikaka kira tä niere niara nitre Judea töi mikani templo üketeta bämikakäre Jesukwe kukwe ngwarbe niebare.a

Juliano tö namani templo ükaiteta ye mikata gare metre. Akwa, sribi ye kömikani o ñakare ye ñaka mikata gare; arato ñobätä sribi ye tuanimetre ye ñaka mikata gare metre ta. Juliano jämi gobrane kä kubu näre angwane krütani aune tö namani sribi nuain ye ñaka namani bare ie..